KAPITULO 25

Paonan-o Ko Maiuundang an Masturbasyon?

“Otso anyos ako han nagtikang ako pagbuhat hin masturbasyon. Ha urhi, nahibaroan ko kon ano an panhunahuna hito han Dios. Nakukonsensya ako ha kada panahon nga ginbubuhat ko ito. Nahunahuna ko, ‘Hihigugmaon daw la han Dios an sugad ha akon?’”—Luiz.

KON nagigin tin-edyer ka, nagigin makusog an imo hingyap ha sekso. Salit bangin mahiara ka ha pagbuhat hin masturbasyon. * Damu an naghuhunahuna nga okey la ito. Nangangatadongan hira, “Waray man nasasakitan hini.” Pero may maopay nga rason nga likyan an pagbuhat hito. Hi apostol Pablo nagsurat: “Salit pataya an mga parte han iyo lawas nga . . . may kalabotan ha . . . diri mapugngan nga hingyap ha pakighilawas.” (Colosas 3:5) Diri napapatay han masturbasyon an hingyap ha pakighilawas, nakakapukaw lugod ito. Hunahunaa liwat an masunod:

● Kon an usa nagbubuhat hin masturbasyon, nagigin makikalugaringon hiya kay nakapokus la hiya ha iya kalugaringon nga inaabat.

● Tungod han masturbasyon, bangin hunahunaon han usa nga an iya diri kasekso usa la nga butang, o gamit, para matagbaw an iya kalugaringon nga hingyap.

● Nagigin makikalugaringon an usa kon nagbibinuhat hiya hin masturbasyon. Salit bangin diri hiya makontento ha iya seksuwal nga relasyon ha iya magigin asawa.

Imbes nga magbuhat hin masturbasyon basi matagbaw an seksuwal nga hingyap, pangalimbasog lugod nga makultibar an pagpugong ha kalugaringon. (1 Tesalonica 4:4, 5) Para mabuligan ka, gin-aaghat ka han Biblia nga likayan an mga sitwasyon nga mahimo makapukaw han imo hingyap ha sekso. (Proberbios 5:8, 9) Pero ano man kon nahiaraan mo na an pagbuhat hin masturbasyon? Bangin nagsari ka nga iundang ito pero waray ka maglampos. Bangin maghunahuna ka nga diri mo na ito maiuundang ngan diri mo kaya nga magkinabuhi uyon ha mga suruklan han Dios. Ito an ginhunahuna han batan-on nga hi Pedro. “Kon nabubuhat ko ito utro, nasusubo gud ako,” siring niya. “Naghunahuna ako nga diri gud ako mapapasaylo tungod han akon ginbuhat. Naaawod ako pag-ampo.”

Kon ito an imo inaabat, ayaw kahulop. May paglaom ka pa. Damu nga batan-on—ngan mga adulto—an naglampos nga maiundang an pagbuhat hin masturbasyon. Mahihimo mo liwat ito!

Kon Paonan-o Malalamposan an Duro nga Kakonsensya

Sugad han gin-unabi na, adton nahiara ha pagbuhat hin masturbasyon kasagaran na nga nakukonsensya. Waray ruhaduha, an pag-abat hin ‘kasubo uyon ha kaburut-on han Dios’ makakabulig ha imo nga iundang ito nga buhat. (2 Corinto 7:11) Pero an duro nga kakonsensya diri maopay. Mahimo ito makapaluya han imo determinasyon nga atohan an masturbasyon.—Proberbios 24:10.

Salit ano kaseryoso an masturbasyon? An masturbasyon usa nga mahugaw nga buhat. Tungod hito, mahimo ka magin “uripon han magkalain-lain nga hingyap ngan kalipayan” ngan magkaada sayop nga panhunahuna. (Tito 3:3) Pero an masturbasyon diri pariho kaseryoso han seksuwal nga imoralidad, sugad han pornikasyon. (Judas 7) Kon nahiaraan mo na an pagbuhat hin masturbasyon, ayaw paghunahuna nga nakabuhat ka hin sala nga diri mapapasaylo. An importante, padayon mo nga gin-aatohan ito nga hingyap ngan diri ka gud naundang!

Bangin masubo ka gud kon makabuhat ka hito utro. Kon mahitabo ito, diri karuyag sidngon hito nga maraot ka na nga tawo. Salit padayon nga paningkamot. Hibaroi kon kay ano nga nabuhat mo ito utro, ngan paningkamuti nga malikayan an mga butang nga nagin hinungdan han pakabuhat mo hito.

Paggahin hin panahon ha pagpamalandong han gugma ngan kalooy han Dios. An salmista nga hi David, nga nakabuhat liwat hin pipira nga seryoso nga sala, nagsiring: “Sugad hin tatay nga nagpapakita hin kalooy ha iya mga anak, hi Jehova nagpakita hin kalooy ha mga may kahadlok ha iya. Kay maaram gud hiya kon paonan-o kita ginhimo, nahinunumdom nga tapotapo kita.” (Salmo 103:13, 14) Oo, maaram hi Jehova nga diri kita perpekto, ngan “andam [hiya] magpasaylo.” (Salmo 86:5) Ha luyo nga bahin, karuyag niya nga mangalimbasog kita nga magbag-o. Salit ano an imo puydi himoon basi maiundang ito nga maraot nga buhat?

Usisaha an imo kaliawan. Nag-aabri ka ba hin Web site o nagkikita hin mga pelikula o salida ha TV nga nakakasulay ha imo nga magbuhat utro hin masturbasyon? An salmista maaramon nga nag-ampo ha Dios: “Iglikay an akon mga mata tikang ha pagkinita hin waray pulos.”—Salmo 119:37.

Ipokus an imo hunahuna ha iba nga butang. Ini an sagdon han Kristiano nga hi William: “Antes kumaturog, pagbasa hin barasahon nga basado ha Biblia. Importante gud nga espirituwal nga mga butang an aada ha imo hunahuna antes ka kumaturog.”—Filipos 4:8.

Pakiistorya ha iba parte ha imo problema. Tungod ha kaawod, bangin makurian ka nga isumat an imo problema ha usa nga imo gintataporan. Pero kon bubuhaton mo ito, mabubuligan ka nga maiundang iton maraot nga buhat! Ito an napamatud-an han Kristiano nga hi David. “Iginsumat ko kan Papa an akon problema,” siring niya. “Waray ko gud makalimti an iya ginsiring. Naghiyom hiya ha akon ngan nagsiring, ‘Proud gud ako ha imo.’ Maaram hiya nga diri masayon nga ig-istorya ito ha iba. Naparig-on gud ako hito nga iya ginsiring ngan nagin mas determinado ako nga atohan iton maraot nga buhat.

“Katapos, may iginpabasa ha akon hi Papa nga mga teksto basi buligan ako nga makita nga diri ako maraot nga tawo. Ngan may iginpakita liwat hiya nga dugang nga mga teksto basi masiguro nga nasasabtan ko an pagkaseryoso han akon maraot nga buhat. Ginsidngan niya ako nga buhaton an akon mahihimo basi malikayan an pakabuhat hito ha sulod hin pipira ka panahon, ngan katapos, pag-iistoryahan namon ito utro. Nagsiring liwat hiya nga diri ako sobra nga masubo kon mabuhat ko ito utro, basta padayon la ako nga maniguro nga diri ito buhaton hin mas hurohilawig nga panahon.” Ano nga leksyon an nahibaroan ni David? Hiya nagsiring: “Daku gud an kaopayan nga may iba nga maaram han akon problema ngan nabulig ha akon.”

[Footnote]

NANGUNGUNA NGA TEKSTO

“Palagiw tikang ha mga hingyap han pagkabatan-on, lugod pangalimbasog pirme nga ipakita an katadongan, pagtoo, gugma, kamurayawan, upod han mga natawag ha Ginoo nga may limpyo nga kasingkasing.”—2 Timoteo 2:22.

TIP

Pag-ampo antes magin makusog an imo hingyap ha sekso. Paghangyo kan Jehova nga tagan ka han “diri ordinaryo nga gahum” basi maatohan an pagsulay.—2 Corinto 4:7.

MAARAM KA BA . . . ?

An magluya nagpapadara la ha pagsulay. Pero an tunay nga lalaki o babaye nagpupugong han iya kalugaringon bisan kon waray nakakakita.

AN PLANO KO BUHATON!

Matitipigan ko nga limpyo an akon hunahuna kon ․․․․․

Imbes nga magpadara ha pagsulay, maniningkamot ako nga ․․․․․

An karuyag ko ipakiana ha akon (mga) kag-anak parte hini amo an ․․․․․

ANO HA IMO PANHUNAHUNA?

● Kay ano nga importante nga hinumdoman nga hi Jehova “andam magpasaylo”?—Salmo 86:5.

● Ginhimo ka han Dios nga may-ada seksuwal nga hingyap, pero nagsiring liwat hiya nga dapat magkaada ka pagpugong ha kalugaringon. Salit ano an ginlalaoman han Dios nga kaya mo buhaton?

[Blurb]

“Tikang han nalamposan ko ito nga problema, nagkaada ako limpyo nga konsensya ha atubangan ni Jehova, ngan diri ko gud ito igbabalyo ha bisan ano!”—Sarah

[Piktyur]

Kon nahipakulob ka samtang nadalagan, diri mo kinahanglan bumalik ha tinikangan. Sugad man, an pakabuhat utro hin masturbasyon diri nagpapasabot nga waray pulos an imo mga paningkamot nga magbag-o