Ha Bukid han mga Olibo, iginsumat pa la ni Jesus an mga ilustrasyon mahitungod han napulo nga birhen ngan han mga talanton. Paonan-o niya gintapos an iya baton ha pakiana han mga apostol may kalabotan ha tigaman han iya presensya ngan han ikatarapos hini nga sistema? Naghatag hiya hin ultimo nga ilustrasyon, an mahitungod han mga karnero ngan han mga kanding.

Gintikangan ito ni Jesus pinaagi ha pag-unabi han kahimtang ha ilustrasyon, ha pagsiring: “Pag-abot han Anak han tawo nga may daku nga awtoridad upod an ngatanan nga anghel, malingkod hiya ha iya harangdon nga trono.” (Mateo 25:31) Iya iginpatin-aw nga hiya an nangunguna nga tawohan hini nga ilustrasyon. Agsob niya tawagon an iya kalugaringon nga “an Anak han tawo.”—Mateo 8:20; 9:6; 20:18, 28.

San-o matutuman ini nga ilustrasyon? Kon hi Jesus ‘umabot na nga may daku nga awtoridad’ upod an mga anghel ngan lumingkod “ha iya harangdon nga trono.” Ginhisgotan na niya an mahitungod han “Anak han tawo nga nalusad upod han mga dampog ha langit nga may gahum ngan daku nga himaya” upod an iya mga anghel. San-o ito mahitatabo? “Katapos gud han kasakitan.” (Mateo 24:29-31; Marcos 13:26, 27; Lucas 21:27) Salit ini nga ilustrasyon matutuman kon umabot na hi Jesus nga may daku nga awtoridad. Katapos, ano an iya bubuhaton?

Hi Jesus nagsaysay: “Pag-abot han Anak han tawo . . . , an ngatanan nga nasud titirukon ha iya atubangan, ngan iya bubulagbulagon an mga tawo pariho ha ginbubuhat han paraataman kon iginbubulag niya an mga karnero ha mga kanding. Iya ibubutang an mga karnero ha iya too, kondi an mga kanding ha iya wala.”—Mateo 25:31-33.

May kalabotan ha mga karnero nga iginbulag sugad nga mga inuyonan, hi Jesus nagsiring: “Katapos, an Hadi masiring ha mga aada ha iya too: ‘Kadi kamo nga binendisyonan han akon Amay, panunda niyo an Ginhadian nga igin-andam ha iyo tikang pa ha tinikangan han kalibotan.’” (Mateo 25:34) Kay ano nga gin-uyonan han Hadi an mga karnero?

An Hadi nagsaysay: “Han ginugutom ako, iyo ako ginpakaon; han gin-uuhaw ako, iyo ako ginpainom. Han estranghero ako, iyo ako gin-abiabi; han waray ako iginsusul-ot, iyo ako gintagan hin bado. Han nagkasakit ako, iyo ako ginmangnoan. Han napriso ako, iyo ako ginbisita.” Han nagpakiana ini nga mga karnero, “an magtadong,” kon ha ano nga paagi nira ginhimo iton mag-opay nga buhat, hiya binaton: “Anoman an ginbuhat niyo ha usa nga pinakaubos hini nga akon kabugtoan, ginbuhat niyo ha akon.” (Mateo 25:35, 36, 40, 46) Waray nira himoa iton mag-opay nga buhat ha langit, kay waray didto may sakit o nagugutom. Sigurado nga ginbuhat nira ito para ha kabugtoan han Kristo dinhi ha tuna.

Kumusta man an mga kanding nga iginbutang ha wala? Hi Jesus nagsiring: “Ngan [an Hadi] masiring ha mga aada ha iya wala: ‘Iwas kamo ha akon, kamo nga ginhukman han Dios ngadto ha kalayo nga waray kataposan nga igin-andam para ha Yawa ngan ha iya mga anghel. Kay han ginugutom ako, waray ako niyo pakaona; ngan han gin-uuhaw ako, waray ako niyo painoma. Han estranghero ako, waray ako niyo abiabiha; han waray ako iginsusul-ot, waray ako niyo tagi hin bado; han may sakit ngan priso ako, waray ako niyo mangnoi.’” (Mateo 25:41-43) Angayan ini nga paghukom kay waray tratara hin maopay han mga kanding an kabugtoan han Kristo dinhi ha tuna, nga sadang unta nira buhaton.

Hinbaroan han mga apostol nga ito nga paghukom ha tidaraon magkakaada hin permanente—waray kataposan—nga resulta. Ginsidngan hira ni Jesus: “[An Hadi masiring], ‘Ha pagkamatuod, susumatan ko kamo: Anoman an waray niyo buhata ha usa hini nga mga ubos, waray niyo buhata ha akon.’ Ngan huhukman hira hin permanente nga kamatayon, pero an magtadong makarawat hin kinabuhi nga waray kataposan.”—Mateo 25:45, 46.

An baton ni Jesus ha pakiana han mga apostol angay gud pamalandungon han iya mga sumurunod. Mabulig ito ha ira basi mausisa an ira mga disposisyon ngan buhat.