PAKIANA 6
Ano an Igintagna han Biblia Mahitungod han Mesias?
TAGNA
“Ikaw, O Bethlehem Efrata, . . . ha imo magtitikang an usa nga magigin magmarando ha Israel para ha akon.”
KATUMANAN
“Katapos han katawo ni Jesus ha Bethlehem ha Judea ha mga adlaw ni Herodes nga hadi, kitaa! may mga astrologo tikang ha Este nga inabot ha Jerusalem.”
TAGNA
“Ginbarahin nira an akon mga panapton, ngan ginripahan nira an akon bado.”
KATUMANAN
“Yana han iginraysang na han mga sundalo hi Jesus ha kahoy, ginkuha nira an iya pantungbaw nga mga bado ngan ginbahin ha upat . . . Pero an pan-ilarom nga bado waray tinahian, kay hinablon ito tikang ha igbaw tubtob ha ubos. Salit nagsiring hira ha usa kag usa: ‘Ayaw naton ini paggisia, kondi pagripa kita basi hibaroan kon hin-o an makakadara hini.’”
TAGNA
“Iya ginbabantayan an ngatanan niya nga tul-an; bisan usa hito waray nabari.”
KATUMANAN
“Pagdaop nira kan Jesus, nakita nira nga patay na hiya, salit waray nira baria an iya mga bitiis.”
TAGNA
“Ginbuno hiya tungod han amon pagtalapas.”
KATUMANAN
“Usa han mga sundalo an nagbuno han iya kagiliran pinaagi hin bangkaw, ngan may ginawas dayon nga dugo ngan tubig.”
TAGNA
“Ira iginhatag an akon suhol, 30 ka bug-os nga silber.”
KATUMANAN
“Katapos an usa han Dose, nga gintatawag nga Judas Iscariote, kinadto ha punoan nga mga saserdote ngan nagsiring: ‘Ano an ihahatag niyo ha akon basi patraydor nga itubyan ko hiya ha iyo?’ Nagsaad hira ha iya hin 30 ka bug-os nga silber.”
