Tikang ha Jerico, hi Jesus ngan an iya mga disipulo kumadto ha Betania, ngan ikatulo ka gab-i na nira didto. Yana, temprano han Lunes han aga, Nisan 10, nagbiyahe hira ngadto ha Jerusalem. Nagugutom hi Jesus. Salit han nakakita hiya hin kahoy nga igera gindaop niya ito. May bunga ba ito?

Ikatarapos na han Marso, pero Hunyo pa an pamunga han igera. Bisan pa hito, temprano nga nagkaada ito hin mga dahon. Salit naghunahuna hi Jesus nga may bunga na ito. Pero waray hiya nakita. Malimbong pagkit-on an kahoy tungod han mga dahon hito. Katapos hi Jesus nagsiring: “Tikang yana waray na gud makakakaon han imo bunga.” (Marcos 11:14) An kahoy nauga dayon, ngan an kahulogan hini hibabaroan kinabuwasan.

Waray pag-iha, hi Jesus ngan an iya mga disipulo inabot ha Jerusalem. Kinadto hiya ha templo nga iya gin-usisa han naglabay nga kulop. Pero yana may bubuhaton pa hiya, nga puropariho han iya ginbuhat han Paskua han 30 C.E., tulo ka tuig na an naglabay. (Juan 2:14-16) Hini nga takna ginpaiwas ni Jesus “an namamaligya ngan namamalit” ha templo. Iya liwat ginbalintong “an mga lamesa han mga parabalyo hin kwarta ngan an mga lingkoran han mga parabaligya hin sarapati.” (Marcos 11:15) Gindid-an pa ngani niya pag-agi ha bungsaran han templo an bisan hin-o nga may mga dara nga tikadto ha iba nga bahin han syudad.

Kay ano nga ginpaiwas ni Jesus an mga parabalyo hin kwarta ngan an namamaligya hin mga hayop ha templo? Hiya nagsiring: “Diri ba ini an iginsurat: ‘An akon balay tatawagon nga balay nga arampoan han ngatanan nga nasud’? Pero ginhimo niyo ini nga lungib han mga kawatan.” (Marcos 11:17) Gintawag niya nga kawatan ini nga mga tawo kay duro kamahal an ira pagbaligya ha mga mamaralit hin mga hayop nga igharalad. Gintagad ni Jesus an ira pagnegosyo sugad nga panikas o pangawat.

Syempre, hinbatian han punoan nga mga saserdote, mga eskriba, ngan mga lider han katawohan an ginbuhat ni Jesus, ngan namiling na liwat hira hin paagi basi ipapatay hiya. Pero may-ada hira problema. Diri hira maaram kon paonan-o ito bubuhaton kay nagsisinunod kan Jesus an damu nga tawo basi mamati ha iya.

Labot la han mga Judio, tinambong liwat ha Paskua an mga proselita, mga nakombirte ha relihiyon han mga Judio. Upod ha ira an mga Griego nga kumadto basi magsingba durante hito nga piyesta. Ini nga mga tawo dinaop kan Felipe, bangin tungod han iya Griego nga ngaran, ngan naghangyo hira nga makigkita kan Jesus. Tungod kay bangin diri sigurado hi Felipe kon angayan ba ini, nagpakiana hiya kan Andres. Igin-istorya nira ini kan Jesus nga posible nga nakadto pa ha templo.

Maaram hi Jesus nga pipira ka adlaw na la, mamamatay na hiya. Salit diri ini an panahon basi tagbawon an pagkamausisa han mga tawo o magin popular. Ginbaton niya an duha nga apostol pinaagi hin ilustrasyon, ha pagsiring: “Inabot na an oras basi himayaon an Anak han tawo. Ha pagkamatuod susumatan ko kamo, Kon an usa nga liso han trigo diri mahulog ha tuna ngan diri mamatay, magpapabilin ito nga usa la nga liso; pero kon mamatay ito, mamumunga ito hin damu.”—Juan 12:23, 24.

Baga hin gutiay la an kapulsanan han usa nga liso han trigo. Pero kon itanom ito ha tuna ngan “mamatay” sugad nga liso, maturok ito ngan paglabay han panahon madaku ngan mamumunga hin damu. Ha pariho nga paagi, hi Jesus usa nga perpekto nga tawo. Pero, pinaagi han iya pagin matinumanon ha Dios tubtob ha kamatayon, makakakarawat hin kinabuhi nga waray kataposan an damu nga andam magsakripisyo pariho ha iya. Salit hi Jesus nagsiring: “An nahigugma ha iya kalag mawawad-an hito, pero an nasisina ha iya kalag dinhi hini nga kalibotan magpapanalipod hito para ha kinabuhi nga waray kataposan.”—Juan 12:25.

Hi Jesus diri naghuhunahuna han iya la kalugaringon kay hiya nagsiring: “An bisan hin-o nga naruruyag mag-alagad ha akon, sadang hiya sumunod ha akon, ngan bisan diin ako kumadto, aadto liwat an akon surugoon. An bisan hin-o nga naruruyag mag-alagad ha akon, bibendisyonan hiya han Amay.” (Juan 12:26) Makalilipay gud ito nga balos! Adton bibendisyonan han Amay magigin kaupod han Kristo ha Ginhadian.

Han ginhunahuna ni Jesus an duro nga pag-antos ngan masakit nga kamatayon nga iya maieksperyensyahan, hiya nagsiring: “An akon kalag nasusubo gud yana, ngan ano an akon masisiring? Amay, talwasa ako ha mahitatabo hini nga oras.” Pero diri ginlilikyan ni Jesus an pagtuman han kaburut-on han Dios. Hiya nagdugang: “Kondi ini nga oras kinahanglan umabot ha akon, amo nga aanhi ako.” (Juan 12:27) Nauyon hi Jesus ha ngatanan nga katuyoan han Dios, upod na an paghalad han iya mismo kinabuhi.