Xoossaa garuwan deˈiya Geeshsha sohuwakko geliyosan barandday deˈees. Inggilizettuwan giigida 2023​ppe kase kiyida Ooratta Alamiya Geeshsha Maxaafaa Birshshettan qonccidaagaadan, “Xoossaa garuwa geliyosan deˈiya baranddaa gomppay 20 wara; A gomppay Xoossaa garuwa gomppaara issi mala; qassi A geesay 120 wara.” (2 Odi. 3:4) Hara birshshettatikka baranddaa geesay “120 wara” woy 53 meetire gidiyogaa yootoosona!

Shin Inggilizettuwan giigida 2023n kiyida Ooratta Alamiya Birshshettay Solomoni keexxido Xoossaa garuwa baranddaa geesay “20 wara,” woy 9 meetire keenaa aduqqiyogaa yootees. a Hegaadan laammanaadan oottida amarida gaasota beˈa.

Baranddaa geesay ay keenakko 1 Kawotu Maxaafaa 6:3n odettibeenna. Ha xiqisiya xaafida Ermmaasi baranddaa gomppaanne zananaabaa yootiisippe attin, A geesaabaa yootibeenna. Yaatidi I Abbaa sayniya, tammu gaareta, naasiya seerissidi medhdhido baranddan eqqida naaˈˈu tuussatubaa gujjin, Xoossaa garuwabaa qonccissiya darobata kaalliya shemppuwan yootiis. (1 Kaw. 7:15-37) He baranddaa geesay Xoossaa garuwappe aadhdhidi 50 meetiriyappe aduqqiyaba gidiyakko Ermmaasi A geesaa yootibeennay aybissee? Daro xeetu layttaappe simminkka, Ayhudatu taarikiya eranchchati he barandday Solomoni keexxido Xoossaa garuwappe aduqqennaagaa yootidosona.

Eranchchati Xoossaa garuwa goday 120 wara gidida baranddaa kaafidoogaa siroosona. Beni wode Gibxxen deˈiya garuwa penggetuugaadan, adussa tuussaynne eta bolli wottiyo massi giigissido shuchchay garssa heeran aakkikkokka xeeran xuummees. Shin Solomoni keexxido Xoossaa garoy hegaappe dummatees. Eranchchati Solomoni keexxido garuwa godaa gomppay 6 warappe, woy 2.7 meetiriyappe aadhdhennabadan qoppoosona. Yaatiyo gishshawu keexuwa halchchuwabaa yootiya taarikiya xannaˈida Tedor Businkki hagaadan giis: “[Xoossaa garuwa geliyosaa] godaa gomppay hagaa keena gidikko, baranddaa geesay 120 wara [aduqqana] danddayenna.”

Duuqqi xaafiyageeti 2 Hanidabaa Odiya 3:4 xaafiyo wode balennan aggokkona. Beni wode, kushiyan xaafettida amarida xuufeti ha xiqisiyan “120 wara” giikkokka, koyro xeetu layttaa Aleksandrnes Kodekisiyanne usuppuntta xeetu layttaa Ambrosanes Kodekisiya mala ammanttiya hara xuufeti hegee “20 wara” gidiyogaa yootoosona. Kushiyan xaafiyagee “120 wara” giidi balana danddayiyoy aybissee? “Xeeta” qassi “wara” giyagawu goˈettiyo Ibraawetto qaalay issi mala. Yaaniyo gishshawu kushiyan xaafiyagee “wara” giyogaa aggidi “xeeta” gaana danddayees.

Nuuni Solomoni keexxido Xoossaa garuwabaa loytti akeekanawunne hegaa misiliya suure giigissanawu baaxetikkokka, nuuni qoppana koshshiya waannabay ha garoy gita gidida Xoossaa ayyaanaa garuwawu eesho gidiyogaa. Yihooway ba ashkkarati ubbay A garuwan ayyo goynnanaadan shoobbido gishshawu nuuni keehi galatoos!—Ibr. 9:11-14; Ajj. 3:12; 7:9-17.