Geeshsha Ayyaanaa—Abay Asau Kirqqi Giyoy Aybissee?

GEESHSHA AYYAANAY aybee? Hagee metenna oysha milatees; shin zaaro demmanau metana danddayees. PHaaphaasiyaa Benedikt 16tti Awusttiraaliyan shiiqida asaassi: “Geeshsha ayyaanaabaa shaakkidi eranaagee danddayettennaba milatees” yaagiis.

Geeshsha ayyaanay aybee? giya oyshaa xeelliyaagan issoy issuwaara moggenna daro qofay deˈees. Kaallidi deˈiyaageeti meeze gidida zaarotuppe amaridaageeta:

• Geeshsha ayyaanay Kiristtoosi erissiyo ashkkaratu giddon deˈiya, bolli deˈiyooba.

• Geeshsha ayyaanay Xoossay saˈan qoncciyoogaa bessiyaaba.

• Geeshsha ayyaanay Sillaasiyau heezzantto bolla.

Hegaadan ayssi kirqqi gii? Oyddantto xeetu layttaa M.Ln, issi issi haymaanootiyaa eranchati geeshsha ayyaanay Xoossaara issi likke gidida, bolli deˈiyooba giido wodeppe doommidi, hegee asau kirqqi giis. Gidikkokka, ha qofay Geeshsha Maxaafay tamaarissiyooba woykko beni Kiristtoosa kaallidaageeti tamaarissidoba gidenna. Niwu Kaatolik Inssaykiloppiidiyaa giyo maxaafay: “Xoossaa ayyaanaa bolli deˈiyoobadan Galˈˈa Maachay qonccissenna . . . Xoossaa ayyaanay Xoossaa wolqqa” yaagees. He maxaafay gujjidi: “Ooratta maachaa xiqisetuppe daroti Xoossaa ayyaanaa issi uradan gidennan, issibadan qonccissoosona; hegee geeshsha ayyaanaanne Xoossaa wolqqaa issi mala oottiya hanotan qoncciis” yaagees.

Wolqqaa bollay deˈiyoobadan asay qoppanau metootiyoogee erettidaba. Yaatiyo gishshau, daro asay geeshsha ayyaanay bolli deˈiyooba woykko “deˈoy deˈiyooba” giya qofaa ekkennaagaa Amarkka biittan xannaˈido mata wode xinaatee qonccissees. Eta qofay likkee? Woykko “Geeshsha Ayyaanay Aawaappenne Naˈaappe dumma gididi bolli deˈiyooba” giya haymaanootiyaa eranchata nuuni ammanana koshshii?

Ammanttiya zaaro demmanau geeshsha ayyaanaabaa loyttidi qonccissiya, Xoossaa Qaalaa, Geeshsha Maxaafaa nuuni pilggana koshshees. Kiitettida PHauloosi: “Xoossaa maxaafa ubban Xoossaa Ayyaanai de7ees. Qassi he maxaafati . . . tumatettaa tamaarissanau, balaa seeranau, . . . maaddoosona” yaagidi xaafiis.—2 Ximootiyoosa 3:16.17

Neeni geeshsha ayyaanaabaa tumaa eranau koyiyoogee bessiyaaba gididoy aybissee? Geeshsha ayyaanay aybakko eriyoogee, Xoossaa maaduwaa demmanaadan neeyyo ogiyaa dooyiyo gishshataassa. Issi issitoo nerkka issibaa genccanau danddayennabadan neeyyo siyetti erii? Yesuusi ba erissiyo ashkkaratussi: “Woossite, intte ekkana. . . . Intte iita gidiiddi, intte naatussi lo77obaa immiyoogaa erikko, yaatin saluwan de7iya Aawai bana woossiyaageetussi Geeshsha Ayyaanaa waati darissidi immanddeeshsha?” yaagidi qaalaa geliis.—Luqaasa 11:9, 13.

Kaalliya huuphe yohuwan, Geeshsha Maxaafay geeshsha ayyaanaabaa yootiyoobaa beˈana. Qassi geeshsha ayyaanay waatidi nu deˈuwan maaddiya wolqqa gidana danddayiyaakko beˈana.

[Sinttaa 3n deʼiya misiliyaa]

Geeshsha Maxaafay geeshsha ayyaanaabaa nuussi qonccissees