Xoossay Ubbasankka Deꞌii?

KAASSA

Geeshsha Maxaafay yootiyoobaa

Xoossay ubbabaakka beꞌana danddayees; qassi awankka gidin ba koyidobaa oottana danddayees. (Leemiso 15:3; Ibraawe 4:13) SHin Geeshsha Maxaafay Xoossay ubbasan, qassi ubbabaa bolli deꞌees giidi tamaarissenna. Geeshsha Maxaafay awu qottay deꞌiyoogaanne issisan deꞌiyoogaa yootees.

Xoossaa qottaa: Xoossay ayyaana. (Yohaannisa 4:24) Asi A beꞌana danddayenna. (Yohaannisa 1:18) Xoossay qonccidoogaa yootiya, Geeshsha Maxaafan odettida ajjuutati ayyo dumma sohoy deꞌiyoogaa bessoosona. I ubbasan deꞌiyoogaadan mule odetti erenna.—Isiyaasa 6:1, 2; Ajjuutaa 4:2, 3, 8.
Xoossay deꞌiyo sohuwaa: Xoossay ayyaana alamiyan deꞌees; hegee beettiya meretati deꞌiyoosaappe dumma soho. He sohoy Xoossay ‘deꞌiyoosaa, saluwaa.’ (1 Kawotu Maxaafaa 8:30) Issi wode, ayyaana meretati “GODAA [“Yihoowa,” NW] a sinttan beettanau” yiidoogaa Geeshsha Maxaafay yootees; hegee I issi dumma sohuwan deꞌiyoogaa bessiyaaba.—Iyyooba 1:6.

Xoossay ubbasan deꞌennaba gidikko, taassi qoppana danddayii?

Ee. Xoossay asawu huuphiyan huuphiyan qoppees. Xoossay deꞌiyoy saluwaana gidikkokka, A ufayssanawu wozanappe koyiya, saꞌan deꞌiyaageeta I akeekees; qassi eta maaddiyaabaa oottees. (1 Kawotu Maxaafaa 8:39; 2 Hanidabaa Odiya 16:9) Yihooway wozanappe awu goynniyaageetuyyo qoppiyoogaa waati bessiyaakko akeeka:

Woossiyo wode: Yihooway neeni woossiyoogaa doommosaara siyees.—2 Hanidabaa Odiya 18:31.
Neeni hirggiyo wode: “GODAI wozanay me77idoogeetussi mataana; qassi bantta ayyaanan liiqidaageeta ashshees.”—Mazamure 34:18.
Kaaletoy neessi koshshiyo wode: Yihooway ba Qaalaa Geeshsha Maxaafaa baggaara “nena erissananne neeni baanau bessiya ogiyaa nena tamaarissana.”—Mazamure 32:8.

Ubbasan deꞌees giyoogaara gayttidaagan asay qoppiyo balabaa

Bala qofaa: Xoossay meretaa bolli ubbasan deꞌees.

Tumaa: Xoossay saꞌaa bolli gidin hara aybaa bollikka gidin deꞌenna. (1 Kawotu Maxaafaa 8:27) Xoolinttetinne hara meretati ‘Xoossaa bonchchuwaa haasayiyoogee’ tuma. (Mazamure 19:1) Gidoppe attin, misiliyaa medhdhiya uri he misiliyaa bolli deꞌennaagaadan, Xoossaykka ba medhdhidobaa bolli deꞌenna. SHin misilee bana medhdhida uraabaa qonccissiyoobi deꞌana danddayees. Hegaadankka, bettiya meretay Medhdhidaagaa wolqqaa, aadhdhida eratettaanne siiquwaa mala ‘beettenna A hanotaa’ nuussi qonccissees.—Roome 1:20.

Bala qofaa: Xoossay ubbabaa eranawunne ubbabaa oottanawu ubbasan deꞌana bessees.

Tumaa: Geeshsha ayyaanay Xoossaa wolqqa. Xoossay awunne beennan, ba geeshsha ayyaanaa baggaara awan gidin, awudekka ubbabaa akeekananne oottana danddayees.—Mazamure 139:7.

Bala qofaa: Mazamure 139:8y, “Pude saluwaa biyaakko, neeni yan de7aasa! Duge si7ooliyaa wodhdhiyaakkokka, neeni yan de7aasa” yaagiyoogee Xoossay ubbasan deꞌiyoogaa bessees.

Tumaa: Ha xiqisee Xoossay deꞌiyo sohuwaabaa yootenna. Ha qofay Xoossay nuna maaddennaadan oottana danddayiya haaho sohoy baynnaagaa bessees.

a Yihoowa giyoogee Geeshsha Maxaafan qonccida Xoossaa sunttaa.