Paglabay hin pipira ka panahon tikang han nag-inop hi Hadi Nabukodonosor mahitungod han estatwa, naghimo hiya hin daku nga imahen nga bulawan. Iginbutang niya ito ha kapatagan han Dura ngan ginpatawag an pinakaimportante nga mga tawo ha iya nasasakopan, upod na hira Sadrak, Mesak, ngan Abednego, basi magtirirok ha atubangan hito. An hadi nagsugo: ‘Pakabati niyo han tunog han mga trumpeta, arpa, ngan dagku nga plawta, yukbo kamo ha imahen! Bisan hin-o nga diri yumukbo ilalabog ha nagkakalayo nga hudno.’ Mayukbo ba ha imahen an tulo nga Hebreohanon, o hi Jehova la an ira sisingbahon?

Katapos, nagsugo an hadi nga patokaron an musika. An ngatanan yinukbo ngan nagsingba ha imahen labot la kanda Sadrak, Mesak, ngan Abednego. May mga nakakita ha ira ngan iginsumat ito ha hadi: ‘An tulo nga Hebreohanon nadiri pagsingba ha imahen nga imo ginhimo.’ Ginpatawag hira ni Nabukodonosor ngan ginsidngan: ‘Tatagan ko kamo hin usa pa nga higayon basi singbahon an imahen. Kon dumiri kamo, ilalabog ko kamo ha hudno. Waray dios nga makakatalwas ha iyo tikang ha akon.’ Hira binaton: ‘Diri namon kinahanglan hin usa pa nga higayon. Kaya kami talwason han amon Dios. Pero bisan kon diri niya kami talwason, O hadi, diri kami masingba ha imahen.’

Nasina gud hi Nabukodonosor. Ginsidngan niya an iya mga surugoon: ‘Papasoa an hudno hin pito ka pilo kay ha normal nga kapaso hito!’ Katapos, ginsugo niya an iya mga sundalo: ‘Gaposa ini nga kalalakin-an ngan  ilabog ha hudno!’ Duro gud an kapaso han hudno, salit pagdaop han mga sundalo dida hito, namatay hira. An tulo nga Hebreohanon nahulog ha kalayo. Pero han ginkita ni Nabukodonosor an sulod han hudno, upat nga lalaki an iya nakita nga naglalakat-lakat, imbes nga tulo. Nahadlok hiya ngan nagpakiana ha iya mga opisyal: ‘Di’ ba tulo la nga lalaki an ginlabog ha hudno? Upat an akon nakikita, ngan an usa baga hin anghel!’

Humirani pa hi Nabukodonosor ha hudno ngan sininggit: ‘Gawas kamo mga surugoon han Gihitaasi nga Dios!’ Nahipausa gud an ngatanan han nakita nira hira Sadrak, Mesak, ngan Abednego nga ginawas ha hudno. An ira panit, buhok, ngan bado waray masunog, waray man la ngani hira manimaho hin kalayo.

Hi Nabukodonosor nagsiring: ‘Gamhanan an Dios nira Sadrak, Mesak, ngan Abednego. Nagsugo hiya hin anghel basi talwason hira. Waray iba nga dios nga pariho han ira Dios.’

Pariho han tulo nga Hebreohanon, determinado ka ba liwat nga magin maunungon kan Jehova anoman an mahitabo?