“Yelagatu guuggiya sahoy qoppennan doommidaba—qassi hegawu waanna gaasotuppe issoy sooshal miidiya.”—Dottoriya Vivek Murta, Amarkkaa asaa payyatettaa halaafiya, Niwu York Taymis, Tamme 17, 2024.

 Yelidaageeti sooshal miidiya qohuwappe bantta naata waati naagana danddayiyonaa? Geeshsha Maxaafay maaddiya zoriya yootees.

 Geeshsha Maxaafay yootiyo ha maarata akeeka.

 “Cinccai akeekidi tanggees.”—Leemiso 14:15.

 Sooshal miidee ne naꞌaa qohana danddayiyo gishshawu, I sooshal miidiya goꞌettanaadan eeno gaana koshshees gaada qoppoppa. Ne naꞌi sooshal miidiya goꞌettanaadan eeno gaanaappe kase, I woy A hegaa goꞌettanawu bazzido wodiya naagana, ubbatoo loꞌꞌo asatuura laggetananne iitabaappe haakkana danddayiya wozannaama naꞌa gididaakkonne shaakka era.

•   Gujjada eranawu, “Ta Naꞌay Sooshal Miidiya Goꞌettanaadan Eeno Goo?” qassi, “Panttatettaa Layttan Deꞌiya Intte Naꞌay Sooshal Miidiya Qohenna Ogiyan Goꞌettanaadan Loohissiyogaa” giya huuphe yohota nabbaba.

 “Intte lo77o wodiyaa coo xaissoppite.”—Efisoona 5:16.

 Intte naꞌay sooshal miidiya goꞌettanaadan eeno giikko, hegaa goꞌettiyo maaraa kessite, qassi hegee A qohuwappe waati naagiyakko qonccissite. Intte naꞌay sooshal miidiya goꞌettiyo hanotan zawaa wottana koshshiyogaa qonccissiya A eeshshan laamettidabi deꞌiyakkonne loytti kaallite.

•   Zawaa wottiyogee koshshiyoy aybissakko intte naꞌay akeekanaadan maaddanawu, Soshiyal Networkiyaa Goꞌettiyo Ogiyan Akeekancha Gida giya biiduwa goꞌetta.

 Geeshsha Maxaafay nuuni ‘waayissiya wodiyan’ deꞌiyogaa yootees. (2 Ximootiyoosa 3:1-5) Shin nuuni genccanawu maaddiya daro zoriyakka yootees. Yelagatu guuggiya payyatettaara gayttidaagan yelidaageetanne eta naata maaddiya Geeshsha Maxaafaappe giigida 20​ppe dariyabati ha huuphe yohuwan deꞌoosona.