Yihoowa Ashkkaraa—‘Nu Mooruwaa Gishshau Cadettidaagaa’

“I nu mooruwaa gishshau, cadettidi masunxxiis; nu nagaraa gishshaukka shocettidi liiqiis. . . . a masunttan nuuni paxida.”—ISIYAASA 53:5.

1. Kiristtoosa Hayquwaa Hassayiyo Baalaa bonchiyo wode nuuni ay qoppana koshshii? Nuuni hegaa oottanaadan maaddiya hiraagay awugee?

NUUNI Kiristtoosa hayquwaa bonchiyoy, a hayquwaa, qassi a hayquwaaninne dendduwan polettiya ubbabaa hassayanaassa. Ha Baalay Yihooway ubbabaa haariyo maatay qonccanaagaa, a sunttay anjjettanaagaanne asaa naatu atotettaa gujjin, a halchoy polettanaagaa nuna hassayissees. Isiyaasa 53:3-12n deˈiyaagaadan Kiristtoosa yarshshuwaanne hegee poliyoobaa loytti qonccissiya hara hiraagay Geeshsha Maxaafan deˈenna gaana danddayettees. Isiyaasi, Xoossaa ashkkaray waayettanaagaa kasetidi yootiis; qassi Kiristtoosa hayquwaabaanne a hayqoy ayyaanan tiyettida a ishanttussinne ‘hara dorssatussi’ demissiyo anjjuwaabaa aahuwan qonccissiis.—Yohaannisa 10:16.

2. Isiyaasa hiraagay ay qonccissii? Hegee nuuni waananaadan oottii?

² Yihooway Ba doorido Ashkkaray hayqqana gakkanaashin paacettidikka ammanettidaagaa  gidanaagaa, Yesuusa yeletaappe 700 layttaa kasetidi Isiyaasi hiraagaa yootanaadan ba ayyaanan denttettiis. Hegee, Yihooway ba Naˈay ammanettiyaagaa gidiyoogan keehippe ammanettiyoogaa qonccissees. Ha hiraagaa pilggiyo wode, nu wozanay galatan kumananne nu ammanoykka minnana.

“Karettiis;” Qassi ‘Bonchettibeenna’

3. Ayhudati Yesuusa mokki ekkana koshshiyoy aybissee? SHin eti a waatidonaa?

³Isiyaasa 53:3 nabbaba. Xoossaayyo mexi issi Naˈay ba Aawaa matan oottiyoogan demmiyo ufayssaa aggidi, asaa naata nagaraappenne hayquwaappe ashshanaassi ba shemppuwaa yarshshanau saˈaa yiidoogee ayyo woygiyoogaakko ane qoppa! (Piliphphisiyuusa 2:5-8) A yarshshoy nagaraa muleera atto giissanau halchettiis; Muuse Higgiyan yarshshiyo mehiyaa yarshshoy hegau eesho xalla gidiis. (Ibraawe 10:1-4) Haray attikko qaalaa gelido Masee yaanaagaa naagiya Ayhudati a mokki ekkanaunne bonchanau bessennee shin? (Yohaannisa 6:14) Hegaappe dumma hanotan, Isiyaasi kasetidi yootidoogaadan Ayhudati Kiristtoosa ‘karidosonanne’ ‘bonchibookkona.’ Kiitettida Yohaannisi: “Baageetukko yiis; shin aageeti a shiishshi ekkibookkona” yaagidi xaafiis. (Yohaannisa 1:11) Kiitettida PHeexiroosi: ‘Nu aawatu Xoossay, intte aatti immidoogaa PHilaaxoosi birshshanau qoppi uttidaashin, intte a sinttan, “Nuuni a erokko” giido ba Naˈaa Yesuusa bonchchiis. SHin intte geeshshaanne xilluwaa, “Nuuni a erokko” giideta’ yaagidi Ayhudatussi yootiis.—Oosuwaa 3:13, 14.

4. Yesuusi harggiyaappe shaahetti erennay ayba ogiyaanee?

⁴ Yesuusi ‘harggeppe shaahetti erennaagaakka’ Isiyaasi kasetidi yootiis. Yesuusi saˈan haggaaziyo wode issi issitoo daafuriis shin, i sahettidoogaa bessiyaabi aybinne baawa. (Yohaannisa 4:6) Gidikkokka, i mishiraachuwaa sabbakido asaa harggiyaa loyttidi erees. Etau qarettidi darota pattiis. (Marqqoosa 1:32-34) Yesuusi hegaadan oottiyoogan: “I tumu nu harggiyaa bau ekkiis; qassi nu azzanuwaakka tookkiis” yaagiya hiraagaa poliis.—Isiyaasa 53:4a; Maatiyoosa 8:16, 17.

Xoossay Qaxxayiyoobadan Qofettiis

5. Ayhudatuppe daroti Yesuusa hayquwaa aybidan xeellidonaa? Hegee a waayiyaa yaa gujjidoy aybissee?

⁵Isiyaasa 53:4⁠b nabbaba. Yesuusa wode deˈiyaageetuppe daroti i waayettidonne hayqqido gaasuwaa eribookkona. Iita harggiyan qohettiyoogaa mala hanotan Xoossay a qaxxayiyaabadan qoppidosona. (Maatiyoosa 27:38-44) Yesuusi Xoossaa cayiis giidi Ayhudati mootidosona. (Marqqoosa 14:61-64; Yohaannisa 10:33) Yesuusi nagaranchakka gidenna; Xoossaakka cayibeenna. SHin, i ba Aawaa keehippe siiqiyoogaa akeekiyo wode, Xoossaa cayadasa giidi woranaagaa qoppiyoogee, i Yihoowa Ashkkara gidiyoogaadan a waayiyaa yaa gujjiyaaba. Gidikkokka, i Yihoowa sheniyaa polanau koyiis.—Maatiyoosa 26:39.

6, 7. Yihooway ammanettida ba Ashkkaraa qohidoy ayba ogiyaanee? Hegee Xoossaa ufayssidoy aybissee?

⁶ Isiyaasa hiraagay, Kiristtoosa Xoossay qaxxayiyoobadan asay qoppanaagaa yootiyoy aybissakko akeekana danddayoos; shin ‘Yihooway ba huuphe a qohiyoogan ufayttidoogaa’ hiraagay yootiyoogee garamissiyaaba. (Isiyaasa 53:10, NW) Yihooway: “Ta ashkkarai, ta shemppoi an ufaittiyoogee, taani dooridoogee hageeho” yaagido  gishshau, waanidi ‘a qohiyoogan ufayttana’ danddayii? (Isiyaasa 42:1) Hegee Yihoowa ufayssees gaana danddayiyoy ayba ogiyaanee?

⁷ Ha hiraagaa akeekanau, Yihooway ubbabaa haariyo maataa bolli Seexaanay oyshaa denttido wode, saluwaaninne saˈan deˈiya Xoossaa ashkkarati ubbay ammanettiyaageeta gidiyoogee sirissiyaaba oottidoogaa nuuni akeekana koshshees. (Iyyooba 1:9-11; 2:3-5) Yesuusi hayqqana gakkanaashin ammanettiyaagaa gidi deˈidi, Seexaanaa mootuwau bessiya zaaruwaa immiis. Yaatiyo gishshau, Yihooway Kiristtoosa a morkketi woranaadan paqqadidaba gidikkonne, ba doorido Ashkkaray hayqqiyoogaa beˈiyo wode keehippe azzanidoogee sirissenna. Gidikkokka, ba Naˈay polo ogiyan ammanettidaagaa gididoogaa beˈiyoogee Yihoowa keehippe ufayssiis. (Leemiso 27:11) Hegaa bollikka, ba Naˈaa hayqoy bantta nagaraappe simmiya asaa naatuyyo demissiyo anjjuwaa eriyoogee Yihoowa keehippe ufayssiis.—Luqaasa 15:7.

‘Nu Mooruwaa Gishshau, Cadettiis’

8, 9. (a) Yesuusi ‘nu mooruwaa gishshau cadettidoy’ ayba ogiyaanee? (b) PHeexiroosi hegee polettidoogaa waatidi qonccissidee?

⁸Isiyaasa 53:6 nabbaba. Nagarancha gidida asaa naati Addaameppe laattido harggiyaappenne hayquwaappe kiyanau koyiyoogan ogiyaa balida dorssa mala gididosona. (1 PHeexiroosa 2:25) Polo gidenna gishshau, Addaame zerettaappe ooninne Addaameppe halidabaa wozanau danddayenna. (Mazamure 49:7) Gidikkokka, ba gita siiquwan, “GODAI nu ubbai naaqqido naaquwaa a bolli,” ba alˈˈo Naˈaanne ba doorido Ashkkaraa bolli wottiis. Kiristtoosi ‘nu mooruwaa gishshau cadettanaunne nu nagaraa gishshaukka shocettidi liiqanau’ eeno giidi, nu nagaraa tookkidi nu gishshau mittaa bolli kaqettidi hayqqiis.

⁹ Kiitettida PHeexiroosi: “Xoossai inttena xeesidoogee hegaa gishshassa; aissi giikko, Kiristtoosi intteyyo waayettiis; intte a kaallana mala, intteyyo leemiso gidiis. Nuuni nagarau haiqqidi, xillotettau de7ana mala, Kiristtoosi ba huuphen ba ashuwan nu nagaraa [mittan] tookkiis” yaagidi xaafiis. Kaallidi, PHeexiroosi Isiyaasa hiraagaappe: “Intte a masunttan paxideta” yaagiyaagaa gujjiis. (1 PHeexiroosa 2:21, 24; Isiyaasa 53:5) PHeexiroosi gujjidi: “Kiristtoosi nuna Xoossaakko efaanau, baayyo xillo gidiiddi, makkalanchchatu gishshau, issitoo ubbaa nagarau haiqqiis” yaagidoogaadan, hegee nagaranchati Xoossaara dabbotanaadan ogiyaa dooyiis.—1 PHeexiroosa 3:18.

“SHukkanau Efiyo Dorssaadan Laagettiis”

10. (a) Xammaqiya Yohaannisi Yesuusa woygidi qonccissidee? (b) Yohaannisa guussay bessiyaaba gididoy aybissee?

¹⁰Isiyaasa 53:7, 8 nabbaba. Xammaqiya Yohaannisi, Yesuusi baakko yiyaagaa beˈido wode, ba qaalaa xoqqu oottidi: “Xoossaa dorssai, sa7aa nagaraa xaissiyaagee, hageeho!” yaagiis. (Yohaannisa 1:29) Yohaannisi, Yesuusi dorssa gidiyoogaa yootiyo wode, Isiyaasi: “SHukkanau efiyo dorssaadan laagettiis” giidoogaa hassayennan aggenna. (Isiyaasa 53:7) Isiyaasi: “I ba shemppuwaa haiquwau aattidi immiis” yaagidi hiraagaa yootiis. (Isiyaasa 53:12) Kiristtoosa Hayquwaa Hassayiyo Baalay doomettido qammi Yesuusi ammanettida 11 kiitettidaageetussi: “Hagee daro  asaa nagarai atto geetettana gishshau gukkiya ta suuttaa [“malaatees,” NW]; ta suuttai ooratta maachchaa” yaagiis.—Maatiyoosa 26:28.

11, 12. (a) Yisaaqi yarshshettanau eeno giidoogee Kiristtoosa yarshshuwaabaa ay qonccissii? (b) Nuuni Kiristtoosa Hayquwaa Hassayiyo Baalaa bonchiyo wode, Gita Abrahaama gidida Yihoowabaa ay qoppana koshshii?

¹¹ Yisaaqaagaadan, Yesuusi Yihooway baassi giigissido yarshshiyo sohuwan yarshshettanau eeno giis. (Doomettaabaa 22:1, 2, 9-13; Ibraawe 10:5-10) Yisaaqi yarshshettanau eeno giidaba gidikkonne, yarshshuwaa shiishshanau koyidaagee Abrahaama. (Ibraawe 11:17) Hegaadan, Yesuusi hayqqanau eeno giidaba gidikkokka, wozoy shiiqana ogiyaa qofaa qachidaagee Yihoowa. Xoossay ba Naˈaa yarshsho oottidoogee i asaa naata wozanappe siiqiyoogaa bessees.

¹² Yesuusi ba huuphen: “Xoossaa Na7aa ammaniya ubbai merinaa de7⁠uwaa ekkanaappe attin, xayenna mala, Xoossai ha sa7aa keehi siiqido gishshau, ba mexi issi Na7aa immiis” yaagiis. (Yohaannisa 3:16) Kiitettida PHauloosi: “Nuuni biron nagaranchcha gididi de7⁠ishin, Kiristtoosi nu gishshau haiqqiis; hegee Xoossai nuna ai keenaa siiqiyaakkonne a siiquwaa erissees” yaagidi xaafiis. (Roome 5:8) Yaatiyo gishshau, Kiristtoosa hayquwaa hassayiyoogan a bonchiyaaba gidikkonne, wozoy shiiqana ogiyaa qofaa qachidaagee Gita Abrahaama, Yihoowa gidiyoogaa mule dogana koshshenna. Nuuni Kiristtoosa Hayquwaa Hassayiyo Baalaa bonchiyoy Yihoowa galatanaassa.

Ashkkaray “Darota Xillissana”

13, 14. Yihoowa Ashkkaray ‘darota xillissidoy’ ayba ogiyaanee?

¹³Isiyaasa 53:11, 12 nabbaba. Yihooway ba doorido ashkkaraa xeelliyaagan: “Ta xillo ashkkarai ba eratettan darota xillissana” yaagiis. Ayba ogiyan? Paydo 12 wurssettay nuuni hegau zaaruwaa demmanaadan maaddees. I [Ashkkaray] “mooranchchatuyyookka gaannatiis.” Addaame zerettay ubbay nagarancha woykko ‘moorancha’ gididi yelettiis; yaatiyo gishshau, eti ‘nagaray qanxxiyo miishshaa,’ giishin hayquwaa demmoosona. (Roome 5:12; 6:23) Yihoowaynne nagarancha asaa naati sigettiyoogee keehi koshshiyaaba. Yesuusi nagarancha asaa naatuyyo waanidi ‘gaannatidaakko’ Isiyaasa hiraagaa shemppuwaa 53y: “I qaxxayettidoogan, nuuni saruwaa demmida; a masunttan nuuni paxida” yaagidi ufayssiya ogiyan qonccissees.—Isiyaasa 53:5.

¹⁴ Kiristtoosi nu nagaraa tookkiyoogaaninne nu gishshau hayqqiyoogan ‘darota xillissiis.’ PHauloosi: “Xoossai koyidoogaadan, aani Xoossatetta mereta kumettai de7⁠ees. Yaatin Xoossai Kiristtoosa baggaara ubbabaa banaara sigettanau  yohuwaa qachchiis; ba Na7ai [mittaa] bollan gussido suuttan saluwaaninne sa7an de7⁠iya ubbabaa banaara sigettiis” yaagidi xaafiis.”—Qolasiyaasa 1:19, 20.

15. (a) PHauloosi yootido, ‘saluwan deˈiyaabati’ oonee? (b) Yesuusa ashuwaanne suuttaa leemisota ekkana danddayiyay o xallee? Aybissi?

¹⁵ Gukkida Kiristtoosa suuttan Yihoowara sigettida ‘saluwan deˈiyaabati,’ Kiristtoosaara saluwan haaranau xeesettida, ayyaanan tiyettida Kiristtaaneta. Saluwaa baanaadan “Xoossay xeesido” Kiristtaaneti ‘deˈuwaa demmanaadan xillo geetettidosona.’ (Ibraawe 3:1; Roome 5:1, 18) Yaatidi, Yihooway eta ayyaana naata oottidi ekkees. Eti saluwan deˈiya Kiristtoosa Kawotettan Kawonne qeese gididi ‘aara issippe laattiyaageeta’ gidiyoogaa geeshsha ayyaanay etau markkattees. (Roome 8:15-17; Ajjuuttaa 5:9, 10) Eti ayyaana Israaˈeela, “Xoossaa Israaˈeela” bagga gididi, Xoossay “ooratta maachchaa” maacettidoogeetun gujettidosona. (Ermmaasa 31:31-34; Galaatiyaa 6:16, NW) Eti ooratta maachaa yame gidiyoogaadan, Yesuusi: “Hagee inttessi gukkiya ta suuttan maacettida ooratta maachchaa” yaagido, burccukkuwan deˈiya zoˈo woyniyaa gujjin, Yesuusa ashuwaanne suuttaa leemisota ekkana danddayoosona.—Luqaasa 22:20.

16. ‘Saˈan deˈiyaabati’ aybee? Yihoowa xeelan eti xillo gidiyoy ayba ogiyaanee?

¹⁶ ‘Saˈan deˈiyaabati,’ saˈan merinaa deˈuwaa hidootay deˈiyo, Kiristtoosa hara dorssata. Yihooway doorido Ashkkaray, hageetikka Yihoowa xeelan xillo gidanaadan oottees. Eti Kiristtoosa wozuwaa yarshshuwan ammanidi, “bantta maayuwaa Dorssaa suuttan meeccidi” booxissido gishshau, Yihooway eta ayyaana naatudan gidennan, ba dabbo oottidi eti xillo gidiyoogaa qonccissees; etau ‘daro waayiyaappe’ attiyo maalaalissiya hidootaa immiis. (Ajjuutaa 7:9, 10, 14; Yaaqooba 2:23) Ha hara dorssati ooratta maachan deˈokkona; qassi etau saluwan deˈiyo hidootaykka deˈenna; hegaa gishshau, eti Yesuusa ashuwaanne suuttaa leemisotuppe ekkokkona; gidikkokka, bonchuwan he baalan beettoosona.

Galatay Ubbay Yihoowassinne A Ufayssiya A Ashkkaraassi Bessees!

17. Isiyaasa hiraagan Xoossaa Ashkkaraabaa yootiyaagaa xannaˈidoogee, Kiristtoosa Hayquwaa Hassayiyo Baalau qofan giigettanaadan nuna waatidi maaddidee?

¹⁷ Isiyaasa hiraagan Xoossaa ashkkaraabaa yootiyaagaa pilggidoogee, Kiristtoosa Hayquwaa Hassayiyo Baalaa bonchanau qofan giigettiyo loˈˈo ogee. Hegee, “nu ammanuwau huuphenne polo” gididaagaa akeekan xeellanaadan danddayissiis. (Ibraawe 12:2) Xoossaa Naˈay makkalancha gidennaagaa erida. Seexaanaagaappe dumma hanotan, i Yihooway Ubbaappe Bolla Godaa gidiyoogaa eriyo gishshau, appe tamaariyoogan ufayttees. Yesuusi saˈan haggaazido wodiyan, ba sabbakido asatuppe darota, asatettaaninne ayyaanan pattiyoogan etau qaretaa bessidoogaa beˈida. I hegaadan oottiyoogan, Mase Kawo gididi ooratta alamiyan “biittan suure pirddaa” essiyo wode oottanabaa bessiis. (Isiyaasa 42:4) I “kawotettatussi poo7⁠o” gididi Kawotettaabaa mishettidi sabbakido ogee, a kaalliyaageeti mishiraachuwaa saˈa yuushuwan mishettidi sabbakanaadan akeekissiyaaba.—Isiyaasa 42:6.

18. Isiyaasa hiraagay nu wozanay Yihoowanne ammanettida a Ashkkaraa galatiyoogan kumanaadan oottiyoy aybissee?

¹⁸ Isiyaasa hiraagay, Yihooway ba alˈˈo Naˈaa saˈaa kiittidi, nu gishshau waayettanaadaaninne hayqqanaadan oottido gita yarshshuwaabaa loytti akeekanaadankka oottiis. Yihooway ba Naˈay waayettishin beˈiyoogan gidennan, hayqqana gakkanaashin polo hanotan ammanettidaagaa gididoogaa beˈiyoogan ufayttiis. Seexaanay worddancha gidiyoogaa bessanaunne Yihoowa sunttaa bonchissanau, hegeekka, Yihooway ubbaappe bollaara haariyoogee bessiyaaba gidiyoogaa qonccissanau Yesuusi oottido ubbabaa akeekiyoogan, nuunikka Yihoowagaadan ufayttana koshshees. Hegaa bollikka, Kiristtoosi nu nagaraa tookkiisinne nu gishshau hayqqiis. Hegaadan oottiyoogan, guutta wude gidida, ayyaanan tiyettida ba ishanttinne hara dorssati Yihoowa xeelan xillo gidanaadan oottiis. Nuuni Kiristtoosa Hayquwaa Hassayiyo Baalaa bonchanau issippe shiiqiyo wode, nu wozanay Yihoowanne ammanettida a Ashkkaraa galatiyoogan kumanaadan amottoos.

Zaarettanau

• Yihooway ba Naˈay qohettidoogan ‘ufayttidoy’ aybissee?

• Yesuusi ‘nu mooruwaa gishshau cadettidoy’ ayba ogiyaanee?

• Yihoowa Ashkkaray ‘darota xillissidoy’ ayba ogiyaanee?

• Yihoowa Ashkkaraabaa yootiya hiraagaa xannaˈidoogee, ne qofaaninne ne wozanan Kiristtoosa Hayquwaa Hassayiyo Baalau giigettanaadan waatidi maaddidee?

[Oyshata]

[Sinttaa 29n deʼiya misiliyaa]

‘I karettiis; nuunikka a bonchibookko’

[Sinttaa 30n deʼiya misiliyaa]

“I ba shemppuwaa haiquwau aattidi immiis”

[Sinttaa 31n deʼiya misiliyaa]

“Hara dorssati” Kiristtoosa Hayquwaa Hassayiyo Baalan bonchuwan beettoosona