An Amay Namon naghahatag ha aton hin giya kon paonan-o ngan kon ano an dapat naton ig-ampo. Gintutdo ini ni Jesus sugad nga baton ha hangyo han iya mga disipulo: “Ginoo, tutdui kami kon paonan-o mag-aampo.” (Lucas 11:1) Kondi an pag-ampo nga Amay Namon, diri la amo an pag-ampo nga ginkakarawat han Dios. a Lugod, gintutdo ito ni Jesus sugad nga modelo han mga pag-ampo nga ginbabaton han Dios.

Hini nga artikulo

•  Ano an ginsisiring han pag-ampo nga Amay Namon?

•  Ano an karuyag sidngon han pag-ampo nga Amay Namon?

•  An pagmemorya ba han Amay Namon amo la an paagi ha pag-ampo?

•  Paonan-o kita dapat mag-ampo?

•  Iba pa nga pag-ampo nga iginrekord ha Biblia

 Ha iba-iba nga hubad han Biblia, iba-iba nga pulong an gin-gamit ha pag-ampo nga Amay Namon nga nakarekord ha Mateo 6:9-13. Ini an duha nga ehemplo.

 Bag-o nga Kalibotan nga Hubad: “Amay namon ha langit, baraanon unta an imo ngaran. Kumanhi unta an imo Ginhadian. Matuman unta an imo kaburut-on dinhi ha tuna sugad han ha langit. Tagi kami yana han amon pagkaon para yana nga adlaw; ngan pasayloa kami han amon mga utang, sugad han amon pagpasaylo ha mga nakakautang ha amon. Ngan ayaw itugot nga masulay kami, kondi talwasa kami tikang ha usa nga maraot.”

 An Baraan nga Kasuratan: “Amay namon, nga aada ka ha langit, gindadayaw an imo ngaran; Kumanhi an imo ginhadian. Matuman an imo pagburut-an, sugad ha langit, amo man ha tuna. Tagan mo kami niyan hin kan-on namon ha ikinaadlaw. Ngan pagwad-on mo an amon mga utang, sugad han amon pagwara han mga nakakautang ha amon. Ngan diri mo kami pagdad-on ngadto ha panulay; kondi luwason mo kami ha karaotan.” b

 An mga katutdoan ni Jesus konektado ha iba nga bahin han Kasuratan, salit malalaoman naton nga an iba nga bahin han Biblia makakabulig ha aton nga masabtan an karuyag sidngon han pag-ampo nga Amay Namon.

“Amay namon ha langit”

 Husto la nga tawagon an Dios nga “Amay namon” kay hiya an naglarang ha aton ngan naghatag ha aton hin kinabuhi.—Isaias 64:8.

“Baraanon unta an imo ngaran”

 An ngaran han Dios nga hi Jehova, dapat pasidunggan ngan gamiton ha baraan o sagrado nga paagi. Makakabulig an mga tawo ha pagbaraan han ngaran han Dios pinaagi ha pagsumat han iya mga kalidad ngan katuyoan.—Salmo 83:18; Isaias 6:3.

“Kumanhi unta an imo Ginhadian”

 An Ginhadian han Dios usa nga langitnon nga gobyerno diin hi Jesus an Hadi. Gintutdoan kita ni Jesus nga ig-ampo nga magmando na unta ini nga gobyerno ha bug-os nga tuna.—Daniel 2:44; Pahayag 11:15.

“Matuman unta an imo kaburut-on dinhi ha tuna sugad han ha langit”

 Sugad la nga waray karaotan o kamatayon ha langit, kaburut-on han Dios para ha tuna nga an mga tawo mabuhi dida hito hin waray kataposan nga may kamurayawan ngan seguridad.—Salmo 37:11, 29.

“Tagi kami yana han amon pagkaon para yana nga adlaw”

 Dapat naton hinumdoman nga an aton Maglalarang an naghahatag ha aton hin pagkaon ngan iba pa nga panginahanglan basi mabuhi.—Buhat 17:24, 25.

“Pasayloa kami han amon mga utang, sugad han amon pagpasaylo ha mga nakakautang ha amon”

 Hini nga konteksto, an pulong nga “mga utang” nagtutudlok ha mga sala. (Lucas 11:4) An tanan nga tawo nakakasala ngan nagkikinahanglan hin pagpasaylo. Pero kon karuyag naton nga pasayloon kita han Dios, kinahanglan magin andam kita ha pagpasaylo ha mga nakakasala ha aton.—Mateo 6:14, 15.

“Ayaw itugot nga masulay kami, kondi talwasa kami tikang ha usa nga maraot”

 Hi Jehova nga Dios diri gud nagsusulay ha aton nga magbuhat hin sayop. (Santiago 1:13) Pero ginsusulay kita han “usa nga maraot,” hi Satanas nga Yawa—nga gintatawag nga “an Paragsulay.” (1 Juan 5:19; Mateo 4:1-4) Ginhahangyo naton hi Jehova nga buligan kita nga magpabilin nga masinugtanon ha iya kon ginsusulay kita nga magbuhat hin sayop.

 Gintutdo ni Jesus an Amay Namon sugad nga modelo nga pag-ampo. Diri ito dapat luwason hin pauroutro. Nagpahamangno hi Jesus antes gud la itutdo niya an pag-ampo nga Amay Namon: “Kon nag-aampo, ayaw pag-uroutroha an amo gihapon nga mga pulong.” (Mateo 6:7) Han nagtutdo hiya hin modelo nga pag-ampo ha iba nga higayon, naggamit hiya hin iba nga pulong.—Lucas 11:2-4.

 An pinakamaopay nga paagi ha pag-ampo amo an pagsumat ha Dios han aton ginhuhunahuna ngan inaabat.—Salmo 62:8.

 An pag-ampo nga Amay Namon naghahatag hin maopay nga ehemplo kon paonan-o mag-aampo ha paagi nga papamatian han Dios. Pansina kon paonan-o ito nauyon ha iba nga teksto ha Biblia parte ha pag-ampo.

•   Pag-ampo la ha Dios

   Teksto: “Ha ngatanan nga butang pinaagi han pag-ampo ngan pangamuyo nga may pagpasalamat, ipahibaro niyo ha Dios an iyo mga hangyo.”—Filipos 4:6.

   Karuyag sidngon: Dapat mag-ampo kita ha Dios—diri kan Jesus, kan Maria, o ha mga santo. Pinaagi ha pagtikang hin mga pulong nga “Amay namon,” gintututdoan kita nga mag-ampo kan Jehova nga Dios gud la.

•   Pag-ampo para hin mga butang nga uyon ha kaburut-on han Dios

   Teksto: “Anoman an aton aroon uyon ha iya kaburut-on, namamati hiya ha aton.”—1 Juan 5:14.

   Karuyag sidngon: Puydi naton ig-ampo an bisan ano basta uyon ito ha kaburut-on han Dios. Gintutdoan kita ni Jesus kon ano kaimportante an kaburut-on han Dios pinaagi ha pag-upod ha pag-ampo nga Amay Namon han mga pulong nga “matuman unta an imo kaburut-on.” Mahibabaroan naton an kaburut-on han Dios ha tuna ngan ha katawohan pinaagi ha pag-aram hin Biblia.

•   Pag-ampo parte ha personal nga kabaraka

   Teksto: “Ipasa ngadto kan Jehova an imo pinas-an, ngan bubuligan ka niya.”—Salmo 55:22.

   Karuyag sidngon: Karuyag kita buligan han Dios ha aton mga problema. Sugad la nga igin-upod ni Jesus an pipira nga personal nga hangyo ha pag-ampo nga Amay Namon, puydi kita mag-ampo para ha aton pan-adlaw-adlaw nga panginahanglan, para hin giya kon naghihimo hin importante nga mga desisyon, para hin bulig kon may mga problema, ngan para ha pagpasaylo han aton mga sala. c