Likkebaanne Balabaa: Neeni Doorana Koshshiyabaa
Likkebaanne balabaa xeelliyagan nuuni dooriyobay nu deˈoy ufayssiyagaa woy ufayssennaagaa gidanaadan oottana danddayees. Xoossaa Yihooway hegaa erees. Nuuni I kessido maarata kaallidi deˈanaadan I koyiyoy hegaassa.
Yihooway nuuni sarotettan ufayttidi deˈanaadan koyees.
“Taani GODAI, ne Xoossai, nena maaddiyaabaa tamaarissiyaagaa. Neeni baanau bessiya ogiyankka nena kaalettiyai tana. Neeni ta azazuwaa siyidabaa gidiyaakko, ne sarotettai shaafaa haattaadan goggana shin; ne xillotettaikka abbaa beetaadan hanana shin.”—Isiyaasa 48:17, 18.
Xoossay nuna Medhdhidaagaa gidiyo gishshawu, nuuni ay mala ogiyan deˈana koshshiyakko erees. I yootiyo kaaletoy nuna maaddiyagaa gidiyo gishshawu, nuuni hegaa kaallanaadan I shoobbees. Nuuni Xoossaa azazuwa kaallikko, ‘Nuuni dooriyobay loˈˈobaa kaalettennan agganeeshsha’ giidi hirggokko. Nuuni sarotettaanne ufayssaa demissiya loˈˈobaa ubbatoo doorana.
Yihooway nuuni danddayennabaa oottanaadan oychchenna.
“Taani hachchi inttena azaziyo ha azazoi hegaa keena deexo gidenna; intteppe haahokka gidenna.”—Zaarettido Wogaa 30:11.
Likkebaanne balabaa xeelliyagan Xoossay kessido maaraa kaallidi deˈanawu, nuuni qoppiyobaaninne oottiyoban laamettana koshshees. Gidikkonne, Yihooway nuuni nu wolqqaappe aarobaa oottanaadan oychchenna. Ubbaappe aaruwan, I nuna Medhdhidaagaa gidiyogaadan, nu oottana danddayiyobaa erees. Qassi, nuuni Yihoowa loytti eriyo wode, ‘A azazoti deexo gidennaagaa’ akeekana.—1 Yohaannisa 5:3.
Yihooway I kessido maarata kaallidi deˈanawu dooriyageeta maaddanawu qaalaa geliis.
“Taani GODAI, ne Xoossai, ne ushachcha kushiyaa oiqqana. Nena, ‘Yayyoppa, taani nena maaddana’ [yaagays.]”—Isiyaasa 41:13.
Xoossay nuna maaddiyo gishshawu I kessido maarata kaallidi deˈana danddayoos. Minttettiyanne hidootaa yootiya ba Qaalaa Geeshsha Maxaafaa baggaara I nuna maaddees.
Kumetta saˈan deˈiya miilooniyan qoodettiyageeti Geeshsha Maxaafaa maarata kaallidi deˈiyogee eta deˈoy giiga gidanaadan oottidoogaa akeekidosona. Geeshsha Maxaafay yootiyo loˈˈo zoriya ayssi gujjada tamaarikkii? Miishsha qanxxennan jw.org saytiyan demmana danddayiyo Geeshsha Maxaafaappe giigida Merinawu Ufayttada Deˈa! giyo brooshuriya xannaˈiyogan doommana danddayaasa. He brooshuriyan ha timirtteti deˈoosona:
-
Geeshsha Maxaafay Nena Waati Maaddana Danddayii?
-
Geeshsha Maxaafay Ufayssiya Wodee Yaanaagaa Yootees
-
Geeshsha Maxaafay Yootiyobay Tuma Gaada Ammanana Danddayay?
Neeni Xoossaa Qaalaa, Geeshsha Maxaafaa pilggiyo wode, I wodee aadhdhiichchidoba gidennaagaa akeekana; I yootiyobay ‘haˈˈikka, meri merinawukka ammanttiyagaa.’ (Mazamure 111:8) Likkebaanne balabaa xeelliyagan Geeshsha Maxaafay yootiyo maarata kaallidi deˈiyogee aybippenne aadhdhiya deˈo. Gidikkonne, nuuni hegaadan deˈanaadan Xoossay wolqqanttenna. (Zaarettido Wogaa 30:19, 20; Yaasa 24:15) Hegee nuuni ubbay doorana koshshiyaba.
