An Ginhadian han Dios usa nga gobyerno ha langit. Sasaliwnan hito an ngatanan nga gobyerno han tawo ngan gagamiton ito han Dios basi matuman an iya kaburut-on ha langit ngan dinhi ha tuna. Maopay gud ito nga sumat. Diri mag-iiha, ihahatag han Ginhadian han Dios an maopay nga gobyerno nga ginhihingyap han mga tawo. Papahinaboon hito nga magkaurosa an ngatanan nga tawo ha tuna.​—Basaha an Daniel 2:44; Mateo 6:9, 10; 24:14.

An usa nga ginhadian kinahanglan may-ada hadi. Ginpili ni Jehova an iya Anak nga hi Jesu-Kristo basi magin Hadi han Iya Ginhadian.​—Basaha an Pahayag 11:15.

Kitaa an video nga Ano an Ginhadian han Dios?

An Anak han Dios an angayan magin Hadi tungod kay buotan hiya ngan nadapig ha kon ano an husto. (Mateo 11:28-30) May gahum liwat hiya ha pagbulig ha mga tawo tungod kay tikang ha langit maghahadi hiya ha bug-os nga tuna. Katapos niya banhawon, sinaka hiya ha langit ngan liningkod ha too ni Jehova ngan naghulat han iya paghadi. (Hebreo 10:12, 13) Ha urhi, iginhatag ha iya han Dios an gahum ha pagmando.​—Basaha an Daniel 7:13, 14.

Usa nga grupo nga gintatawag nga “mga baraan” an makakaupod ni Jesus ha paghadi ha langit. (Daniel 7:27) An siyahan nga mga baraan nga ginpili amo an matinumanon nga mga apostol ni Jesus. Tubtob yana, hi Jehova padayon  nga nagpipili hin magtinumanon nga kalalakin-an ngan kababayin-an sugad nga mga baraan. Pariho kan Jesus, magigin espiritu hira kon banhawon na hira.​—Basaha an Juan 14:1-3; 1 Korinto 15:42-44.

Pira kadamu nga tawo an makadto ha langit? Gintawag hira ni Jesus nga ‘gutiay nga panon.’ (Lukas 12:32) May kadamu hira nga 144,000, ngan mamandoan nira an tuna kaupod ni Jesus.​—Basaha an Pahayag 14:1.

An Ginhadian han Dios nagtikang magmando han 1914. * An siyahan nga ginhimo ni Jesus sugad nga Hadi amo an paglabog kan Satanas ngan han iya mga demonyo nganhi ha tuna. Salit nasina gud hi Satanas ngan nagpahinabo hin kasamok ha bug-os nga tuna. (Pahayag 12:7-10, 12) Tikang hito, nagtikaduro an problema han mga tawo. An mga girra, gutom, sakit, ngan linog bahin han “tigaman” nga an Ginhadian hirani na magmando ha tuna.​—Basaha an Lukas 21:7, 10, 11, 31.

Pinaagi han pagsangyaw ha bug-os nga kalibotan, ginpapahinabo na han Ginhadian han Dios nga magkaurosa an daku nga panon han mga tawo ha ngatanan nga nasud. Minilyon nga mag-aghop an nagigin sakop han pagmando ni Jesus. Papanalipdan hira han Ginhadian han Dios kon bungkagon na hito inin maraot nga sistema. Salit an ngatanan nga naruruyag makapahimulos han mga bendisyon han Ginhadian han Dios sadang magin masinugtanon kan Jesus.​—Basaha an Pahayag 7:9, 14, 16, 17.

Ha sulod hin 1,000 ka tuig, papahinaboon han Ginhadian nga matuman an orihinal nga katuyoan han Dios para ha katawohan. An bug-os nga tuna magigin paraiso. Katapos hito, ibabalik ni Jesus an Ginhadian ha iya Amay. (1 Korinto 15:24-26) May kilala ka ba nga karuyag mo sumatan mahitungod han Ginhadian han Dios?​—Basaha an Salmo 37:10, 11, 29.