Tumaa SHaakkada Era
Metuwaa
Darotoo asay asaa bala ogiyan akeekidi coo ixxees. Kaallidi deˈiya leemisota beˈa:
-
Ootissiya issoti issoti daro eraa, wolqqaa, woy akeekaa koshshiya oosota macca asay oottana danddayenna giidi bala ogiyan qoppoosona.
-
Awurooppan 500ppe 1500 M.Ln., haattaa ollan marzziyaa yeggidi harggee daranaadan oottoosona giidi Ayhudata wordduwan mootidosona. Naaze haaruwaa wode Ayhudata zaarettidikka eta sunttaa mooridosona. SHin haˈˈi qassi Jarmane biittan miishshaara gayttidaagan deˈoy iita gidanaadan oottidosona giidi mootidosona. Ha naaˈˈu gaasotuppe denddidaagan Ayhudata asay coo ixxees; ha wodiyan deˈiya hanotaykka hegaa bessees.
-
Daro asay bollan pacay deˈiyo uri ubbay azzanees woy hanqqettees giidi bala ogiyan ammanees.
Haysiyaa ammaniya asati bantta bala tuma milatissanawu leemisota woy worddo naqaashata yootoosona. Qassi eti banttanaara maayettokkona giidi qoppiyo oonanne ixxoosona.
Geeshsha Maxaafay yootiyo maaraa
“Eri bainna minotai lo77o gidenna.”—LEEMISO 19:2.
Ha xiqisiyaappe nuuni ay tamaariyoo? Nuuni tumu gididabaa erennan iitabaa kuuyoos. Nuuni tumu gididabaa aggidi worddobaa ammanikko, haratu bolli balan pirddana danddayoos.
Hara Asaabaa Tumaa Eriyoogee Maaddiyoy Aybissee?
Nuuni asaabaa tumu gididabaa loytti eriyo wode, harati etabaa yootana danddayiyo worddobaa ammanokko. Qassi issi citaa xeelliyaagan asay yootidobay tumubaa gidennan, bala gidiyoogaa nuuni akeekiyo wode, hara asaa xeelliyaagan nuuni siyidobaa eesuwan ammanokko.
Neeni Oottanabaa
-
Issi citan deˈiya asay iita gidiyoogaa asay yootana danddayees. SHin he citan deˈiya darotussi iita eeshshay baynnaagaa hassaya.
-
Issi citan deˈiya asaa xeelliyaagan neeni wurssa erennabay deˈana danddayiyoogaa hassaya.
-
Ammanettiyaasappe tumu gididabaa eranawu mala.
