YESUUSI tumuppe ufayssiya deˈo deˈidee? I diccido keettaa asay hiyyeesa gidiyoogee qoncce; qassi saˈan deˈido wode ubban ayyo darobi baawa. Ubba ayyo ‘zinˈˈidi shemppi ekkiyoosikka’ baawa. (Luqaasa 9:57, 58) Qassi asay a ixxiisinne cayiis; wurssettan morkketi a woridosona.

Neeni, ‘Hegaa mala deˈoy taani ufayssiya deˈo gaada qoppiyooba gidenna!’ gaana danddayaasa. SHin Yesuusa deˈuwaara gayttidaagan nuuni erana koshshiyo harabay deˈees. A deˈuwaara gayttidaagan oyddubata ane beˈoos.

“Ta qumai tana kiittidaagee koyiyoobaa oottanaagaanne a oosuwaa polanaagaa.” —Yohaannisa 4:34.

Yesuusi haasayiyoobaaninne oottiyooban saluwan deˈiya ba Aawaa, Yihoowa sheniyaa polanau koyiis. I Xoossaa sheniyaa poliyoogan keehi ufayttiis. Qommoora deˈiya xiqisiyan qonccidaagaadan, i hegee baassi quma mala gidiyoogaa yootiis. I hegaadan giidoy awudekko akeeka.

Yesuusi hegaadan giidoy laaxa saate heeraana. (Yohaannisa 4:6) I deretiya Samaariyaa biittan maalladoppe doommidi hemettiiddi takkido gishshau, namisettidoogee qoncce. Erissiyo ashkkarati a, “Guuttabaa markkii!” yaagidi woossidosona. (Yohaannisa 4:31) Yesuusi etau zaaridoban, Xoossaa sheniyaa poliyoogee au quma mala, qassi a minttettiyaaba gidiyoogaa qonccissiis. Hegee i ba deˈuwan ufayttiyoogaa bessiyaaba gidennee?

‘Taani Aawaa siiqays.’—Yohaannisa 14:31.

Yesuusi saluwan deˈiya ba Aawaara mata dabbo gididi deˈiis. Yesuusi Xoossaa keehi siiqiyo gishshau, ba Aawaa sunttaa, a halchuwaanne a eeshshaa haratussi yootiyoogan abaa qonccissiis. Yesuusi haasayiyooban, oottiyoobaaninne qoppiyooban ba Aawaa loytti qonccissido gishshau, Yesuusabaa nabbabiyoogee, a Aawaabaa nabbabiyoogaa mala. Piliphoosi Yesuusa, “Aawaa nuna bessa” giido wode, Yesuusi, “Tana be7ida urai Aawaakka be7iis” giidoy hegaassa.—Yohaannisa 14:8, 9.

Yesuusi ba Aawaa keehi siiqiyo gishshau, hayqqana gakkanaashin au azazettiis. (Piliphphisiyuusa 2:7, 8; 1 Yohaannisa 5:3) Yesuusi Xoossaa hegaadan wozanappe siiqiyoogee i ba deˈuwan keehi ufayttanaadan oottiis.

“Ba shemppuwaa ba laggiyaayyo aattidi immiyoogaappe aadhdhiya siiqoi ooyyookka baawa.”—Yohaannisa 15:13.

Nuuni nagarancha gidiyo gishshau, nu sinttanaa deˈoy keehi iita gidiyoogee qoncce. Geeshsha Maxaafay, “Nagarai ha sa7aa issi asa [Addaame] baggaara geliis; he nagarai banaara haiquwaa ehiis; hegaa gaasuwan, asai ubbai nagara oottido gishshau, haiqoi asa zare ubbaa gakkiis” yaagees. (Roome 5:12) Nuuni nagaraa gaasuwan gakkiya hayquwaappe nu wolqqan attana danddayokko.—Roome 6:23.

Yihooway asaa naata metuwaappe shemppissiyaabaa giigissiis; hegee keehi ufayssiyaaba. I polo gidida ba Naˈay, Yesuusi asaa naata nagaraanne hayquwaa aylletettaappe kessanau waayetti hayqqanaadan paqqadiis; hegaadan oottidi wozuwaa giigissiis. Yesuusi ba Aawaanne asaa naata siiqiyo gishshau, nu gishshau ba shemppuwaa aatti immiis. (Roome 5:6-8) Ba goˈˈaa aggibayiyo hegaa mala siiqoy i ba deˈuwan ufayttanaadan oottiis. *

“Taani siiqiyo ta Na7ai, tana ufaissiyaagee hagaa.”—Maatiyoosa 3:17.

Yesuusi xammaqettiyo wode, Yihooway saluwaappe hegaadan giis. Yaagiyoogan, Yihooway ba Naˈaa Yesuusa siiqiyoogaanne an ufayttiyoogaa qoncciyan yootiis. Yesuusi, “Ta Aawai tana siiqees” giidoogee maalaaliyaaba gidenna. (Yohaannisa 10:17) Yesuusi Aaway a siiqiyoogaanne an ufayttiyoogaa eriyoogee, i yedetaanne tooshiyaa xalidi genccanaadan maaddiis. Yesuusi hegaa eriyoogee ubba hayqqiyo wodekka genccanaadan maaddiis. (Yohaannisa 10:18) Yesuusi ba Aaway bana siiqiyoogaanne banan ufayttiyoogaa eriyoogee, i ba deˈuwan keehi ufayttanaadan oottidoogee qoncce.

Yesuusi ufayssiya deˈuwaa deˈidoogee erettidaagaa. Nuuni ufayssiya deˈuwaa deˈana danddayiyoy ayba ogiyaanakko, appe darobaa tamaarana danddayoos. Kaalliya huuphe yohoy, waani deˈana bessiyaakko Yesuusi bana kaalliyaageeta zorido zoriyaappe amaridaagaa qonccissees.