Alame yuushuwan daro asay Tisaase aginan Yesuusa guutta naˈa oottidi medhido misiliyaa beˈees. A misiliyaa miizzay kattaa wottin miyo wogga saaxine malatiya qoriyan deˈiyaabadan medhoosona. SHin nuuni Yesuusi haˈˈikka guutta naˈa gididi deˈiyaabadan qoppana koshshii?— * I haˈˈi ay oottiiddi deˈiyaakko ane beˈoos. Beetaliheeme heeran issi gallassi qammi dembban dorssaa heemmiyaageetuyyo hanidabaappe hegaa erana danddayoos.

Akeekennan issi kiitanchay dorssaa heemmiyaageetuyyo beettiis. I etau, “Hachi Godai Kiristtoosi, ashshiyaagee Daawita kataman [yelettiis]” yaagiis. Kiitanchay eti Yesuusi ‘maayuwan xaaxin miizzay kattaa wottin miyo qoriyan zinˈˈidaagaa demmanaagaakka’ yootiis. Sohuwaara hara daro kiitanchati kiyi beettidi, ‘Xoossaa galatiyoogaa’ doommidosona.

Kiitanchati Xoossaa galatishin siyiyaakko neeni waananee?— Dorssaa heemmiyaageeti keehippe ufayttidosona! Eti, “Ane Beetaliheeme gakkanaashin biidi, Xoossai nuussi odido yohoi hanidaagaa be7oos” yaagidosona. Yaa gakkidi eti “Mairaamonne Yooseefa demmidi, miizzai kattaa wottin miyo qoriyan gacino na7ai zin77idaagaa be7idosona.”

Sohuwaara harati Mayraamanne Yooseefi deˈiyoosaa Beetaliheeme yiidosona. Dorssaa heemmiyaageeti hanettidabaa yootin eti ubbay garamettidosona. He garamissiyaabay aybakko eranau koyay?— Xoossaa siiqiya nuuni ubbay eranau koyoos. Yesuusi yelettidoogee hegaadan keehi ufayssidoy aybissakko ane beˈoos. Hegaa beˈanau, Mayraama azinaa gelanaappe kase hanidabaa erana koshshees.

Issi gallassi kiitanchay Gabreeli Mayraamikko yiis. Yiidi, “gita gidana; qassi Ubbaappe Bolla Xoossaa Na7a geetettana” naˈaa a yelanaagaa yootiis. Gabreeli, ‘I merinau kawotanaagaa, qassi a kawotettaassi wurssetti baynnaagaa’ yootiis.

Mayraama attuma asaara asho gaytotettaa pola erenna gishshau, hegee waanidi hanana danddayiyaakko erana koyaasu. Yaatiyo gishshau, Gabreeli  iyyo hagaadan giis: “Geeshsha Ayyaanai ne bolli yaana; Ubbaappe Bolla Xoossaa wolqqai nenan shemppana; hegaa gishshau, ne yelana geeshsha na7ai Xoossaa Na7aa geetettana.” Xoossaa Naˈaa saluwaappe ehiidi, guutta naˈa gididi diccanaadan Mayraami ulo giddon wottiyoogee keehippe maalaalissiyaaba!

Guutta naˈaa Yesuusa beˈanau biya heezzu asatunne dorssaa heemmiyaageetu misiliyaa beˈa eray?— Daro biittan Ufayssa Masqqalaa wode hegee meeze gididaba. SHin hegee tuma gidenna. He asati Xoossay ixxiyoobaa oottiyaageeta, xoolinttiyaa qoodiyaageeta. Eti gakkiyo wode aybi hanidaakko ane beˈoos. Geeshsha Maxaafay, “Soo gelidi, na7ai ba aayee Mairaamiira de7iyaagaa be7idosona” yaagees. Yaatiyo gishshau, he wode Yesuusi miizzay kattaa wottin miyoosan deˈiya gacino naˈa gidenna; i Yooseefaaranne Mayraamiira son deˈiya naˈa!

Xoolinttiyaa qoodiyaageeti Yesuusa waatidi demmidonaa?— Eta issi xoolinttee kaalettiis; koyro Beetaliheeme gidennan, Kawuwaa Heeroodisakko Yerusalaame kaalettiis. Geeshsha Maxaafay Heeroodisi Yesuusa demmidi woranau koyidoogaa yootees. Ane hagaa akeeka. Xoolinttiyaa qoodiyaageeta issi xoolinttee Heeroodisakko kaalettanaadan oottiday oona gaada qoppay?— Tumu Xoossaa Yihoowa gidennan, a morkkiyaa, Seexaanaa Dabloosa!

Seexaanay ha wodiyan daro asay Yesuusa gacino naˈa ootti xeellanaadan koyees. SHin kiitanchay Gabreeli Mayraamiyyo, “Inne . . . merinau kawotana; a kawotettaassi wurssetti baawa” yaagiis. Haˈˈi Yesuusi saluwan Kawo gididi haariiddi deˈees, qassi mata wode Xoossaa morkketa ubbaa xayssana. Nuuni Yesuusi haˈˈi Kawo gidiyoogaa erananne haratussi hegaa yootana koshshees.