Sugad han imo hinbaroan hini nga brosyur, damu nga prinsipyo han Biblia an makakabulig ha imo ngan ha imo pamilya. Karuyag ni Jehova nga magmalipayon kamo. Nagsasaad hiya nga kon uunahon niyo an pagsingba ha iya, an iba pa nga butang idudugang ha iyo. (Mateo 6:33) Karuyag gud niya nga magin sangkay niya kamo. Salingabota an tagsa nga higayon basi magin sangkay han Dios. Ito an gidadakui nga pribilehiyo nga puydi makarawat han usa nga indibiduwal.​—Mateo 22:37, 38.

KON ANO AN GINSISIRING HAN BIBLIA: “‘Magigin amay ako niyo, ngan magigin mga anak ko kamo,’ siring ni Jehova.” (2 Corinto 6:18) Karuyag han Dios nga magin duok ka niya nga sangkay. An usa nga paagi basi mahimo ito amo an pag-ampo. Gin-aaghat ka ni Jehova nga “padayon nga mag-ampo.” (1 Tesalonica 5:17) Andam hiya mamati han imo mga inaabat ngan mga kabaraka. (Filipos 4:6) Kon nag-aampo ka kaupod han imo pamilya, makikita nira nga totoo gud hi Jehova ha imo.

Dugang pa ha pakiistorya ha Dios, kinahanglan mo liwat mamati ha iya. Mahihimo mo ito pinaagi ha pag-aram ha iya Pulong ngan ha mga publikasyon nga basado ha Biblia. (Salmo 1:1, 2) Pamalandonga an imo hinbabaroan. (Salmo 77:11, 12) Ha pagpamati ha Dios, kinahanglan mo liwat umatender hin regular ha Kristiano nga mga katirok.​—Salmo 122:1-4.

An pag-istorya ha iba mahitungod kan Jehova usa pa nga importante nga paagi basi maparig-on an imo relasyon ha iya. Samtang mas ginbubuhat mo ito, magigin mas duok ka ha iya.​—Mateo 28:19, 20.

KON ANO AN IMO MAHIHIMO:

• Paggahin hin panahon kada adlaw ha pagbasa han Biblia ngan ha pag-ampo

• Sugad nga pamilya, unaha an espirituwal nga mga buruhaton kay ha kaliawan ngan pagpahalibway

KON ANO AN GINSISIRING HAN BIBLIA: “Magin duok kamo ha Dios, ngan magigin duok hiya ha iyo.” (Santiago 4:8) Kinahanglan niyo mag-eskedyol hin regular nga programa han pagsingba han pamilya ngan sundon ito. (Genesis 18:19) Kondi labaw pa hito an ginkikinahanglan. Sadang magin parti an Dios han iyo adlaw-adlaw nga pagkinabuhi. Parig-ona an relasyon ha Dios han iyo pamilya pinaagi ha pag-istorya mahitungod ha iya “kon malingkod ka ha imo balay, ngan kon maglalakat ka ha dalan, ngan kon ikaw mahigda, ngan ha imo pagbuhat.” (Deuteronomio 6:6, 7) Himoa nga tumong nga magin pariho kan Josue nga nagsiring: “Kondi an ha akon ngan ha akon panimalay, mag-aalagad kami kan Jehova.”​—Josue 24:15.

KON ANO AN IMO MAHIHIMO:

• Magkaada regular ngan organisado nga programa han pagtutdo nga ginhuhunahuna an panginahanglan han kada membro han pamilya