Magkakaada kamurayawan ha tuna, diri pinaagi ha mga paningkamot han tawo, kondi pinaagi han Ginhadian han Dios, usa nga gobyerno ha langit nga ginmamandoan ni Kristo Jesus. Kitaa an igintututdo ha aton han Biblia mahitungod hinin makaruruyag nga paglaom.

1.   ‘Pauundangon [han Dios] an mga girra ha bug-os nga tuna,’ basi matuman an iya saad nga magkakaada ha “tuna kamurayawan para ha mga tawo nga iya nalilipayan.”​—Salmo 46:9; Lucas 2:14.

2.   An Ginhadian han Dios magmamando ha bug-os nga tuna tikang ha langit. (Daniel 7:14) Sugad nga gobyerno ha bug-os nga kalibotan, wawad-on hito an nasyonalismo nga amo an hinungdan han damu nga araway.

3.   Hi Jesus, nga Magmarando han Ginhadian han Dios, gintatawag nga “Prinsipe han Kamurayawan,” ngan sisiguruhon niya nga “an kamurayawan magigin waray kataposan.”​—Isaias 9:6, 7.

4.   An mga tawo nga padayon nga nakikig-away diri tutugotan nga magin sakop han Ginhadian, kay an “[Dios] nangangalas ha bisan hin-o nga nahigugma han kamadarahog.”​—Salmo 11:5; Proberbios 2:22.

5.   Gintututdoan han Dios an iya mga sakop kon paonan-o magkikinabuhi nga mamurayawon. Sugad nga resulta hini nga pagtutdo, an Biblia nasiring: “Ira papandayon an ira mga espada basi magin mga punta han arado ngan an ira mga bangkaw basi magin mga garab. An nasud diri mag-aalsa hin espada kontra ha iba nga nasud, ngan diri na hira mag-aaram hin pakiggirra.”​—Isaias 2:3, 4.

 Bisan yana, minilyon nga mga Saksi ni Jehova ha bug-os nga kalibotan an nahibabaro tikang ha Dios kon paonan-o magigin mamurayawon. (Mateo 5:9) Bisan kon iba-iba an amon lahi ngan naukoy ha sobra 230 nga katunaan, diri kami nakikiggirra ha amon igkasi-tawo.