MAˈORI giyo zaree ano abbaa kanttidi shaˈan qoodettiya kilo meetiriyaa biidi Niwu Ziilande biittan qatoosappe 800 laytta heera gidees. He heeray eti aggidi biido hombbiyaa Polenezhiyaa haruuruwaappe keehi dummatiyoogaa akeekidosona. He sohuwan deree, deriyaappe loddan loddan solddiya kuurettida shachay, qassi bilbboynne shachay deˈees. Ichashu xeetu laytta gidiya wodiyaappe guyyiyan, Awurooppan haahosaappe hara sheeshshati deˈanawu yaa biidosona. Ha wodiyan Niwu Ziilande asaappe dariya baggay Anglo Saksene wogaanne Polenezhiyaa wogaa kaallees. He biittaa asaappe xeetaappe 90 kushe gidiyaagee kataman deˈees. Biittaayyo tohossa baggaara deˈiya katamatu ubbaappe Welngtene katamay dummatanaadan oottiyaabay deˈees.

Niwu Ziilande haahuwan deˈiya biitta gidikkonne, yan keehi loˈˈiya darobay deˈiyo gishshawu, layttan layttan  heezzu miiloone gidiya asay he biittaa beˈanawu biyoogee garamissiyaaba gidenna.

Niwu Ziilanden daro qommo doˈati, alamiyan harasan deˈiyaagaappe daro qommo paallana danddayenna kafoti deˈoosona. Qassi he biittay tuˈatara giyo 100 gidiya layttaa deˈana danddayiya, saˈaara gooshettiya zare mala meretay deˈiyo soho! Xanttiya doˈatuppe amarida wurkkaawurkko qommoti, qassi haattan deˈiya xanttiya huwel giyoonne dolfin giyo gita mole qommoti he biittan deˈoosona.

Yihoowa Markkati Niwu Ziilande biittan minnidi haggaaziyoogaa doommoosappe 120 laytta gidiis. Eti Polenezhiyaa qaala gidida Nyuwan qaalan, Raratangan, Samoˈaaninne Tongan giyo qaalata gujjin, 19 qaalan Geeshsha Maxaafaa tamaarissoosona.