An pagkaada anak mahimo makapalipay ngan makapaistres ha mag-asawa. Sugad nga bag-o nga mga kag-anak, bangin mahipausa kamo nga kadak-an han iyo panahon ngan kusog nagagamit ha pag-ataman han iyo anak. An kakulang hin katurog ngan pagbag-o ha emosyon mahimo maghatag hin tensyon ha iyo relasyon. Salit kinahanglan niyo nga duha maghimo hin mga pagbag-o basi maataman an iyo anak ngan matipigan an iyo maopay nga relasyon sugad nga mag-asawa. Paonan-o makakabulig an mga sagdon han Biblia ha pag-atubang hini nga mga kahimtang?

KON ANO AN GINSISIRING HAN BIBLIA: “An gugma nagpapasensya ngan buotan.” An gugma liwat “diri naghuhunahuna han kalugaringon la nga kaopayan, ngan diri madali masina.” (1 Corinto 13:4, 5) Sugad nga bag-o nga nanay, natural la nga ipokus mo an imo atensyon ha iyo anak. Kondi, bangin umabat an imo bana nga ginbabalewaray mo na hiya, salit hinumdumi nga kinahanglan liwat niya an imo atensyon. Ha mapailubon ngan buotan nga paagi, mahimo mo ipaabat ha iya nga kinahanglan mo an iya bulig ha pag-ataman han iyo anak.

“Kamo nga mga bana, padayon nga tratara . . . hin maaramon an iyo asawa.” (1 Pedro 3:7) Hunahunaa nga kadak-an han iya kusog gagamiton niya ha pag-ataman han iyo anak. May bag-o hiya nga mga responsabilidad salit bangin naiistres hiya, kinakapoy, o nasusubo. Usahay, bangin masina pa ngani hiya ha imo, pero pagpabilin nga kalmado, kay an “mahinay ha pagkasina maoroopay kay han kusgan.” (Proberbios 16:32) Magin masinabuton, ngan suportahi hiya.​—Proberbios 14:29.

KON ANO AN IMO MAHIHIMO:

• Mga Amay: Buligi an imo asawa ha pagmangno ha iyo anak, bisan ha gab-i. Ibani an panahon nga imo ginagamit ha iba nga buruhaton basi magkaada ka mas daku nga panahon ha imo asawa ngan han iyo anak

• Mga Iroy: Kon karuyag han imo bana nga bumulig ha pagmangno ha iyo anak, pabuliga hiya. Kon nagsayop hiya, ayaw hiya isgi, kondi tutdui hiya ha buotan nga paagi

KON ANO AN GINSISIRING HAN BIBLIA: “Hira magigin usa nga unod.” (Genesis 2:24) Bisan kon may bag-o na kamo nga membro han iyo pamilya, hinumdumi nga ikaw ngan an imo padis usa pa gihapon nga unod. Pangalimbasog nga magin marig-on pirme an iyo pag-asawa.

Mga asawa, apresyara an bulig ngan suporta han imo bana. An imo pagpakita hin apresasyon mabulig nga magin mas duok kamo. (Proberbios 12:18) Mga bana, sumati an imo asawa nga hinigugma ngan ginpapabilhan mo gud hiya. Dayawa hiya ha iya pagmangno ha iyo pamilya.​—Proberbios 31:10, 28.

“An kada tagsa padayon nga mangalimbasog para ha kaopayan han iba, diri para ha iya kalugaringon.” (1 Corinto 10:24) Pirme buhata kon ano an makakaopay ha imo padis. Sugad nga mag-asawa, magkaada panahon ha pag-istorya, paghatag hin kumendasyon, ngan pagpamati ha usa kag usa. Mahitungod ha seksuwal nga panginahanglan, ayaw hunahunaa an imo la kalugaringon. Hunahunaa liwat an panginahanglan han imo padis. An Biblia nasiring: “Ayaw niyo pugngi an usa kag usa, labot la kon nagsabot kamo.” (1 Corinto 7:3-5) Salit tangkod nga pag-istoryahi niyo an mahitungod hito. An iyo pagpailob ngan pagin masinabuton magpaparig-on han iyo pag-asawa.

KON ANO AN IMO MAHIHIMO:

• Paggahin hin panahon nga kamo la nga duha

• Ipaabat ha imo padis nga hinigugma mo hiya pinaagi ha pagbuhat hin simple nga butang sugad han pagpadara hin mensahe o paghatag hin regalo

KON ANO AN GINSISIRING HAN BIBLIA: “Tikang ha imo katawo hinbaroan mo an baraan nga mga sinurat, nga nakakabulig ha imo nga magin maaramon para ha katalwasan.” (2 Timoteo 3:15) Planoha kon paonan-o niyo tututdoan an iyo anak. Bisan han iginbuburod pa la, may abilidad na hiya ha paghibaro, nakakakilala na han iyo tingog, ngan mahimo na magreak ha iyo emosyon. Basahi hiya bisan kon minasus-an pa. Diri man niya nasasabtan an iyo ginbabasa, makakabulig ito ha iya nga magin hilig an pagbasa pagdaku niya.

Nababatian na han imo minasus-an an imo gin-iistorya mahitungod ha Dios. Pabatia hiya ha imo pag-ampo kan Jehova. (Deuteronomio 11:19) Bisan kon nag-uuyag kamo, pag-istorya mahitungod han mga butang nga ginhimo han Dios. (Salmo 78:3, 4) Samtang nagtutubo an iyo anak, aabaton niya an iyo gugma kan Jehova ngan mahibabaro liwat nga higugmaon Hiya.

KON ANO AN IMO MAHIHIMO:

• Pag-ampo para hin kinaadman ha pagtutdo ha imo anak

• Uroutroha kon ano an karuyag mo itutdo ha imo anak basi mahibaro hiya samtang bata pa