1 Geeshsha Maxaafan Ammanettiyoogaa Tamaara

“Xoossaa maxaafa ubban Xoossaa Ayyaanai de7ees. Qassi he maxaafati . . . tumatettaa tamaarissanau, balaa seeranau, mooruwaa [suurissanau] . . . maaddoosona.”—2 Ximootiyoosa 3:16, 17.

XUBE GIDIYAABAY AYBEE? Daroti Geeshsha Maxaafay asa era xallaa oyqqida maxaafa goosona. Issoti issoti Geeshsha Maxaafay yootiyo taarikee tuma gidenna goosona. Harati qassi Geeshsha Maxaafan deˈiya zoree goˈennaagaa woykko ha wodiyau maaddennaagaa goosona.

HE XUBIYAA WAATA XOONANA DANDDAYAY? Geeshsha Maxaafay ammanttiyaagaa gidiyoogaa woykko goˈˈiyoogaa siriya daroti, bantta huuphe Geeshsha Maxaafaa pilggibeennaageeta. Eti harati giidobaa zaarettidi goosona. Gidikkokka, Geeshsha Maxaafay: “Eeyya asi ubbabaa ammanees; shin cinccai akeekidi tanggees” yaagees.—Leemiso 14:15.

Harati giyoobaa coo ammaniyoogaappe, ha wodiyan huuphessa bagga Giriiken deˈiya, koyro xeetu layttan Beeriyaa giyoosan deˈida Kiristtaanetu leemisuwaa ayssi kaallikkii? Harati etau yootidobaa coo ammanidi ekkibookkona. Hegaappe, eti “‘PHauloosi giidoogee tumakkonne’ yaagidi, ubba gallassi Xoossaa maxaafata tamaariiddi” ekkidoogan erettoosona. (Oosuwaa 17:11) Geeshsha Maxaafay, Xoossaa Qaala gidiyoogaa neeni ammanettanaadan oottiya naaˈˈu gaasota ane qanttan beˈoos.

Geeshsha Maxaafay yootiyo taarikee tuma. Geeshsha Maxaafan odettida asatu sunttaanne sohuwaa xeelliyaagan, siriya asay Geeshsha Maxaafay ammanttennaagaa gidiyoogaa daro wodiyau yootiiddi takkiis. Gidikkokka, Geeshsha Maxaafan odettidabay tuma gidiyoogee darotoo qoncciis.

Leemisuwau, Isiyaasa 20:1n odettida, Asoore biittaa Kawoy Sarggooni deˈida asa gidiyoogaa issi wode eranchati siridosona. SHin 1840 heeran arkkiyolojistteti he kawuwaa keettay deˈido sohuwaa bookkidi demmidosona. Sarggooni Asooren kawotida erettida kawotuppe issuwaa gidiyoogee qoncciis.

Toochiyaageeti Yesuusi hayqqanaadan azazida, Rooma haaruwaa garssan ayssiya, PHenxxeniyaa PHilaaxoosi deˈida asa gidiyoogaa siridosona. (Maatiyoosa 27:1, 22-24) SHin 1961n, Israaˈeele biittan, Qiisaariyaa katamaa lanqqen PHilaaxoosa sunttaynne au deˈiya maatay xaafettido issi shuchay beettiis.

Geeshsha Maxaafaa tumatettaa xeelliyaagan, Xiqimita 25, 1999n kiyida, Yu Es Niyus end World Iripport geetettiya xuufee: “Arkkiyolojee Oorattanne Galˈˈa Maachan deˈiya waannatiya taarikee tuma gidiyoogaa maalaalissiya ogiyan shaakki eriis; hegeekka Israaˈeeletu mayzza aawata, Israaˈeeleti Gibxxeppe kiyidoogaa, Daawita zare gidida kawotanne Yesuusi saˈan deˈido wode asaa deˈuwaa xeelliyaagan waanna yohota akeekidoogaa gujjees” yaagiis. Geeshsha Maxaafan ammanettiyoogee arkkiyolojee demmidoban  baasettidaba gidana xayikkokka, Geeshsha Maxaafay taarikiyaara gayttidaagan yootiyo tuma gididabay Xoossaa ayyaanan xaafettida maxaafaappe neeni naagiyooba.

Geeshsha Maxaafan deˈiya, oosuwan peˈana danddayiya aadhida eray ubba qommo asaa goˈˈiyaagaa. Deˈuwan deˈiya, ayfiyan beettennabatinne eti harggiyaa kaalettiyoogee erettanaappe daro wodiyaa kasetidi, Geeshsha Maxaafay geeshshatettaara gayttidaagan ha wodiyankka keehippe goˈˈiya, oosuwan peˈiya zoriyaa yootees. (Wogaabaa 11:32-40; Zaarettido Wogaabaa 23:12, 13) Issoy issuwaa waati oyqqana koshshiyaakko Geeshsha Maxaafay yootiyo zoriyaa oosuwan peeshshiya so asay ufayttiyaagaa gidees. (Efisoona 5:28–6:4) Geeshsha Maxaafaa baaso siraataadan deˈiya asi, kaseegaappe aaruwan mino oosancha woykko bessiyaagaadan ootissiyaagaa gidana danddayees. (Efisoona 4:28; 6:5-9) Geeshsha Maxaafaa baaso siraataa oosuwan peeshshiyoogee nu payyatettaukka maaddees. (Leemiso 14:30; Efisoona 4:31, 32; Qolasiyaasa 3:8-10) Hegaadan oosuwan peˈana danddayiya zoree, nuuni nuna Medhidaagaappe naagiyooba.

DEMMANA WOYTOY AYBEE? Geeshsha Maxaafan deˈiya aadhida eratettay akeekay paccidoogeetakka erancha oottana danddayees. (Mazamure 19:7) Hegaa bollan, Geeshsha Maxaafan ammanettiyaaba gidikko, mino ammanuwaa demmanau kaalliya tangguwaa ekkanaadan hara maxaafi maaddana danddayenna hanotan nuna maaddana danddayees.

Gujo qofaa demmanau, Tumuppe Geeshsha Maxaafay Tamaarissiyoy Aybee? giya maxaafan, “Geeshsha Maxaafay Xoossaa Imota” giya shemppo 2 xeella. *

[Tohossa qofata]