Taani naatettaappe doommada merettidabaa beꞌiyoogaa dosays. Giddo Finlandden nuuni deꞌiyo Jayvaskalan giyo katamaa yuushuwan deꞌiya loꞌꞌiya woraanne abbaa beꞌiiddi nu so asay darotoo allaxxees. Qassi taani mehiyaa doꞌaa keehi dosays. Taani naatettan, beꞌido gawaraanne kana ubbaa qoommanawu koyays. Taani gitaa gidada, asay mehiyaa doꞌaa qohiyoogaa beꞌada darotoo yiillotays. Guyyeppe, taagaadan qoppiya asatuura mehiyaa doꞌaa maatawu eqqida dirijjitiyan oottiyoogaa doommaas.

Nuuni mehiyaa doꞌaa maataa bonchchissanawu keehi baaxetida. He qofaa ubba asawu yootoos, qassi mehiyaa doꞌaa bolli xaliyaa mali beꞌiyoogaanne eta ikisiyaa bayzziyoogaa eqettanawu salppiyaa kiyoos. Mehiyaa doꞌaa maataa bonchchissanawu hara dirijjitiyaakka essida. Nuuni hegaadan oottanawu keehi baaxetiyo gishshawu, maatay deꞌiyoogeeti darotoo nuna wayssoosona. Tana darotoo oyqqidi pirdda keetti efiidosona.

Taani mehiyawu doꞌawu qoppiyoogaa xalla gidennan alamiyan deꞌiya hara metotuunikka unꞌꞌettays. Guyyeppe, Amnisti Internaashinal giyoonne Girinpiis giyo dirijjiteta gujjin daro dirijjitetun gelaas. Tawu deꞌiya wolqqa ubban he dirijjitetu oosuwaa kaafaas. Hiyyeesatu, namisettidaageetunne hara metootiya asatu maataa bonchchissanawu mootettaas.

SHin taani ha alamiyaa laammana danddayennaagaa loddan loddan akeekaas. He dirijjiteti guutta metota giigissikkonne, gita metoti yaa iitidosona. Hegee iitatettay kumetta alamiyaa qohiisinne oonanne qofissennaba gidiis giyoogaa mala. Taani aybanne oottana danddayikke gaada qoppaas.

Taani aybanne oottana danddayennaagan azzanido gishshawu Xoossaabaanne Geeshsha Maxaafaabaa qoppiyoogaa doommaas. Taani Yihoowa Markkatuura Geeshsha Maxaafaa kase xannaꞌaas. Yihoowa Markkati taayyo kehidoogaanne qoppidoogaa nashshikkonne, he wode ta deꞌuwan laamettanawu giigettabeykke. Haꞌꞌi, hanotati laamettidosona.

Taani Geeshsha Maxaafaa nabbabiyoogaa doommaas. Nabbabidobay tana keehi minttettiis. Mehiyaa doꞌaa kehatettan oyqqanaadan tamaarissiya daro Geeshsha Maxaafaa xiqiseti deꞌiyoogaa taani akeekaas. Leemisuwawu, “xillo asi ba mehiyaassi” qarettiyoogaa Leemiso 12:10y yootees. Alamiyan metoy gakkanaadan oottiday Xoossaa gidennaagaakka taani akeekaas. Metoy yaa iiti iiti biidoy daro asay A kaaletuwaa kaallennan ixxido gishshataassa. Taani Yihoowa siiquwaabaanne A danddayaabaa erido wode keehi ufayttaas.—Mazamure 103:8-14.

He wode, Tumuppe Geeshsha Maxaafay Tamaarissiyoy Aybee? giyo maxaafaa tawu yeddanaadan qitsiyaa kunttada kiittaas. Sohuwaara, Yihoowa Markka gidida issi azinaynne machchiya ta soo yiidi Geeshsha Maxaafaa xannaꞌanaadan tana shoobbin eeno gaas. Qassi, SHiiquwaa Addaraashan shiiqiyoogaa doommaas. Hegaappe denddidaagan, Geeshsha Maxaafaappe tamaariyoobaa dosiyoogaa doommaas.

Taani daroban laamettanaadan Geeshsha Maxaafay maaddiis. Sijaaraa uyiyoogaanne mattottiyoogaa aggaas. Ta hanotaynne ta haasayay laamettiis. Qassi maatay deꞌiyoogeeta kaseppe dumma ogiyan xeelliyoogaa doommaas. (Roome 13:1) SHori baynna duussaa deꞌiyoogaakka aggaas.

Mehiyaa doꞌaa maataa bonchchissanawu baaxetiya dirijjiteta bessiyaagaadan xeellanawu keehi metootaas. Taani sohuwaara hegaadan oottabeykke. Taani he dirijjitetuppe kiyiyaakko eta kaddiyaabadan koyro heeran qoppaas. SHin alamiyan deꞌiya metuwaa giigissana danddayiyay Xoossaa Kawotetta xalla gidiyoogaa akeekaas. Tawu deꞌiya wolqqa ubban Xoossaa Kawotettawu exatanawunne harati he Kawotettaabaa tamaaranaadan maaddanawu murttaas.—Maatiyoosa 6:33.

Laamiyaa ehaanawu baaxetiyo wode asaa loꞌꞌo woy iita gaada naaꞌꞌu citawu shaakkays, qassi taani iita gaada qoppiyo asata qohanawukka guyye giikke. SHin Geeshsha Maxaafay maaddin taani harata haꞌꞌi ixxikke. Qassi, ubba asaa loytta siiqanawu baaxetays. (Maatiyoosa 5:44) Kawotettaa mishiraachchuwaa haratussi yootiyoogaaninne hara ogetun he siiquwaa bessays. Ha loꞌꞌo oosoy asay sarotettan deꞌanaadan, ufayttanaadaaninne etawu tumu hidootay deꞌanaadan oottiyoogaa beꞌiyo wode keehi ufayttays.

Tana unꞌꞌissiya ubbabaa Yihoowa bolli oliyoogan woppaa demmaas. I Medhdhidaagaa gidiyo gishshawu, mehee doꞌaynne asay merinawu qohettanaadan, qassi loꞌꞌiya saꞌay xayanaadan mule paqqadennaagaa ammanettays. Qassi, I ba Kawotettaa baggaara haꞌꞌi deꞌiya metuwaa ubbaa matan xayssana. (Isiyaasa 11:1-9) He tumaa eriyoogaa xalla gidennan, haratikka hegaa ammananaadan maaddiyoogee tana keehi ufayssees. Alamiyaa laammana bessees gaada qoppiyoogaa aggaas.