Surat ha mga Hebreo 3:1-19
3 Salit baraan nga kabugtoan, nga mga umarangbit han langitnon nga pagtawag,*+ tagda an apostol ngan hitaas nga saserdote nga aton ginkikilala,*—hi Jesus.+
2 Matinumanon hiya ha Dios nga nagpili ha iya,+ pariho kan Moises nga matinumanon liwat ha bug-os nga panimalay han Dios.+
3 Kay gintagad hiya* nga takos hin mas daku nga himaya+ kay ha kan Moises, kay hiya nga nagtutukod hin balay mas dungganon kay han balay mismo.
4 Ha pagkamatuod, an tagsa nga balay may nagtukod, pero an naghimo han ngatanan nga butang amo an Dios.
5 Hi Moises matinumanon sugad nga surugoon ha bug-os nga panimalay han Dios sugad nga pamatuod* han mga butang nga igpapahayag ha urhi,
6 pero an Kristo matinumanon sugad nga anak+ ha pagdumara ha panimalay han Dios. Oo, kita an Iya panimalay+ kon kakaptan naton hin marig-on an aton kagawasan ha pagyakan ngan an paglaom nga aton iginhahambog tubtob ha kataposan.
7 Salit sugad han ginsisiring han baraan nga espiritu,+ “Yana nga adlaw kon mamamati kamo han iya tingog,
8 ayaw patig-aha an iyo kasingkasing sugad han panhitabo nga nag-aghat hin duro nga kasina, sugad han adlaw han pagsari didto ha kamingawan,+
9 han ginsarihan ngan ginproybahan ako han iyo mga kaapoy-apoyan, bisan kon nakita nira an akon mga buhat ha sulod hin 40 ka tuig.+
10 Ini an hinungdan nga nasina gud ako hini nga henerasyon ngan nagsiring: ‘Pirme nahisisimang an ira kasingkasing, ngan waray hira mahibaro han akon mga paagi.’
11 Salit tungod ha akon kasina nanumpa ako: ‘Diri hira makakasulod ha akon pagpahuway.’”+
12 Mga kabugtoan, pag-ikmat kamo kay bangin magkaada an bisan hin-o ha iyo hin maraot nga kasingkasing nga waray pagtoo pinaagi ha pagpahirayo ha buhi nga Dios;+
13 pero kada adlaw padayon nga dasigon niyo an usa kag usa samtang gintatawag pa ito nga “Yana nga adlaw,”+ basi waray ha iyo magin matig-a an kasingkasing tungod han nakakalimbong nga gahum han sala.
14 Kay ha pagkamatuod, magigin mga kaangbit la kita han Kristo kon kakaptan naton hin marig-on tubtob ha kataposan an pagsarig nga may-ada kita ha tinikangan.+
15 Sugad han ginsiring, “Yana nga adlaw kon mamamati kamo han iya tingog, ayaw patig-aha an iyo kasingkasing sugad han panhitabo nga nag-aghat hin duro nga kasina.”+
16 Kay hin-o an nakabati pero gin-aghat la gihapon hiya nga masina hinduro? Ha pagkamatuod, diri ba an ngatanan nga ginawas ha Ehipto ha pagpanguna ni Moises?+
17 Dugang pa, hin-o an nasinahan gud han Dios ha sulod hin 40 ka tuig?+ Diri ba an mga nakasala, nga nagkamatay ha kamingawan?+
18 Ngan hin-o an iya iginpanumpa nga diri hira makakasulod ha iya pagpahuway? Diri ba hira nga nagin diri masinugtanon?
19 Salit nasabtan naton nga waray hira makasulod tungod han kawaray-pagtoo.+
