Armmageedoona Olay Awude Denddanee?

“Zare ubbaappe, qommo ubbaappe, yara ubbaappenne dumma dumma biitta qaala ubbaappe ooninne qoodanau danddayenna zawai bainna daro asaa taani be7aas. . . . Hageeti daro waayiyaa waayidi yiidaageeta.”—AJJ. 7:9, 14.

ARMMAGEEDOONA olay denddanau matiis. Waanidi?

Ha wodiyan Yihoowau oottiyaanne Geeshsha Maxaafaa xoqqa kandduwaa maaraa kaalliya asaa maabaray alame yuushuwan deˈees. Maayettiyaanne siiqettiya ishanttu issippetettaa maabaran, Xoossay maaddin zare ubbaappe, qommo ubbaappe, yara ubbaappenne dumma dumma biitta qaala ubbaappe miilooniyan qoodettiya asay shiiqiiddi deˈees. Yihoowa Markkatu giddon hegaa mala ishanttu issippetettay deˈees.—Yoh. 13:35.

Mata wode Seexaanay ba olanchata shiishshidi, sarotettan deˈiya, qassi eqettiyo wolqqi baynnaba milatiya he asatu bolli wolqqaama olaa denttana. (Hiz. 38:8-12; Ajj. 16:13, 14, 16) Hegaa waatada ammanana danddayay? Armmageedoona olay awude denddanaakko eranau maaddiya qoncce hanotata Geeshsha Maxaafay yootees. He hanotatuppe daroti polettiiddi deˈoosona.

Polettiiddi Deˈiya Neeni Beˈiyoobata

‘Wodiyaa wurssettay’ gakkidoogaa asay waatidi eranaakko yootanaadan, erissiyo ashkkarati Yesuusa oychidosona. (Maa. 24:3) Yesuusi, “issi biittaa asai hara biittaa asaara olettana; qassi issi kawotettai hara kawotettaara olettana; koshainne biittaa qaattai ubbasan de7ana” yaagido wode, hegee hanana wodiyaabaa yootidi eta oyshaa zaariis. I gujjidikka, “Hegee ubbaikka koiro leesso mala” yaagiis. (Maa. 24:7, 8) Kiitettida PHauloosi he wodee ‘wurssetta gallassa’ gidiyoogaa qonccissidi, ‘wayssiya wode’ gidanaagaakka yootiis. (2 Xim. 3:1) Neeyyo ha hiraagati ha wodiyan hanettiiddi deˈiyaabata qonccissiyaaba milatokkonaa?

He wodee keehi wayssiyaagaa gidanay aybissee? Kiitettida Yohaannisi hegau gaasuwaa  yootiis. Seexaanaynne daydanttati saˈa xallan oottiiddi deˈana “guutta wodee” sinttappe yaanaagaa i kasetidi yootiis. Seexaanay he wode ‘wolqqaama hanqquwaa’ hanqqettanaagee odettiis. (Ajj. 12:7-12) Ha wodiyan issisaa xallan gidennan, alame yuushuwan asay hanqqettiyoogaanne makkaliyoogaa akeekay?

Yesuusi ha keehi wayssiya wodiyan issi dumma oosoy oosettanaagaakka yootiis. I, “Asa ubbau markka gidana mala, [Xoossaa] kawotettaa wonggeliyaa mishiraachchoi sa7a ubban odettana; hegaappe guyyiyan, wurssettai gakkana” yaagiis. (Maa. 24:14) Ha wodiyan, 235ppe dariya biittatun 500ppe dariya qaalan Yihoowa Markkati Xoossaa Kawotettaa mishiraachuwaa sabbakoosona. Eti Geeshsha Maxaafan amppidi giigissiyo naaˈˈu xuufeti, giishin Wochiyo Keelaynne Beegottite! maxeeteti ay xuufeppenne aaruwan attamettidi alamiyan daro asau imettoosona. Yihoowa Markkati Geeshsha Maxaafaakka 100 gidiya qaalan birshshidosona. Eti bantta oosuwaa bantta dosan oottoosona; qassi asay ba dosan immiyo miishshan he oosoy oosettees. Ha gita sibikate zamachay Yesuusa hiraagaa polooshsha?

Geeshsha Maxaafay Xoossaa Yihoowanne aara eqettiyaageetu giddon denddiya olaappe kasetidi hananabaakka yootees. Polettin neeni beˈana heezzu hiraagata ane beˈoos.

Mata Wode Polettin Neeni Beˈanabata

Hiraaga 1. Kawotettati “Ubbabai saro; aibikka hanenna” giidi awaajjanaagaa Geeshsha Maxaafay yootees. Eti wolqqaama metotuppe shemppissiyaabaa oottanau matidabadan qoppana danddayoosona. SHin hegaappe simmin polettiyaabay sarotetti baynnaagaa bessiyaaba gidana.—1 Tas. 5:1-3.

Hiraaga 2. Hegaappe simmin, daro kawotettati alamiyan deˈiya haymaanoote dirijjitetu bolli denddanau kuuyana. Geeshsha Maxaafay he kawotettata doˈan, qassi alamiyan deˈiya worddo haymaanooteta he doˈaa toggida maccaasen leemisees. (Ajj. 17:3, 15-18) Doˈan leemisettidaagee wordduwan Xoossaa kalˈˈatoos giya haymaanooteta xayssiyoogan Xoossay koyiyoobaa oottana.

Kiitettida Yohaannisi hanettanabaa hagaadan giidi leemisuwan qonccissiis: “Neeni be7ido tammu kaceenne do7ai shaaramuxiyo ixxana. Eti iyyo de7iya ubbabaa ekkirggana. Qassi o kallo ashshananne i ashuwaa mirggana; yaatidi eti o taman xuuggana. Aissi giikko, . . . Xoossai qoppidoogaa eti oottanaadan, eta wozanan Xoossai amuwaa wottiis.”—Ajj. 17:16, 17.

Hiraaga 3. Worddo haymaanootee hegaa mala hanotan xayi simmin, kawotettati ubbay Xoossaa Yihoowau goynniyaageeta qohana mala Seexaanay eta denttettana.—Ajj. 7:14; Maa. 24:21.

Nena Ayba Ogiyan Bochanee?

Geeshsha Maxaafaa loytta xannaˈanau hanotay neeyyo injjetibeennaba gidikko, qommoora qonccidabati polettana gaada ammananau metootana danddayaasa. Gidoppe attin, ubbabay polettanaagaa, qassi hegee mata wode hananaagaa ammananaadan oottiya loˈˈo gaasoy deˈees. Geeshsha Maxaafay yootiyo, polettida daro hiraagati hegaa ammananaadan oottoosona. *

Yihoowa Markkati ‘Ubbaappe Wolqqaama Xoossaa gita gallassaa olay’ keehi matidoogaa ammaniyoy aybissakko, qassi neeni hegaa yayyana bessennay aybissakko eranau aybissi guutta wodiyaa bazzikkii? Xoossaa Yihooway ashshiyoogeetuppe issuwaa gidanau neeni ay oottana bessiyaakko Geeshsha Maxaafay yootiyoobaa nenaara tobbanaadan eta oycha. (Ajj. 16:14) Neeni tamaariyoobay sintta wodiyau neeyyo deˈiya xeelaa laammana danddayees.

[Tohossa qofaa]

[Sinttaa 8n deʼiya misiliyaa qonccissuwaa]

Yihoowa Markkati oottiyo oosoy Geeshsha Maxaafaa hiraagaa polooshsha?