Isaias 39:1-8
-
Mga mensahero han Babilonya (1-8)
39 Hito nga panahon an hadi han Babilonya, hi Merodac-baladan nga anak nga lalaki ni Baladan, nagpadara hin mga surat ngan hin regalo ngadto kan Hezekias,+ kay nabatian niya nga nagkasakit hiya ngan nag-opay.+
2 Hi Hezekias malipayon nga nag-abiabi ha ira* ngan iginpakita ha ira an iya balay nga tiripigan hin bahandi+—an silber, an bulawan, an lana han balsamo ngan an iba pa nga maopay nga klase hin lana, an iya bug-os nga burutangan han mga armas, ngan an ngatanan nga makikita ha iya mga tiripigan hin bahandi. Waray bisan usa nga butang ha kalugaringon nga balay* ni Hezekias ngan ha ngatanan niya nga nasasakopan nga waray niya ipakita ha ira.
3 Katapos hito, hi propeta Isaias kinadto kan Hadi Hezekias ngan nagpakiana ha iya: “Ano an ginsiring hini nga kalalakin-an, ngan diin hira tikang?” Hi Hezekias binaton: “Tikang hira ha hirayo nga tuna, ha Babilonya.”+
4 Katapos, nagpakiana hiya: “Ano an ira nakita ha imo balay?”* Hi Hezekias binaton: “Nakita nira an ngatanan ha akon balay.* Waray bisan usa nga butang ha akon mga tiripigan hin bahandi nga waray ko ipakita ha ira.”
5 Yana hi Isaias nagsiring kan Hezekias: “Pamatii an pulong ni Jehova han mga hugpo,
6 ‘Kitaa! Maabot an mga adlaw, ngan an ngatanan nga aada ha imo balay* ngan an ngatanan nga gintirok han imo mga kaapoy-apoyan tubtob hini nga adlaw dadad-on ha Babilonya. Waray bisan usa nga mahisasalin,’+ nasiring hi Jehova.+
7 ‘Ngan an pipira han imo katulinan nga matatawo kukuhaon ngan magigin mga opisyal ha palasyo han hadi han Babilonya.’”+
8 Salit hi Hezekias nagsiring kan Isaias: “Maopay an mensahe ni Jehova nga imo iginsumat.” Katapos, nagsiring pa hiya: “Tungod kay magkakaada hin kamurayawan ngan karig-on* samtang buhi ako.”*+
Mga footnote
^ Lit., “nalipay tungod ha ira.”
^ O “palasyo.”
^ O “palasyo.”
^ O “palasyo.”
^ O “palasyo.”
^ O “kamatuoran.”
^ Lit., “ha akon mga adlaw.”
