Akkay, biittay xayenna, taman xuugettenna woy A sohuwan haray merettenna. Biittay merinawu deꞌiyo soho gidanaadan Xoossay medhdhidoogaa, Geeshsha Maxaafay yootees.

•   “Xilloti biittaa laattananne yan merinau de7ana.”—Mazamure 37:29.

•   “Neeni sa7aa a baasuwaa bolli essadasa; i meri merinaukka qaaxxenna.”—Mazamure 104:5.

•   “Biittai merinaukka laamettennan de7ees.”—Eranchchaa 1:4.

•   “Biittaakka giigissidi oottidaagee, qassi asi de7anaadaanappe attin, biittaa coo medhdhibeenna.”—Isiyaasa 45:18.

 Heeraa hambbalaashiyaaban, olan woy haraban asay saꞌaa xayssanaadan Xoossay mule paqqadenna. SHin, I ‘saꞌaa xayssiyaageeta xayssana.’ (Ajjuutaa 11:18) I hegaadan waati oottanee?

 Xoossay saꞌaa naaganawu danddayibeenna asaa kawotettaa xayssidi, eta sohuwan wottiyoobi baynna saluwaa Kawotettay haaranaadan oottana. (Daaneela 2:44; Maatiyoosa 6:9, 10) Xoossaa naꞌay Yesuus Kiristtoosi he Kawotettan haarana. (Isiyaasa 9:6, 7) Yesuusi saꞌan deꞌiyo wode, carkkuwaa seeriyo maalaaliya wolqqay baayyo deꞌiyoogaa bessiis. (Marqqoosa 4:35-41) Yesuusi Xoossaa Kawotettaa Kawo gidiyo gishshawu, saꞌaanne saꞌan deꞌiya ubbabaa haarana. I saꞌan deꞌiyaabata zaarettidi giigissiyoogan, woy ooraxissiyoogan saꞌaa Edene gannatiya mala oottana.—Maatiyoosa 19:28; Luqaasa 23:43.

 Akkay, tamaarissenna. Asay 2 PHeexiroosa 3:7n deꞌiya qofaa darotoo bala ogiyan akeekiyo gishshawu hegaadan qoppees. Xiqisee hagaadan gees: “Ha77i de7iya saloinne sa7ai, . . . tamaa naagoosona.” He qofay woygiyoogaakko loytti akeekanawu maaddiya naaꞌꞌubata beꞌa:

1.   Geeshsha Maxaafan, “saluwaa,” “saꞌaa,” qassi “tamaa” giya qaalati issuwaappe dariyaabaa qonccissoosona. Leemisuwawu, Mazamure 33:8y, “Sa7a ubbai GODAAYYO yayyo” yaagees. Ha sohuwan, ‘saꞌaa’ giya qaalay asaa bessiyaaba.

2.   Saluwaa, saꞌaanne tamaa geetettidabati aybakko 2 PHeexiroosa 3:7 yuushuwan deꞌiya qofaappe akeekana danddayoos. Paydo 5ynne 6y, Nohe wode Bashshaa Haattaara hegaa geeddarssees. He wode deꞌiya asay xayidaba gidikkonne, saꞌay xayibeenna. He wode, ‘saꞌaa’ geetettida iita asata Bashshaa Haattay muleera xayssiis. (Doomettaabaa 6:11) Saꞌan deꞌiya he iita asata haariya ‘salo’ geetettida asaakka xayssiis. Yaatiyo gishshawu, xayiday saꞌaa gidennan, makkalanchcha asata. Noheenne A soo asay Bashshaa Haattay he asata xayssiyo wode attidi saꞌan deꞌidosona.—Doomettaabaa 8:15-18.

 Bashshaa Haattaa wode hanidoogaadan, 2 PHeexiroosa 3:7n ‘tamaa’ geetettida bashshay, saꞌaa gidennan saꞌan deꞌiya iita asata xayssana. ‘Xilloti deꞌana’ “ooratta saluwaanne ooratta sa7aa” ehaanawu Xoossay qaalaa geliis. (2 PHeexiroosa 3:13) ‘Ooratta saloy’ woy Xoossaa Kawotettay, “ooratta sa7aa” geetettida Xoossawu azazettiya asata haarana. He Kawotettaa haaruwan saꞌay sarotettay kumido gannate gidana.—Ajjuutaa 21:1-4.