1, 2. Ano nga milagro an ginhimo nira Pedro ngan Juan hirani ha ganghaan han templo?

 AN DAMU nga tawo nga nagkakalakat nasisirakan han adlaw ha kakurulpon. Nagkakaabot ha templo an matinumanon nga mga Judio ngan an mga disipulo han Kristo. Diri na maiha an “oras han pag-ampo.” a (Buh. 2:46; 3:1) Kaupod han kadam-an hira Pedro ngan Juan, ngan nagtitipakadto hira ha ganghaan han templo nga gintatawag nga Matahom. Ha butnga han iristorya ngan aringasa han pitad han mga tawo, mababatian nga nagpapalimos an usa nga sobra 40 anyos nga lalaki nga piay tikang pa ha katawo.—Buh. 3:2; 4:22.

² Han hirani na hira Pedro ngan Juan, nangaro ha ira hin kwarta an makililimos. Inundang an mga apostol salit nagkita ha ira an lalaki, nga naglalaom nga tatagan hiya hin kwarta. “Waray ako silber ngan bulawan,” siring ni Pedro, “kondi kon ano an may-ada ako ihahatag ko ha imo. Ha ngaran ni Jesu-Kristo nga Nazareno, lakat!” Imadyina an kahipausa han mga tawo han ginkaptan ni Pedro an kamot han piay nga lalaki ngan—ha siyahan nga higayon ha iya kinabuhi—tinindog an lalaki! (Buh. 3:6, 7) Naiimadyin mo ba nga ginkikinita han lalaki an iya mga tiil ngan nangangalimbasog nga ipitad ito ha siyahan nga higayon? Diri urusahon nga naglukso-lukso hiya ngan nagdayaw ha Dios ha daku nga tingog!

3. Ano nga urusahon nga regalo an mahimo makarawat han lalaki nga piay hadto ngan han mga tawo?

³ Eksayted gud an mga tawo ngan nagdadlagan hira ngadto kanda Pedro ngan Juan ha pasilyo ni Solomon. Dinhi, ha lugar mismo diin nagtutdo hi Jesus hadto, iginsaysay ha ira ni Pedro kon paonan-o nagin posible ini nga milagro. (Juan 10:23) Igintanyag niya ha mga tawo ngan ha lalaki nga piay hadto an usa nga regalo nga mas birilhon pa ha silber o bulawan. Labaw pa an nahiuupod hini nga regalo kay han pisikal nga pagtambal. Amo ini an oportunidad nga magbasol, mapara an mga sala,  ngan magin sumurunod han ginpili ni Jehova nga “Punoan nga Ahente han kinabuhi,” hi Jesu-Kristo.—Buh. 3:15.

4. (a) Katapos han milagroso nga pagtambal, ano an karuyag buhaton han mga tawo nga may hitaas nga katungdanan? (b) Ano an duha nga pakiana nga aton babatunon?

⁴ Diri gud makakalimtan ito nga adlaw! Gintambal an usa nga lalaki ngan nakakalakat na hiya. Yinukot pa an gintagan hin oportunidad nga matambal ha espirituwal basi makaglakat hira nga takos ha Dios. (Col. 1:9, 10) Dugang pa, tungod han nahitabo hito nga adlaw, nangalimbasog an mga tawo nga may hitaas nga katungdanan nga pugngan an maunungon nga mga disipulo han Kristo ha pagtuman han sugo ni Jesus nga isangyaw an mensahe han Ginhadian. (Buh. 1:8) Ano an aton mahibabaroan ha mga paagi nga gin-gamit ngan ha disposisyon nga iginpakita nira Pedro ngan Juan—‘diri edukado ngan ordinaryo la nga mga tawo’—samtang nagsasangyaw hira ha damu nga tawo? b (Buh. 4:13) Ngan paonan-o naton masusubad an paagi han pag-atubang nira ngan han iba nga mga disipulo ha pagkontra?

5. Ano an aton mahibabaroan ha paagi han pakiistorya ni Pedro ha mga tawo?

⁵ Nakiistorya hira Pedro ngan Juan ha mga tawo. Maaram hira nga posible an pipira hini diri pa la maiha nga naghangyo nga patayon hi Jesus. (Mar. 15:8-15; Buh. 3:13-15) Hunahunaa la an kaisog nga iginpakita ni Pedro han waray kahadlok nga iginsumat niya nga an piay nga lalaki gintambal ha ngaran ni Jesus. Maisugon nga iginsumat ni Pedro an kamatuoran. Prangka nga nagyakan hiya nga may baratunon an mga tawo ha kamatayon han Kristo. Pero waray magdumot hi Pedro hini nga mga tawo, kay ‘ginbuhat nira ito tungod ha pagkaignorante.’ (Buh. 3:17) Gintawag niya hira nga kabugtoan ngan nagpokus ha maopay nga sumat han Ginhadian. Kon magbabasol hira ngan matoo ha Kristo, “an mga panahon han pagrepresko” maabot ha ira tikang kan Jehova. (Buh. 3:19) Kinahanglan liwat naton magin maisugon ngan prangka kon nagpapasamwak han tiarabot nga paghukom han Dios. Pero diri gud kita dapat magin agresibo, magin maisog, o maghukom ha mga tawo. Lugod, ginhuhunahuna ta nga an aton nasasangyawan may potensyal nga magin aton kabugtoan, ngan pariho kan Pedro, nagpupokus kita labi na ha maopay nga sumat han Ginhadian.

6. Paonan-o iginpakita nira Pedro ngan Juan an pagkamapainubsanon?

⁶ Mapainubsanon an mga apostol. Waray nira angkona an kadayawan ha milagro nga ira ginhimo. Hi Pedro nagsiring ha mga tawo: “Kay ano  nga nagkikinita kamo ha amon nga sugad hin napalakat namon hiya pinaagi han amon kalugaringon nga gahum o han debosyon ha Dios?” (Buh. 3:12) Maaram hi Pedro ngan an iba nga mga apostol nga anoman nga maopay nga ira nahimo ha ira ministeryo, tungod ito han gahum han Dios, diri han ira kalugaringon nga kusog. Salit mapainubsanon nga iginhatag nira kan Jehova ngan kan Jesus an ngatanan nga kadayawan ha ira mga nahimo.

7, 8. (a) Ano nga regalo an maitatanyag naton ha mga tawo? (b) Paonan-o natutuman yana an saad nga “pagpahiuli han ngatanan nga butang”?

⁷ Kinahanglan liwat kita magin mapainubsanon kon iginsasangyaw naton an Ginhadian. Oo, an espiritu han Dios diri nahatag ha mga Kristiano ha moderno nga panahon hin gahum ha pagtambal. Pero mabubuligan ta an mga tawo nga magkaada pagtoo ha Dios ngan ha Kristo ngan makarawat an amo gihapon nga regalo nga igintanyag ni Pedro—an oportunidad nga mapasaylo an ira mga sala ngan makakarawat hin karepresko tikang kan Jehova. Kada tuig, ginatos ka yukot an nakarawat hini nga oportunidad ngan nagigin bawtismado nga mga disipulo han Kristo.

⁸ Oo, nagkikinabuhi na kita ha panahon han “pagpahiuli han ngatanan nga butang” nga gin-unabi ni Pedro. Sugad nga katumanan han “iginyakan han Dios pinaagi ha baba han iya baraan nga mga propeta han naglabay,” naestablisar an Ginhadian ha langit han 1914. (Buh. 3:21; Sal. 110:1-3; Dan. 4:16, 17) Waray pag-iha katapos hito, ginbuligan han Kristo an iya mga disipulo nga maipahiuli an tinuod nga pagsingba ha tuna. Sugad nga resulta, minilyon an nagin mga sakop han Ginhadian han Dios ngan aada na ha espirituwal nga paraiso. Ginhukas nira an daan ngan diri maopay nga personalidad ngan ‘iginsul-ot an bag-o nga personalidad nga ginlarang uyon ha kaburut-on han Dios.’ (Efe. 4:22-24) Pariho han pagtambal ha piay nga makililimos, inin urusahon nga buruhaton natutuman, diri pinaagi han pangalimbasog han mga tawo, kondi pinaagi han espiritu han Dios. Pariho kan Pedro, kinahanglan maisugon ngan epektibo nga gamiton naton an Pulong han Dios ha pagtutdo ha iba. Naglalampos kita ha pagbulig ha mga tawo nga magin mga disipulo han Kristo pinaagi han gahum han Dios, diri han aton kalugaringon nga kusog.

9-11. (a) Ano an nagin reaksyon han mga lider han mga Judio ha mensahe nira Pedro ngan Juan? (b) Ano an determinasyon han mga apostol?

⁹ Nagkarigumok an mga tawo tungod han ginsiring ni Pedro ngan tungod han paglukso-lukso ngan pagguliat han lalaki nga piay hadto. Salit an kapitan han templo—nga gintokahan nga manginano ha seguridad ha templo—ngan an punoan nga mga saserdote inabot dayon basi mag-imbistigar. Ini hira posible nga mga Saduseo, usa nga sekta nga riko  ngan maimpluwensya ha politika nga nangangalimbasog nga magkaada murayaw nga relasyon ha mga Romano, nagsalikway han yinakan nga balaud nga ginsusunod gud han mga Pariseo, ngan diri natoo ha pagkabanhaw. c Nasina gud hira han nakit-an nira ha templo hira Pedro ngan Juan, nga maisugon nga nagsasangyaw nga nabanhaw na hi Jesus!

¹⁰ Ginpriso hinin nasisina nga mga parakontra hira Pedro ngan Juan ngan kinabuwasan gindara hira ha hitaas nga korte han mga Judio. Para hini nga mga magmarando, hira Pedro ngan Juan ‘diri edukado ngan ordinaryo la nga mga tawo’ nga waray katungod ha pagtutdo ha templo. Waray hira mag-eskwela ha bisan ano nga kilala nga eskwelahan ha relihiyon. Pero tungod kay prangka hira ngan may kompyansa, nahipausa an korte. Kay ano nga makakombinse gud hira Pedro ngan Juan? An usa nga rason tungod kay “kaupod hira hadto ni Jesus.” (Buh. 4:13) An ira Agaron nagtutdo nga may tinuod nga awtoridad, diri pariho ha mga eskriba.—Mat. 7:28, 29.

¹¹ Ginsugo han korte an mga apostol nga umundang ha pagsangyaw. Hito nga komunidad, an korte may daku nga awtoridad. Pipira pa la ka semana antes hini, han ginhukman hi Jesus hito nga korte, an mga membro hito nagsiring: “Angay hiya mamatay.” (Mat. 26:59-66) Pero waray mahadlok hira Pedro ngan Juan. Samtang natindog ha atubangan hinin riko, edukado, ngan maimpluwensya nga kalalakin-an, waray kahadlok kondi matinalahuron nga nagsiring hira Pedro ngan Juan: “Kon husto ha pagkita han Dios nga mamati ha iyo imbes nga ha Dios, kamo an paghukom. Kondi para ha amon, diri namon mahihimo nga umundang ha pagyakan mahitungod han mga butang nga amon nakita ngan nabatian.”—Buh. 4:19, 20.

12. Ano an makakabulig ha aton nga magkaada kaisog ngan kompyansa?

¹² Naipapakita mo ba an sugad hito nga kaisog? Ano an imo inaabat kon may oportunidad ka nga magsangyaw ha riko, edukado, o maimpluwensya nga mga tawo ha iyo komunidad? Ano man kon tamayon ka han imo mga kapamilya, kaeskwela, o katrabaho tungod han imo mga gintotoohan? Nahahadlok ka ba? Kon oo, kaya mo malamposan ito nga pag-abat. Han nakanhi hi Jesus ha tuna, gintutdoan niya an mga apostol kon paonan-o didepensahan an ira mga gintotoohan nga may kompyansa ngan ha matinalahuron nga paagi. (Mat. 10:11-18) Katapos hiya banhawon, nagsaad hiya ha iya mga disipulo nga padayon nga makakaupod nira hiya “ha ngatanan nga adlaw tubtob ha ikatarapos han sistema han mga butang.” (Mat. 28:20) Ha paggiya ni Jesus, gintututdoan kita han “matinumanon ngan maaramon nga uripon” kon paonan-o didepensahan an aton mga gintotoohan. (Mat. 24:45-47; 1 Ped. 3:15) Ginhihimo ini pinaagi ha mga instruksyon nga iginhahatag ha mga katirok  han kongregasyon, sugad han An Aton Kristiano nga Pagkinabuhi Ngan Ministeryo, ngan pinaagi ha mga publikasyon nga iginbase ha Biblia, sugad han mga artikulo ha serye nga “Baton ha mga Pakiana Mahitungod ha Biblia” ha jw.org nga website. Ginagamit mo ba hin maopay ini nga mga tagana? Kon bubuhaton mo ito, madudugangan an imo kaisog ngan kompyansa. Ngan pariho ha mga apostol, diri mo tutugotan an bisan ano nga makapaundang ha imo ha pagyakan mahitungod han makaruruyag nga mga kamatuoran ha Biblia nga imo nakita ngan nabatian.

13, 14. Kon naatubang kita hin pagkontra, ano an dapat ta buhaton, ngan kay ano?

¹³ Katapos gud buhian han korte hira Pedro ngan Juan, nakigkita hira ha iba pa nga kabugtoan ha kongregasyon. Urosa nga “gindaku nira an ira mga tingog ngadto ha Dios” ngan nag-ampo para hin kaisog basi makapadayon ha pagsangyaw. (Buh. 4:24) Maaram gud hi Pedro nga diri maaramon an pagsarig ha kalugaringon nga kusog kon nangangalimbasog nga buhaton an kaburut-on han Dios. Pipira pa la ka semana antes hito, may kompyansa nga ginsidngan niya hi Jesus: “Bisan pa mahipakdol an ngatanan tungod han mahitatabo ha imo, diri gud ako mahipapakdol!” Pero sugad han igintagna ni Jesus, madagmit nga nadaog hi Pedro han kahadlok ha tawo ngan iginnigar an iya sangkay ngan magturutdo. Kondi nahibaro hin leksyon hi Pedro ha iya sayop.—Mat. 26:33, 34, 69-75.

¹⁴ Diri igo an pagin determinado la kon karuyag mo makapadayon ha pagtuman han sugo nga magin saksi han Kristo. Kon nangangalimbasog an mga parakontra nga paundangon ka ha pag-alagad kan Jehova o ha pagsangyaw, subara an ehemplo nira Pedro ngan Juan. Pag-ampo kan Jehova para hin kusog. Pagpabulig ha kongregasyon. Isumat ha mga tigurang ngan ha iba nga hamtong nga kabugtoan an mga kakurian nga imo gin-aatubang. An mga pag-ampo han iba makakahatag ha imo hin daku nga kusog.—Efe. 6:18; San. 5:16.

15. Ano nga ehemplo an makakadasig ha mga inundang hadto ha pagsangyaw?

 ¹⁵ Kon nadaog ka hadto han presyur ngan may panahon nga inundang ka ha pagsangyaw, ayaw panluya. Hinumdumi nga may panahon nga an ngatanan nga apostol inundang ha pagsangyaw katapos mamatay hi Jesus, pero waray pag-iha nagin aktibo hira utro. (Mat. 26:56; 28:10, 16-20) Imbes nga manluya tungod han imo mga sayop han naglabay, puydi mo ba gamiton an mga leksyon nga imo nahibaroan tikang hito basi parig-unon an iba?

16, 17. Ano an aton mahibabaroan ha pag-ampo han mga sumurunod han Kristo ha Jerusalem?

¹⁶ Ano an dapat naton ig-ampo kon gintitimaraot kita han mga may awtoridad? Alayon pansina nga waray maghangyo an mga disipulo nga protektaran hira ni Jehova tikang ha mga pagsari. Nahinumdoman gud nira an siring ni Jesus: “Kon gintimaraot nira ako, pagtitimarauton liwat nira kamo.” (Juan 15:20) Lugod, inin maunungon nga mga disipulo naghangyo kan Jehova nga ‘tagan hin atensyon’ an mga tarhog han mga parakontra. (Buh. 4:29) Maaram an mga disipulo nga an kaburut-on han Dios amo an pinakaimportante, ngan nasasabtan nira nga an pagtimaraot nga ira gin-aatubang katumanan han mga tagna. Maaram hira nga sugad han igintutdo ha ira ni Jesus nga ig-ampo, an kaburut-on han Dios ‘matutuman dinhi ha tuna,’ anoman an bangin igsiring han mga magmarando nga tawo.—Mat. 6:9, 10.

¹⁷ Basi mabuhat an kaburut-on han Dios, an mga disipulo nag-ampo kan Jehova: “Buligi an imo mga uripon nga padayon nga igyakan nga may bug-os nga kaisog an imo pulong.” Paonan-o ito ginbaton dayon ni Jehova? “Nabay-og an lugar nga ira ginkakatirokan, ngan hira ngatanan napuno han baraan nga espiritu ngan may kaisog nga nagyakan han pulong han Dios.” (Buh. 4:29-31) Matutuman gud an kaburut-on han Dios; waray makakapugong hito. (Isa. 55:11) Anoman kadaku an problema, anoman kagamhanan an mga kaaway, kon dadakuon naton an aton tingog ngadto ha Dios pinaagi ha pag-ampo, makakasiguro kita nga ihahatag niya ha aton an kusog basi padayon nga igyakan nga may kaisog an iya pulong.

18. Ano an ginbuhat han mga kaapi han kongregasyon ha Jerusalem para ha usa kag usa?

¹⁸ Waray pag-iha, sobra 5,000 na an kaapi han bag-o nga kongregasyon ha Jerusalem. d Bisan kon iba-iba an gintikangan han mga disipulo, may-ada hira “uusa nga kasingkasing ngan kalag.” Nagkakaurosa hira ha pariho nga hunahuna ngan pariho nga opinyon. (Buh. 4:32; 1 Cor. 1:10) Labot la nga nag-ampo hira kan Jehova nga bendisyonan an ira mga pangalimbasog, ginbuligan liwat nira an usa kag usa ha espirituwal, ngan kon kinahanglan, ha materyal. (1 Juan 3:16-18) Pananglitan, an disipulo nga hi Jose, nga gintawag liwat han mga apostol nga Bernabe, nagbaligya hin tuna ngan igindonar an bug-os nga kantidad basi buligan adton tikang ha higrayo nga katunaan nga makapabilin ha Jerusalem hin mas maiha para mahibaro hin dugang pa parte ha ira bag-o nga pagtoo.

19. Kay ano nga ginpatay ni Jehova hira Ananias ngan Sapira?

¹⁹ An mag-asawa nga hira Ananias ngan Sapira nagbaligya liwat hin propyedad ngan naghatag hin donasyon. Nagpakunokuno hira nga iginhatag nira an bug-os nga kantidad; pero “sekreto nga gintago [nira] an pipira nga bahin han bayad.” (Buh. 5:2) Ginpatay ni Jehova ini nga mag-asawa, diri tungod kay kulang an kantidad nga ira iginhatag, kondi tungod kay maraot an ira motibo ha paghatag ngan malimbong hira. “Nagbuwa [hira], diri ha mga tawo, kondi ha Dios.” (Buh. 5:4) Pariho ha mga hipokrito nga ginhukman ni Jesus, mas karuyag nira Ananias ngan Sapira nga dayawon han mga tawo imbes nga makarawat an pag-uyon han Dios.—Mat. 6:1-3.

20. Ano nga mga leksyon an aton mahibabaroan parte ha paghatag kan Jehova?

²⁰ Pariho han pagin mahinatagon han matinumanon nga mga disipulo ha Jerusalem han siyahan nga siglo, ginsusuportaran han minilyon nga Saksi yana an bug-os-kalibotan nga pagsangyaw nga buruhaton pinaagi han boluntaryo nga mga donasyon. Diri ginpipirit an bisan hin-o nga ihatag an iya panahon o kwarta basi suportaran ini nga buruhaton. Oo, diri karuyag ni Jehova nga mag-alagad kita ha iya nga kontra-gusto o napipiritan. (2 Cor. 9:7) Kon nahatag kita, interesado hi Jehova, diri ha kantidad, kondi ha motibo han aton paghatag. (Mar. 12:41-44) Diri gud naton karuyag nga magin pariho kanda Ananias ngan Sapira ngan mag-alagad ha Dios tungod han kalugaringon nga bentaha o basi dayawon. Lugod, pariho kanda Pedro, Juan, ngan Bernabe, hinaot an aton pag-alagad kan Jehova pirme ginpapagios han tinuod nga gugma ha Dios ngan ha aton igkasi-tawo.—Mat. 22:37-40.