Naaˈˈantto Yelettiyoogaa—Hegaa Halchoy Aybee?

DAROTI issi uri merinaa atotettaa demmanau naaˈˈantto yelettanau bessees giidi ammanoosona. SHin Yesuusi naaˈˈantto yelettiyoogaa halchuwaa xeelliyaagan woygidaakko akeeka. I: “Ooninne naa77antto yelettana xayikko, Xoossaa kawotettaa be7anau danddayenna” yaagiis. (Yohaannisa 3:3) Yaatiyo gishshau, issi uri naaˈˈantto yelettana koshshiyoy atotettaa demmanaassa gidennan, Xoossaa Kawotettaa gelanaassa. Issoti issoti, ‘shin ha naaˈˈu qofati, giishin Xoossaa Kawotettaa geliyoogeenne atotettaa demmiyoogee issi mala woyto gidennee?’ giidi oychana danddayoosona. Issi mala woyto gidenna. Eta giddon deˈiya dummatettaa akeekanau, ane kasetidi “Xoossaa Kawotettaa” giyoogee aybakko beˈoos.

Kawotettay ayso. Yaatiyo gishshau, “Xoossaa Kawotettaa” giyoogee “Xoossaa ayso” giyoogaa. Geeshsha Maxaafay Yesuus Kiristtoosi, ‘asa naˈay,’ Xoossaa Kawotettaa Kawo gidiyoogaanne Kiristtoosaara issippe haariyaageeti deˈiyoogaa yootees. (Daaneela 7:1, 13, 14; Maatiyoosa 26:63, 64) Hegaa bollankka, kiitettida Yohaannisi beˈido ajjuutan Kiristtoosaara issippe haariyaageeti “qommo ubbaappe, dumma dumma biitta qaala ubbaappe, yara ubbaappenne zare ubbaappe” doorettidaageeta gidiyoogaanne eti ‘saˈaa haaranaagaa’ qonccissiis. (Ajjuutaa 5:9, 10; 20:6) Geeshsha Maxaafay gujjidikka, kawo gididi haariyaageeti “sa7aappe wozettida” 144,000 asati deˈiyo ‘amarida dorssa wude’ gididodoogaa qonccissees.—Luqaasa 12:32; Ajjuutaa 14:1, 3.

Xoossaa Kawotettay deˈiyoy awaanee? ‘Xoossaa Kawotettay’ “saluwaa kawotettaa”  geetettidikka xeegettiis; hegee Yesuusinne aara issippe haariyaageeti saluwan uttidi haariyoogaa bessees. (Luqaasa 8:10; Maatiyoosa 13:11) Yaatiyo gishshau, Xoossaa Kawotettay Yesuusinne asaa naatuppe doorettidaageeti issippe haariyo saluwaa ayso.

Yaatin, Yesuusi issi uri “Xoossaa Kawotettaa gelanau” naaˈˈantto yelettanau bessees giido wode, woyganau koyidee? Issi uri Kiristtoosaara saluwan haaranau naaˈˈantto yelettanau bessees gaanau koyiis. Qanttan qonccissanau, naaˈˈantto yelettiyoogaa halchoy asaa naatuppe amaridaageeta saluwaa haaruwau giigissanaassa.

Hanno gakkanau, naaˈˈantto yelettiyoogee keehippe koshshiyaaba, Xoossaappe imettiyaabanne asaa naatuppe amaridaageeta saluwaa haaruwau giigissanaassa gidiyoogaa beˈida. SHin issi uri waanidi naaˈˈantto yelettanau danddayii?

[Sinttaa 7n deʼiya misiliyaa qonccissuwaa]

Naaˈˈantto yelettiyoogaa halchoy asaa naatuppe amaridaageeta saluwaa haaruwau giigissanaassa

[Sinttaa 7n deʼiya misiliyaa qonccissuwaa]

Yesuus Kiristtoosinne asaa naatuppe doorettidaageeti Xoossaa Kawotettan issippe haaroosona