Naari. Biibiliya onihimya wira nihaana onvekela Muluku paahi mwa nsina na Yesu. Nto Yesu aahaaleela awiixutti awe wira: “Vano, nvekeleke so: Tiith’ihu muri wirimu, Nsina n’anyu nttittimihiwe”. (Matheyo 6:9, Waataana wa Naanaano) Yesu khontonko owiixuttiha atthareli awe wira yaavekeleke masanto, malaikha wala mutthu mukina ohikhanle Muluku paahi.

 Nave Yesu aahaaleela atthareli awe wira: “Miyo k’ephiro n’ekeekhai n’ekumi; Khaavo onrowa w’Atiithi ahivinre mwa miyo”. (Yohani 14:6, WN) Yesu paahi teemereriwe ni Muluku wira onikhaliheryeke.—aHeeberi 7:25.

Kiireke pooti onvekela Muluku okathi omosaru kinaavekela masanto?

 Malamulo Muloko Muluku aavanhe awe aIsarayeli, nimosa naahimya wira: “Miyo KAAPWIYA, Muluku anyu, miyo ka Muluku a ehace”. (Okhuma 20:5, Nova Bíblia Americana) Moota xeeni Muluku ori awe ‘eehace’? Enoota ya Biibiliya Nova Bíblia Americana enihimya wira “oniphavela wira okokhoreliweke yoowo paahi”. Eyo enooniherya wira Muluku oniphavela wira ninvekeleke ni nimukokhoreleke yoowo paahi.—Yesaya 48:11.

 Akhala wira nnaavekela masanto, malaikha wala mutthu mukina, ninninveeha Muluku. Okathi murummwa Yohani aaphavela awe okokhorela nlaikha, nlaikha nno naahimukhoottiherya nihimyaka wira: “Muhiire siiso! Miyo ki murumeyi ntoko nyuwo ni ntoko axinn’inyu yawo ankhapelela onamoona wa Yesu. Mmukokhoreleke Muluku paahi”.—Wisuupulula 19:10, WN.