Oo, an Biblia nagtatagana hin marig-on nga ebidensya nga naeksister an Dios. Nag-aaghat ito ha aton nga magkaada pagtoo ha Dios, diri pinaagi hin waray ebidensya nga pagtoo ha ginsisiring han mga relihiyon, kondi pinaagi ha paggamit han aton “abilidad ha paghunahuna” ngan “hilarom nga pagsabot.” (Roma 12:1; 1 Juan 5:20) Tagda an masunod nga mga pangatadongan nga iginbasar ha Biblia:

•   An pag-eksister han organisado nga uniberso nga may buhi nga mga linarang nagpapamatuod nga may Maglalarang. An Biblia nasiring: “Ha pagkamatuod, an tagsa nga balay may nagtukod, pero an naghimo han ngatanan nga butang amo an Dios.” (Hebreo 3:4) Bisan kon simple la ini nga kamatuoran, para ha damu nga edukado nga mga tawo, makatadunganon gud ito. a

•   Sugad nga tawo, may-ada kita natural nga hingyap nga hisabtan an kapulsanan ngan katuyoan han kinabuhi, usa nga hingyap nga mahimo magpadayon bisan kon matagbaw na an aton pisikal nga panginahanglan. Bahin ini han gintatawag han Biblia nga “espirituwal nga panginahanglan,” nga nag-uupod han hingyap nga makilala ngan singbahon an Dios. (Mateo 5:3; Pahayag 4:11) Ini nga espirituwal nga panginahanglan diri la nagpapamatuod nga naeksister an Dios kondi nagpapakita liwat nga mahigugmaon hiya nga Maglalarang nga naruruyag nga matagbaw ito nga panginahanglan.​—Mateo 4:4.

•   An detalyado nga mga tagna ha Biblia abanse nga iginsurat hin ginatos ka tuig ngan husto gud nga natuman. An pagkahusto ngan pagkadetalyado hito nga mga tagna marig-on nga pamatuod nga tikang ito ha Dios.​—2 Pedro 1:21.

•   An mga nagsurat han Biblia may kahibaro ha syensya nga labaw ha kahibaro han ira mga kakontemporaryo. Pananglitan ha kadaan nga panahon, damu an natoo nga an tuna ginpapas-an hin hayop, sugad han elepante, baboy, o baka. Ha kabaliktaran, an Biblia nasiring nga ‘ginbibitay [han Dios] an tuna ha waray binibitayan.’ (Job 26:7) Ha pariho nga paagi, husto nga ginhulagway han Biblia an kurti han tuna sugad nga ‘lingin,’ o lidong. (Isaias 40:22) Para ha damu nga tawo, makatadunganon la nga magkaada labaw nga kahibaro an mga nagsurat han Biblia tungod kay nakarawat nira an ira impormasyon tikang ha Dios.

•   An Biblia nagbabaton han damu nga magkuri nga pakiana—mga pakiana nga kon diri mabaton hin maopay mahimo mag-aghat ha usa nga diri tumoo ha Dios. Pananglitan: Kon an Dios mahigugmaon ngan makagarahum-ha-ngatanan, kay ano nga may pag-antos ngan karaotan ha kalibotan? Kay ano nga an relihiyon agsob makaraot imbes nga makaopay?​—Tito 1:​16.