1, 2. Yuuyidi xomoosiya issi ishay, etabay Geeshsha Maxaafan odettido ammanettida asata waati xeellidee, qassi he asati nuuyyo loꞌꞌo lagge gidana danddayiyoy aybissee?

 “ETABAY Geeshsha Maxaafan odettido asatubaa ba laggetu taarikedan yootiis.” Yuuyi xomoosiya cima ishaa haasayaa siya simmada issi michiyaa hegaadan gaasu. He ishay daro layttawu Xoossaa Qaalaa xannaꞌido gishshawunne appe tamaarissido gishshawu, hegaadan geetettiis; i Geeshsha Maxaafan etabay odettido ammanettida asata beniisappe eriyo ba laggetudan xeellees giyoogaa.

² Etabay Geeshsha Maxaafan odettido daro asata nu laggedan xeellana danddayiyoogee ufayssiyaaba. He asata neenikka ne laggedan xeellay? Noha, Abrahaama, Uruto, Eelaasanne Asttiri mala asatuura issippe hemettiyoogee, haasayiyoogeenne wodiyaa aattiyoogee ay keena ufayssiyaabakko qoppa. Eti nena keehi maaddiyaabaa oottanaagaa, hegeekka nena loꞌꞌobaa zoranaagaanne minttettanaagaa qoppa!—Leemiso 13:20 nabbaba.

3. (a) Mino ammanoy deꞌiyo asatubaa Geeshsha Maxaafaappe xannaꞌiyoogan waani goꞌettiyoo? (b) Nuuni beꞌana oyshati awugeetee?

³ ‘Xilloti hayquwaappe denddiyo’ wode nuuni etaara keehi dabbotanaagee erettidaagaa. (Oos. 24:15) Geeshsha Maxaafay etabaa yootiyo, mino ammanoy deꞌiyo asatubaa xannaꞌiyoogan ha wodiyankka goꞌettana danddayoos. Waanidi? Kiitettida PHawuloosi, “Xoossai immana giidoogaa ammanuwaaninne genccan laattiyaageetu mala [gidite]” yaagidi nuuni oottana bessiyaabaa yootiis. (Ibr. 6:12) Mino ammanoy deꞌiyo asatubaa xannaꞌiyoogaa doommiyo wode, PHawuloosi giidobaappe ane amarida oyshaa oychoos: Ammano giyoobi aybee, qassi hegee nuussi koshshiyoy aybissee? Nuuni Geeshsha Maxaafan etabay odettido, ammanettida asatu leemisuwaa waati kaallana danddayiyoo?

4. Asay ammanuwaa aybidan qoppii, qassi eta qofay bala gididoy aybissee?

⁴ Ammanoy keehi ufayssiya eeshsha; qassi nuuni ha maxaafan etabaa xannaꞌana asati ubbay xoqqu ootti xeellidoba. Ha wodiyan daro asay tumu ammanoy aybakko erenna; eti hegee naqaashi baynnabaa coo ammaniyoogaa giidi qoppoosona. SHin eta qofay bala. Ammanoy eri baynnan coo ammaniyoogaa woy nuussi siyettiyaaba xalla gidenna; qassi naqaashi baynnabaa ammaniyoogaa xallakka gidenna. Eri baynnan coo ammaniyoogee qohiyaaba. Nuussi siyettiyaabay wodiyaappe wodiyan laamettana danddayees; ‘xalahetikka ammaniyoogeenne  yashshan kokkoriyoogee’ odettido gishshawu, hegaa mala ammano xallay gidenna.—Yaaq. 2:19.

5, 6. (a) Nu ammanoy erissiyo, nuuni beꞌana danddayenna naaꞌꞌubati aybee? (b) Nu ammanoy ay keenaa mino gidana koshshii? Leemisuwaa yoota.

⁵ Tumu ammanoy eri baynnan ammaniyoogaappe woy naqaashi baynnabaa coo ammaniyoogaappe keehi dumma. Ammanoy aybakko Geeshsha Maxaafay yootiyoobaa beꞌa. (Ibraawe 11:1 nabbaba.) Ammanoy nuuni beꞌana danddayenna naaꞌꞌubaa erissiyaaba gidiyoogaa PHawuloosi yootiis. Koyruwan, haꞌꞌi deꞌiyaaba gidikkokka nuuni “be7anau danddayennabaa” ammanoy erissees. Saluwan deꞌiyaabaa, hegeekka Xoossaa Yihoowa, a Naꞌaa woy saluwan eqqida Kawotettaa nu ayfiyan beꞌana danddayokko. Naaꞌꞌanttuwan, ammanoy polettiichibeennabaa, hegeekka, ‘demmana giidi ufayssan naagi uttidobaa’ erissees. Nuuni Xoossaa Kawotettay matan ehaana ooratta alamiyaa haꞌꞌi beꞌana danddayokko. Hegaa giyoogee ayfiyan beettenna, deꞌiyaabaanne hidootan naagiyoobaa nuuni naqaashi baynnan ammanoos giyoogee?

⁶ Mule hegaadaana gidenna! PHawuloosi nu ammanoy mino gidiyo gaasuwaa yootiis. I ammanoy ‘ammanttiyaagaa’ gidiyoogaa yootiis; i ha sohuwan goꞌettido qaalay asay beni ‘wuliyaa woraqatawu’ goꞌettiyo qaala. Issi asi neeyyo keettaa immana koyidabadan qoppa. I neeyyo wuliyaa woraqataa immiiddi, “Hagee ne keettaa” gaana danddayees. I neeni he woraqataa bollan deꞌana gibeennaagee qoncce; neeni he wuliyaa woraqataa ekkikko, he keettaa ekkadasa giyoogaa. Hegaadankka, nu ammanuwaa minttiya naqaashati keehi mino gidiyo gishshawu, nu ammanoykka hegaadan mino.

7. Tumu ammanoy aybin aybin qonccii?

⁷ Hegaa gishshawu, tumu ammanoy nu deꞌuwan beꞌidobaappe denddidaagan wozanappe ammanettiyoogaanne aynne sirennaagaa bessees; hegee Xoossaa Yihoowan muleera zemppiyoogaa bessiyaaba. Ammanoy nuuni a nu siiqo Aawadan xeellanaadaaninne i gelido qaala ubbay polettanaagaa ammanettanaadan oottees. SHin tumu ammanuwaara gayttidaagan nuuni oottana bessiyaabay deꞌees. Paxa deꞌiyaabaadan i hayqqenna mala issi issibaa oottana bessees. A oosuwan bessana koshshees; hegee xayikko hayqqees.—Yaaq. 2:26.

8. Ammanoy keehi koshshiyaaba gididoy aybissee?

⁸ Ammanoy keehi koshshiyaaba gididoy aybissee? PHawuloosi ammanttiya zaaruwaa yootiis. (Ibraawe 11:6 nabbaba.) Nuuyyo ammanoy baynnaba gidikko, Yihoowakko shiiqanawunne a ufayssanawu danddayokko. Hegaa gishshawu, asaa naatuyyo i halchido gitabaa polanawu, hegeekka saluwan deꞌiya Aawaa Yihoowakko eti shiiqanawunne a bonchanawu ammanoy koshshiyaaba.

9. Nuuyyo ammanoy koshshiyoogaa Yihooway eriyoogaa bessiyaabay aybee?

⁹ Yihooway nuussi ammanoy ay keena koshshiyaakko eriyo gishshawu, nuuni ammanuwaa  waati dichana danddayiyaakkonne waati bessana danddayiyaakko tamaarissanawu leemiso gidiya asatubaa xaafissiis. Qassi leemiso gidiya, ammanettida attuma asati sintta xeera gididi kaalettanaadan oottiyoogan gubaaꞌiyaa anjjiis. A Qaalay, “Etaagaadan ammanite” yaagees. (Ibr. 13:7) I harabaakka immiis. PHawuloosi beni deꞌida markkatubaa woykko ammanuwan leemiso gidiya, “shaaraadan” daro gidida, asatubaa xaafiis. (Ibr. 12:1) Yihoowayyo ammanettidi deꞌida asati PHawuloosi Ibraawe shemppo 11n yootidoogeetu xalla gidennaagee qoncce. Ammanoy baynna ha alamiyan nuuyyo leemiso gidiya, mino ammanoy deꞌiyo attumaageetunne maccaageetu, yelagatunne cimatu taarikiyaa Geeshsha Maxaafay yootees.

10. Geeshsha Maxaafan etabay odettido ammanettida asatu leemisuwaa kaallanawu buzo xinaatee nuna waati maaddana danddayii?

¹⁰ Issi asa loytta erennaba gidikko a milatana danddayakka. Neeni ha maxaafaa xannaꞌiyo wode, mino ammanoy deꞌiyo ha asata neeni loytta eranaadan maaddanawu keehi pilggi giigissidoba gidiyoogaa akeekana. Mino ammanoy deꞌiyo ha asatubaa neenikka ayssi pilggikkii? Buzo xinaatiyaa wode xannaꞌanawu maaddiya xuufeta goꞌettada Geeshsha Maxaafaa loytta pilgga. Neeni xannaꞌiyoobaa yereriyo wode, Geeshsha Maxaafay yootiyo he taarikee polettido sohuwaanne hanotaa qoppa. Yan deꞌiyaabadan he heeraa beꞌa, siyettiyaabaa siya, qassi sawiyaabaykka nena sawo. Qassi ubbaappe aaruwan, he taarikiyan odettida asatuyyo aybi siyettidaakko akeekanawu mala. He ammanettida asatu hanotaa loytta akeekiyo wode, neeni etaara loytta meezetana; ubba issoti issoti neeni beniisappe eriyo lagge mala gidana.

11, 12. (a) Abrahaamanne Saaro neessi mata laggedan xeellanawu waatana danddayay? (b) Haanni, Eelaasa woy Sameela leemisuwaappe waana goꞌettana danddayay?

¹¹ Neeni eta loytta eriyo wode, eta leemisuwaa kaallanawu koyana. Leemisuwawu, neeni kase ootta erenna issibaa oottanaadan shoobettidabadan qoppa. Neeni kaseegaappe loytta haggaazanaadan Yihoowa dirijjitee shoobbidabadan qoppa. Geella mishiraachuwaa yootiyaageeti keehi koshshiyo heeri baanaadan woy neeni kase meezetabeenna woy dosenna ogiyan sabbakanaadan shoobettana danddayaasa. Neeni he oosuwaabaa wotta denttada qoppiyo wodenne hegaabaa woossiyo wode, Abrahaama leemisuwaa yereriyoogee geella maaddaneeshsha? Inne Saara Uuran deꞌiyo ishalo deꞌuwaa agganawu eeno giido gishshawu, keehi anjjettidosona. Neeni eta leemisuwaa kaalliyo wode, eta kaseegaappe loytta eriyoogaa akeekana danddayaasa.

¹² Qassi, neeyyo lagge gidida uri ne bolli iitabaa oottin neeni keehi azzaniyaaba, ubba shiiquwaa biyoogaappe son takkiyoogee loꞌꞌo gaada qoppiyaaba gidikko shin? Haanni leemisuwaa qoppiyaaba, qassi Piniina iitabaa oottishinkka  Haanna Yihoowayyo goynniyoogaa aggabeennaagaa qoppiyaaba gidikko, neeni loꞌꞌobaa kuuyana danddayaasa; hegee qassi neeni Haanno loꞌꞌo laggedan xeellanaadan oottana danddayees. Hegaadan, neeni pattennabadan qoppiyaaba gidikko, Eelaasa gakkida metuwaanne Yihooway a minttettanawu oottidobaa xannaꞌiyo wode, Eelaasi neeyyo loꞌꞌo lagge mala gidana danddayees. Qassi kanddoy iita gidido, issippe tamaariya naati iitabawu denttettiyo yelagati, Eela naati beeta maqidasiyan iitabaa oottishinkka suurebaa oottida Sameelabaa xannaꞌidi, a banttawu mata laggedan xeellana danddayoosona.

13. Geeshsha Maxaafan etabay odettido asatu leemisuwaa kaalliyoogee ne ammanoy shugo gidiyoogaa bessiyaabee? Qonccissa.

¹³ Geeshsha Maxaafan etabay odettido hegaa mala asatu leemisuwaa kaalliyoogee ne ammanoy shugo gidiyoogaa bessiyaabee? Akkay! Yihoowa Qaalay mino ammanoy deꞌiyo asatu leemisuwaa nuuni kaallanaadan minttettiyoogaa hassaya. (1 Qor. 4:16; 11:1; 2 Tas. 3:7, 9) Qassi nuuni ha maxaafan etabaa xannaꞌana asatuppe amaridaageeti banttappe kase deꞌida asatu leemisuwaa kaallidaageeta. Leemisuwawu, ha maxaafan SHemppo 17n ibay qonccido Mayraama haasayidobay, Haanna kase yootidobaappe ekettidaba gidiyoogee erettidaagaa; a Haanno leemisodan xeellidoogee qoncce. Hegee Mayraami ammanoy mino gidennaagaa bessiyaabee? Akkay! Ubba Haanni leemisoy, Mayraama Xoossaa Yihoowa sinttan keehi nashettanaadan oottiya ammanoy deꞌiyooro gidanaadan maaddiis.

14, 15. Ha maxaafan deꞌiya issi issibay aybee, qassi hegaa waati loytti goꞌettana danddayiyoo?

¹⁴ Ha maxaafay giigidoy ne ammanoy mino gidanaadan maaddanaassa. Hagan deꞌiya issi issi qofay Wochiyo Keelan “Etaagaadan Ammanite” yaagiya huuphe yohuwan kiyida qofaappe ekettiis. Qassi tobbanawunne oosuwan peeshshiyo ogiyaa qoppanawu maaddiya oyshati ha maxaafan deꞌoosona. Keehi loꞌꞌiyaanne hanotaa loytti qonccissiya daro misileti ha maxaafan gujettidosona; qassi kase maxeetiyan deꞌiyaageetu yesoynne puulay gujjiis. Hara keehi maaddiyaabay, leemisuwawu wodiyaa malaataynne karttaykka deꞌees. Etaagaadan Ammanite giyo ha maxaafay buzo xinaatiyan, so asaa xinaatiyaaninne gubaaꞌiyan xannaꞌanawu giigiis. Daro keettaa asay hagan deꞌiya taarikiyaa issippe nabbabiyoogankka ufayttana danddayees.

¹⁵ Ha maxaafay Yihoowayyo ammanettidi oottida asatuugaadan neeni ammananaadan maaddana mala amottoos. Qassi neeni saluwan deꞌiya ne Aawaa Yihoowakko kaseegaappe aaruwan shiiqanaadaaninne ne ammanoy minnanaadan maaddanaadankka amottoos!