Isaias 40:1-31
40 “Liawa niyo, liawa niyo an akon katawohan,” siring han iyo Dios.+
2 “Pakiistorya kamo ha kasingkasing han* Jerusalem,Ngan isumat ha iya nga an iya pinirit nga pagtrabaho natapos na,Nga an iya sala nabaydan na.+
Tikang ha kamot ni Jehova nakakarawat hiya hin bug-os nga kantidad* tungod han ngatanan niya nga sala.”+
3 May tingog nga naguliat ha kamingawan:
“Hawani* niyo an dalan ni Jehova!+
Paghimo ha disyerto hin tadong nga kalsada+ para ha aton Dios.+
4 Tambakan hin tuna an tagsa nga walog,Ngan pahamub-on an tagsa nga bukid ngan bungtod.
An tuna nga may mga bungdo kinahanglan patagon,Ngan an tuna nga lubak-lubak kinahanglan magin kapatagan.+
5 An himaya ni Jehova maipapahayag,+Ngan an ngatanan nga tawo* urosa nga makakakita hito,+Kay an baba ni Jehova an nagyakan.”
6 Pamati! May nasiring: “Guliat!”
Ngan may usa nga nagpapakiana: “Ano an akon iguguliat?”
“An ngatanan nga tawo* berde nga banwa.
An ngatanan nira nga maunungon nga gugma pariho han bukad ha kapatagan.+
7 An berde nga banwa nauuga,An bukad nalalaya,+Kay ginhuhuypan ito han gininhawa* ni Jehova.+
Sigurado nga an katawohan berde la nga banwa.
8 An berde nga banwa nauuga,An bukad nalalaya,Pero an pulong han aton Dios nagpapadayon ha waray kataposan.”+
9 Sagka ha hitaas nga bukid,Ikaw nga babaye nga nagdadara hin maopay nga sumat para ha Zion.+
Dakua gud an imo tingog,Ikaw nga babaye nga nagdadara hin maopay nga sumat para ha Jerusalem.
Dakua ito, ayaw kahadlok.
Ipahibaro ha mga syudad han Juda: “Aadi an iyo Dios.”+
10 Kitaa! Hi Jehova nga Soberano nga Ginoo makanhi nga may gahum,Ngan an iya butkon magmamando para ha iya.+
Kitaa! An iya balos aada ha iya,Ngan an bayad nga iya iginhahatag aada ha iya atubangan.+
11 Pariho hin paraataman hin panon iya mamangnoan* an iya panon.+
Pinaagi han iya butkon titirukon niya an nati nga mga karnero,Ngan iya ito kukuguson dida ha iya dughan.
May pagkabuotan nga iya tutugwayan adton nagpapasuso han ira mga nati.+
12 Hin-o an nagtakos han katubigan pinaagi han harop han iya kamot+Ngan nagsukol han kalangitan pinaagi han dangaw han iya kamot?*
Hin-o an nagtirok han tapotapo ha tuna dida ha taraksan+O nagtimbang han kabukiran dida ha suklananNgan han mga bungtod dida ha timbangan?
13 Hin-o an nagsukol* han espiritu ni Jehova,Ngan hin-o an makakagtutdo ha iya sugad nga iya magsaragdon?+
14 Hin-o an iya ginkonsulta basi magkaada hin pagsabot,O hin-o an nagtututdo ha iya ha dalan han hustisya,O nagtututdo ha iya hin kahibaro,O nagpapakita ha iya han dalan han tinuod nga pagsabot?+
15 Kitaa! An mga nasud pariho hin turo tikang ha balde,Ngan para ha iya pariho hira han gutiay nga tapotapo ha timbangan.+
Kitaa! Iya gin-aalsa an mga isla pariho hin pino nga tapotapo.
16 Bisan an Lebanon diri igo basi maipadayon an paglaga han kalayo,*Ngan an ihalas nga mga hayop dida hito diri igo para ha halad nga sinunog.
17 An ngatanan nga nasud sugad hin diri naeksister ha iya atubangan;+Para ha iya waray la hira, diri hira tinuod.+
18 Kan kanay niyo maikukompara an Dios?+
Ano nga dagway an iyo maipapariho ha iya?+
19 An eksperto nga parahimo nagmumolde hin idolo,*An panday hin metal naghahaklap hito hin bulawan,+Ngan nagpapanday hiya hin silber nga mga kadena.
20 Nagpipili hiya hin kahoy sugad nga iya halad,+Usa nga kahoy nga diri madudunot.
Namimiling hiya hin eksperto nga parahimoNga maghihimo hin inukit nga imahen nga diri matutumba.+
21 Diri ba kamo maaram?
Waray ba kamo makabati?
Waray ba ito isumat ha iyo tikang pa ha tinikangan?
Waray ba kamo makasabot tikang pa han ginhimo an mga pundasyon han tuna?+
22 An Dios naukoy ha bawbaw han malidong nga* tuna,+Ngan an mga naukoy hito pariho hin mga apan.
Iya gin-uunat an kalangitan pariho hin manipis nga gasa,Ngan iya ito ginbibitad pariho hin tolda nga mauukyan.+
23 Iya gintatangtang ha katungdanan an higtaas nga mga opisyalNgan ginhihimo nga waray pulos an mga hukom* ha tuna.
24 Pagtatamna pa la ha ira,Pagsasabwaga pa la ha ira,Paggagamot pa la ha tuna han ira sanga,Ngan ginhuhuypan hira ngan nauuga,Ngan iginpapalid hira han hangin pariho hin dagami.+
25 “Kan kanay niyo ako maipapariho basi itupong ako ha iya?” nasiring an Baraan nga Dios.
26 “Hangad kamo ha langit ngan pagkita.
Hin-o an naglarang hini nga mga butang?+
Hiya amo adton naggagawas han hugpo hini uyon ha kadamu hini;Ini ngatanan iya gintatawag ha ngaran.+
Tungod han iya hura nga dinamiko nga kusog ngan han iya urusahon gud nga gahum,+Waray bisan usa hini an nawawara.
27 O Jacob, kay ano nga nasiring ka, ngan O Israel, kay ano nga nagyayakan ka,‘An akon dalan nakatago tikang kan Jehova,Ngan diri ako nakakakarawat hin hustisya tikang ha Dios’?+
28 Diri ka ba maaram? Waray ka ba makabati?
Hi Jehova, an Maglalarang han mga sidsid han tuna, usa nga Dios tikang ha waray tinikangan tubtob ha waray kataposan.+
Diri gud hiya nanluluya o ginugol-an.+
Diri matugkad an iya pagsabot.+
29 Iya gintatagan hin kusog an ginkakapoyNgan hin kabaskog an mga waray kusog.*+
30 An mga bata nga lalaki manluluya ngan gugol-an,Ngan an batan-on nga mga lalaki mahipapakdol ngan matutumba,
31 Kondi an mga naglalaom kan Jehova magkakaada utro hin kusog.
Malupad hira hin hitaas nga sugad hin may mga pako han mga agila.+
Madalagan hira ngan diri gugol-an;Maglalakat hira ngan diri manluluya.”+
Mga footnote
^ O “Pagyakan kamo hin nakakaliaw ha.”
^ O “nakakarawat hiya hin doble.”
^ O “Ig-andam.”
^ Lit., “ngatanan nga unod.”
^ Lit., “ngatanan nga unod.”
^ O “espiritu.”
^ O “aatamanon.”
^ An distansya tikang ha kataposan han tamuragko tubtob ha kataposan han kamuyingking kon nakabuklad an kamot. Kitaa an Ap. B14.
^ O posible nga “nakasabot.”
^ O “diri makakahatag hin igo nga sungo.”
^ O “hinurma nga rebulto.”
^ O “sirkulo han.”
^ O “mga magmarando.”
^ O “waray dinamiko nga kusog.”
