Ha laytti kiyida Wochchiyo Keelaa loytta nabbabadii? Yaatikko, neeni kaallidi deꞌiya oyshata zaarana danddayiyakkonne beꞌa:

Yihooway maccaasaa bonchchiyogan nuussi waani leemiso gidii?

I asa asappe shaakkenna; qassi attuma asaa maccaasappe aattidi xeellenna. Xoossay macca asay yootiyobaa siyees; qassi etawu siyettiyabaynne eta metoy A qofissees. Hegaa bollikka, I eti A oosuwa oottanaagaa ammanettees.—w24.01, sinttaa 15-16.

“Hegaa mala asaara zuppetoppite” giya Efisoona 5:7n deꞌiya zoriya waati oosuwan peeshshana danddayiyoo?

Xoossay kessido maarata azazettanawu metootanaadan oottiya asatuura nuuni laggetennaadan kiitettida Phawuloosi nuna zoriis. He asati nunaara issisan gayttidi wodiya aattiyageetu xalla gidennan, sooshal miidiyan gayttiyageetakka gidana danddayoosona.—w24.03, sinttaa 22-23.

Nuuni naagettana koshshiyo worddo odoti awugeetee?

Nu ishantti woy michchontti yootiyo tumakkonne erettibeenna oduwappe, qassi nu erenna asaynne tumaa eranawu koyiyaba milatiya kaddidaageeti nuuni oychchennan kiittiyobaappe naagettana koshshees.—w24.04, sinttaa 12.

Sadoomanne Gamooran qassi Bashsha Haattan hayqqida asaanne Kawuwa Solomona bolli Yihooway waati pirddanaakko nu eriyobaynne erennabay aybee?

Yihooway eta merinawu xayssanawu kuuyidaakkonne nuuni erokko. Gidikkonne, I ubbabaa eriyogaanne A maarotay gita gidiyogaa nuuni eroos.—w24.05, sinttaa 3-4.

Xoossay ‘Zaallaa’ geetettidoogee nuuni ay ammanettanaadan oottii? (Zaa. 32:4)

Yihoowa baqati attiyosaa oottana danddayoos. I ba gelido qaalaa ubbatoo naagiyo gishshawu ammanettiyagaa. Qassi A eeshshaynne halchchoy laamettenna gishshawu I qaxxennaagaa.—w24.06, sinttaa 26-28.

Ooratta galchchaa meezetanaadan nena aybi maaddana danddayii?

Yihoowan ammanetta; I kase ba ashkkarata maaddidoogaadan nenakka maaddana. Haꞌꞌi neeni deꞌiyo galchchaa kaseegaara geeddarssoppa. Ne ooratta galchchan minna ootta; qassi haratuura laggetanawu baaxeta.—w24.07, sinttaa 26-28.

Maatiyosa shemppo 25n odettida heezzu leemisoti ay qonccissiyonaa?

Dorssatubaanne deeshshatubaa yootiya leemisoy ammanettidi deꞌana koshshiyogaa qonccissees. Cinccanne cincca gidenna geelaꞌotu leemisoy giigettidinne beegottidi naagana koshshiyogaa qonccissees. Taalanttiyabaa yootiya leemisoy minni oottana koshshiyogaa qonccissees.—w24.09, sinttaa 20-24.

Solomoni keexxido Xoossaa garuwa baranddaa geesay ay keenee?

Beni wode, kushiyan xaafettida amarida xuufeti 2 Hanidabaa Odiya 3:4n baranddaa geesay “120 wara” woy 53 meetire gidiyogaa yootoosona. Shin ammanttiya hara xuufeti baranddaa geesay “20 wara,” woy 9 meetire gidiyogaa yootoosona. Hagee he garuwa godaa gomppaara maayettiyaba milatees.—w24.10, sinttaa 31.

Galchchawu oottiyagee ‘issi machchee xalaalay deꞌiyogaa gidana bessees’ giyogee woygiyogee? (1 Xim. 3:12)

I ekkana danddayiyoy issi maccaasa xalaala gidiyogaanne I pokkobaa oottana koshshennaagaa qonccissees. Hegaa bollikka, I hara maccaasaa siiqana bessenna.—w24.11, sinttaa 19.

Yohaannisa 6:53n odettidabay Godaa Kahuwa wode oottanabaa qonccissenna giyoy aybissee?

Yohaannisa 6:53y Yesuusa ashuwa maananne A suuttaa uyana koshshiyogaa yootees. Yesuusi an ammanana koshshiya Ayhudatussi 32 M.Ln., Galiilan he qofaa yootiis. Shin Godaa Kahuwa Baalay issi layttaappe simmin Yerusalaamen doomettiis. He wode Yesuusi saluwan aara kawotana asatussi yootiis.—w24.12, sinttaa 10-11.