Handurawa ini nga sitwasyon: Mierkoles adto nga gab-i. Katatapos pa la han 17 anyos nga hi Geoff ha iya mga buruhaton, ngan mahimo na gud hiya magrelaks. Iya gin-abrihan an TV ngan liningkod basi magpahuway ha iya paborito nga lingkoran.

Hito nga takna, inabot an iya papa, ngan waray malipay an iya papa ha iya nakita.

Kon ikaw hi Geoff, paonan-o mo unta malilikyan ini nga sitwasyon?

An pakig-istorya ha imo kag-anak pariho ha pagdrayb. Kon may makaulang ha imo dalan, may mabibilngan ka pa nga iba nga aragian.

 PANANGLITAN:

“Nakukurian ako makiistorya kan Papa,” siring han batan-on nga hi Leah. “Usahay nag-iinistorya na ako ha iya, katapos masiring hiya, ‘Pasensya na, ako ba an imo ginkakaistorya?’”

MAY-ADA DIRI MAMINOS TULO NGA OPSYON HI LEAH.

1. Guliatan an iya papa.

   Hi Leah gumuliat, “Pamati, Pa! Importante ini!”

2. Diri na makiistorya ha iya papa.

   Hi Leah waray na makiistorya ha iya papa mahitungod han iya problema.

3. Maghulat hin maopay nga tayming, ngan pakiistorya utro.

   Hi Leah personal nga makikiistorya ha iya papa, o maghihimo hin surat mahitungod han iya problema.

Hain hito an imo karuyag buhaton ni Leah?

TAGDA: Diri nakapokus an papa ni Leah salit diri hiya maaram han kasubo han iya anak. Salit kon pilion ni Leah an Opsyon A, bangin diri masabtan han iya papa kon kay ano nga gumuliat hiya. Ini nga opsyon bangin diri makaaghat ha papa ni Leah nga mamati, ngan diri ito magpapakita hin respeto ngan pagpasidungog ha iya papa. (Efeso 6:2) Kon sugad, ini nga opsyon diri makakabulig ha bisan kan kanay.

Bisan kon an Opsyon B an bangin pinakamasayon buhaton, diri ito an pinakamaaramon. Kay ano? Tungod kay kinahanglan ni Leah makiistorya ha iya papa basi malamposan an iya problema, ngan kinahanglan mahibaroan han iya papa an nahitatabo basi mabuligan hiya. Salit, waray kapulsanan an diri pakiistorya.

Pero ha Opsyon C, waray tuguti ni Leah an ulang nga magin hinungdan nga diri na hiya makiistorya ha iya papa. Lugod, nangalimbasog hiya makiistorya mahitungod han iya problema ha iba nga panahon. Ngan kon magdesisyon hiya nga maghimo hin surat ha iya papa, bangin mag-opay dayon an iya pamati.

An pagsurat mahimo liwat makabulig ha iya nga maisaysay gud an iya karuyag isiring. Kon mabasa han iya papa an surat, mabubuligan an iya papa nga mas masabtan an sitwasyon. Salit an Opsyon C makakabulig kan Leah ngan han iya papa. Personal man o pinaagi hin surat, ini nga opsyon uyon ha sagdon ha Biblia nga “pangalimbasogan naton an mga butang nga nag-aaghat hin kamurayawan.”—Roma 14:19.

Ano an iba pa nga puydi buhaton ni Leah?

Paghunahuna hin usa pa nga opsyon ngan kon ano an mahimo magin resulta hito.

Hinumdumi nga an imo ginsisiring ngan an ginhuhunahuna han imo kag-anak nga imo ginsiring, diri pirme magkapariho.

PANANGLITAN:

Nagpakiana an imo mga kag-anak kon kay ano nga ginbubusyo ka. Nagsiring ka, “Diri ko karuyag pag-istoryahan ito.”

Kondi an pagsabot han imo mga kag-anak: “Diri ko kamo susumatan kay diri ako natapod ha iyo. Ha akon kasangkayan ako mag-iistorya han akon problema, diri ha iyo.”

Handurawa nga may makuri ka nga problema ngan karuyag han imo mga kag-anak nga buligan ka. Pero nagsiring ka: “Ayaw kabaraka. Masusolusyonan ko ini.”

• Ano an bangin magin pagsabot han imo mga kag-anak?

• Ano an imo mas maopay nga baton?