“Korona vayresiyaappenne carkkoy laamettidoogaappe denddidaagan alamiyan kattay keehi qaxuwaatidoogaa bolli Yukireene olay gujettidoogee alamiyan issi issi heeran namisay yaa daranaadan oottidoogaa” Kawotettatu Issippetettaa Sarotettaa Naaguwaa Zoreta Keettay Uddufune 19, 2022n, 75ppe dariya xoqqa maatay deꞌiyo kawotettaa sunttatuppe siyiis. Alamiyan daro metoy deꞌiyoogaa bolli, olay gujettidoogee koshay keehi daranaadan oottidoogaa Zi Ikkonomistti giyo maxeetee yootiis. Hegaa mala kattaa qaxuwatoy nu wodiyan deꞌanaagaa Geeshsha Maxaafay kasetidi yootiis; gidikkonne nuuni hegaa genccanaadan maaddiyaabaakka yootees.

•    Yesuusi hagaadan giis: “Issi biittaa asai hara biittaa asaara olettana; qassi issi kawotettai hara kawotettaara olettana; [koshay] . . . ubbasan de7ana.”—Maatiyoosa 24:7.

•    Geeshsha Maxaafaa shaaho gidida Ajjuutaa maxaafay leemiso gidida oyddu paraasatubaa yootees. He paraasatuppe issoy olawu leemiso. Hegaappe kaallidi hara paraa toggidaagee yaana; hegee asay kattaa demmanawu metootiyonne hegaa shammanawu keehi daro miishshaa kessiyo wodiyawu leemiso. “Amara parai kiyidaagaa be7aas; qassi he paraa toggidaagee ba kushiyan meezaanaa oiqqiis. Taani . . . cenggurssa milatiyaabaa siyaas, He cenggurssai, ‘Issi gallassa oosuwaayyo damoozai issi guruure gistte; qassi issi gallassa oosuwaayyo damoozai heezzu guruure bangga’ yaagishin siyaas.”—Ajjuutaa 6:5, 6.

 Geeshsha Maxaafay kattay qaxuwatanaagaa yootido hiraagay Geeshsha Maxaafay ‘wurssetta gallassa’ giyo ha wodiyan polettiis. (2 Ximootiyoosa 3:1) ‘Wurssetta gallassaabaanne’ oyddu parasatubaa gujjada eranawu Alamee 1914ppe Doommidi Laamettiis giya biiduwaa beꞌa; qassi “Oyddu Paraasata—Eti Oonee?” giya huuphe yohuwaa xeella.

•    Kattaa waagay keehi alꞌꞌiyoogaa woy kattay keehi qaxuwatiyoogaa gujjin wayssiya hanotaa genccanawu maaddiya loꞌꞌo zoree Geeshsha Maxaafan deꞌees. “Guutta Miishshan Deꞌana Danddayiyo Ogiyaa” giya huuphe yohuwaappe amarida leemisota beꞌa.

•    Haꞌꞌi deꞌiya hanotay laamettidi loꞌꞌanaagaa qonccissiya hidootaa Geeshsha Maxaafay yootees. ‘Biittan daro kattay mokkana’ wodee yaanaagaanne ubba asay gidi palahiya kattaa demmanaagaa Geeshsha Maxaafay yootees. (Mazamure 72:16) Sinttanaa hidootaa xeelliyaagan Geeshsha Maxaafay yootiyoobaanne hegaa ammanettana danddayiyoy aybissakko gujjada eranawu, “Keha Wodee Yaana Giidi Hidootana Danddayiyo?” giya huuphe yohuwaa nabbaba.