Iitabaa Asay Oottiyoy Aybissee?

AMARIDA asay palamettiyo issibay dees: Nuuni ubbay polo gidenna gishshau moorobaanne guyyeppe zilˈˈettiyoobaa oottoos. Hegee tuma gidikkokka, televizhiiniyaaninne eraadooniyan woy galla galla nuuni beˈiyo woy siyiyo iita oosoti daroti oosettiyoy hegaassee?

Asay polo gidana xayikkonne, darotoo kandduwaaban kanttana bessenna maaray deˈiyoogaanne iitabaa oottiyoogaappe haakkana danddayiyoogaa ammanees. Qoppennan tuma gidennabaa haasayiyoogaanne eriiddi sunttaa mooriyoogaa giddon, qoppennan asa bolli qoho gattiyoogaanne halchidi asa woriyoogaa giddon dummatettay deˈiyoogaa daroti akeekoosona. SHin heeran deˈiya, saro asa malatiyaageeti darotoo daganttiyaabaa oottoosona. Asay iitabaa oottiyoy aybissee?

 Geeshsha Maxaafay he allaalliyaa loyttidi akeekanaadan maaddees. Iita gidiyoogaa eriiddi asay issibaa oottiyo waanna gaasuwaa Geeshsha Maxaafay loytti qonccissees. I yootiyoobaa ane beˈa.

▪ “Sugetta oosoi aadhdhida eranchchaa eeyya kessees.”—ERA. 7:7.

Issi issitoo asay haroode oottennabaa oottanaadan hanotay denttettiyoobadan qoppiyoogaa Geeshsha Maxaafay yootees. Issi issi asay tuggaappenne pirdda pacaappe ashshees giidi qoppiyoobaa demmanau danobaakka oottana danddayees. Arbban Tererizim giyo maxaafay, “Daro hanotan, shabbirssiya ura denttettiya waannabay polotikan, issippetetta deˈuwaaninne ikkonoomiyan gakkiya, giigana danddayennaba milatiya metuwan hidootaa qanxxiyoogaa” yaagees.

▪ “Miishsha siiqiyoogee iitatetta ubbau pultto.”—1 XIM. 6:10.

Issi issi asay, daro miishshi imettikko loˈˈo urikka kandduwaabaunne suurebau kiyida higgiyaa kanttees yaagees. Meeze gidida hanotan loˈˈonne keha malatiya issi issi asati, miishsha demissiya woy miishshi xayanaadan oottiyaabi merettiyo wode, ufayssenna eeshshaa bessiyoogaaninne yiillotiyoogan laamettiyaaba milatoosona. Yaaretiyoogaappe denddidaagan poliyo daro danuwaa, giishin yashissidi woy cimmidi miishshaa ekkiyoogaa, bonqqiyoogaa, pangga gidiyoogaanne ubba asa woriyoogaa malabaa qoppa.

▪ “Asi halchchidi iitabaa oottiyo gaasoi, iitabaa oottida asata eesuwan qaxxayiyaabi bainna gishshaassa.”—ERA. 8:11.

Ha xiqisee, aawatettay deˈiyoogeeti beˈenna wode, asay aybanne oottidi baqatana danddayiyoobadan qoppiyoogaa qonccissees. Kaamiyaa bessiyaagaappe aaruwan eesuwan laaggiya, timirtte keettaa paaciyan wuuqqiya, deriyaa miishshaa wuuqqiyaanne hegaappekka iitabaa oottiyaageetu hanotay hegaa mala. Higgiyaa naagiya asaykka, higgee darin oosuwan peˈenna wode woy oyqettays giidi yayyenna wode, haroode oottennabaa guyye geennan oottana danddayees. Arggiyuments end Fakts giyo maxeetee, “Danobaa oottiyaageeti qaxxayettennan sohuwaara kessi ekkiyoogee, coo asi wolqqaama danuwaa oottanaadan denttettiyaaba malatees” yaagiis.

▪ “Asi huuphiyan huuphiyan ba huuphe iita amuwan gooshettiyo wodenne cimettiyo wode paacettees. Hegaappe guyyiyan, amoi shahaaridi, nagaraa yelees.”—YAAQ. 1:14, 15.

Asaa naatu ubbaa qofay iitabau zubbaridaagaa. Nuuni moorobaa oottanaadan galla galla odettiyaabaynne nu paacettiyoobay keehi daro. Beni wode Kiristtaanetuyyo, “Inttena gakkiya paacee, asa ubbaa gakkiya paace malappe attin, ainne dummatenna” geetettidi odettiis. (1 Qor. 10:13) Gidikkokka, gakkiyaabay issi ura dooruwaara, giishin iita qofaa sohuwaara aggiyoogaara woy qoppiyoogaa aggennan ixxidi hegee diccanaadan oottiyoogaara gayttidaba. Qommoora beˈido, ayyaanaa kaaletuwan xaafettida Yaaqooba maxaafaa xiqisee,  issi uri iita ‘amoy shahaaranaadan’ oottikko, iitabaa oottiyoogee attennaagaa akeekissees.

▪ “Aadhdhida eranchcha asatuura hemettiya asi aadhdhida eranchcha gidees; shin eeyya asatuura hemettiya asi metuwan gelees.” —LEE. 13:20.

Nuuni lagge gidanaadan dooriyoogeeti iitabau gidin loˈˈobau keehippe denttettana danddayoosona. Asay darotoo laggetu sugettan woy iita asaara peˈiyoogan, oottanau qoppennan daafaa gattiyaabaa oottees. Geeshsha Maxaafan, ‘eeyya asata’ yaagiyaagee eri baynnaageeta gidennan, Xoossaa Qaalan deˈiya aadhida eratettaa zoriyaa shenehoo giyaageeta malaatees. Nuuni ubbay laggeta eratettan, giishin Geeshsha Maxaafan deˈiya suure maaraadan doorennaba gidikko, ‘metuwan gelana’ danddayoos.

Asay, geella haraban loˈˈo gidida asaykka iitabaa, ubba qassi daganttiyaabaa oottiyoy aybissakko, hageetinne Geeshsha Maxaafan deˈiya hara xiqiseti qanttan qonccissoosona. Asay iitabaa oottanaadan denttettiyaabaa akeekiyoogee maaddiyaaba gidikkokka, sinttappe hanotay giiganaagau hidooti deˈii? Ee; ayssi giikko, Geeshsha Maxaafay asay iitabaa oottiyo gaasuwaa xalla gidennan, hegaa mala oosoy attanaagaakka yootees. He yootiyoobati aybee? Alamiyan deˈiya iitabay ubbay tumukka xayanee? Kaalliya huuphe yohoy hegau zaaruwaa immees.