SUGAD han igintagna ni Jehova, nabahin an Israel han binaya hi Salomon ha putli nga pagsingba. An iya anak nga sumaliwan ha iya, hi Rehoboam, madarahog. Tungod hito, nagrebelde an napulo nga tribo han Israel ngan nag-establisar han norte nga ginhadian han Israel. Duha nga tribo an nagpabilin nga maunungon ha hadi ha tulin ni David ha Jerusalem, salit naestablisar an sur nga ginhadian han Juda.

Masamok an kasaysayan hiton duha nga ginhadian, kadak-an tungod kay an mga hadi hito waray pagtoo ngan matalapasnon. Nagin mas maraot pa ngani an Israel kay ha Juda, tungod kay tikang pa ha tinikangan, igin-aghat han mga hadi hito an palso nga pagsingba. Bisan pa han mga milagro nga ginbuhat han mga propeta sugad kanda Elias ngan Eliseo​—nga pariho nagbanhaw hin patay—​an mga Israelita pauroutro nga nagbuhat hin maraot. Ha urhi, gintugotan han Dios nga bungkagon han Asirya an norte nga ginhadian.

An Juda nagpabilin hin sobra usa ka siglo kay ha Israel, kondi ginsirotan liwat ito han Dios. Pipira la nga hadi han Juda an namati ha pahamangno han mga propeta han Dios ngan nangalimbasog pagpabalik han nasud kan Jehova. Pananglitan, ginpoo ni Hadi Josia an palso nga pagsingba ngan gin-ayad utro an templo han Dios. Han nabilngan an kopya han Balaud han Dios nga iginhatag pinaagi kan Moises, napagios gud hi Josia salit mas ginpakusog niya an iya reporma ha pagbag-o.

Kondi, makasurubo nga waray sunda han mga sumaliwan kan Josia an iya maopay nga ginhimo. Salit, gintugotan ni Jehova nga sakupon han Babilonya an Juda pinaagi ha pagbungkag han Jerusalem ngan han templo hito. An mga nakatalwas gindistyero ha Babilonya. Nagtagna an Dios nga ito nga pagkadistyero maabot hin 70 ka tuig. Nagin binayaan an Juda hito nga panahon​—tubtob nga sugad han iginsaad, an mga Judio gintugotan pagbalik ha ira lugar.

Kondi, waray na hadi ha tulin ni David an magmamando tubtob nga magmando an iginsaad nga Manluluwas, an igintagna nga Mesias. Ginpamatud-an han kadam-an han mga hadi ha Jerusalem nga an diri-hingpit nga tawo diri kwalipikado magmando. An Mesias gud la an kwalipikado. Tungod hito, hi Jehova nagsiring ha ultimo nga hadi ha tulin ni David: “Kuhaa an korona; . . . Ini liwat mawawaray na, ngada nga hiya umabot kan kanay katadongan amo ini; ngan akon ihahatag ini ha iya.”​—Esekiel 21:26, 27.

​—Iginbasar ha 1 Hadi; 2 Hadi; 2 Kronikas kapitulo 10 tubtob 36; Jeremias 25:8-11.