1, 2. Kay ano nga importante gud nga magkaada kita hin pagtoo yana? Iilustrar.

PAGTOO. Maopay ito nga pulong nga naghuhulagway hin makaruruyag gud nga kalidad. Kondi kon nababatian naton ito, sadang naton hunahunaon an usa pa nga pulong: “Importante!” Kay kon waray kita pagtoo, importante gud nga magkaada kita hito. Ngan kon may-ada kita pagtoo, importante gud nga panalipdan ngan parig-unon ito. Kay ano?

² Handurawa nga nagbabaktas ka ha haluag nga disyerto. Kinahanglan mo gud hin tubig. Kon may makit-an ka, kinahanglan mo ito panalipdan tikang ha sirak han adlaw. Katapos, sadang mo siguruhon nga diri ka maubosan hito tubtob nga makaabot ka ha imo destinasyon. Yana, nagkikinabuhi kita ha kalibotan nga sugad hin disyerto ha espirituwal, diin an sinsero nga pagtoo—pariho hito nga tubig—talagsa la ngan madagmit mawara kon diri papanalipdan ngan paparig-unon. An aton pagtoo importante gud; sugad la nga mamamatay kita kon waray tubig, mamamatay liwat kita ha espirituwal kon waray pagtoo.—Roma 1:17.

3. Ano an igintagana ni Jehova nga mabulig ha aton nga magkaada pagtoo, ngan ano an duha nga butang nga sadang naton buhaton?

³ Hi Jehova maaram nga kinahanglan gud naton an pagtoo, ngan maaram hiya nga makuri an pagkaada ngan pagtipig hito yana. Tungod hito, nagtagana hiya hin mga ehemplo nga masusubad naton. Gin-giyahan ni Jehova hi apostol Pablo ha pagsurat: “Magsubad kamo ha mga nakakarawat han mga saad tungod han pagtoo ngan pagpailob.” (Heb. 6:12) Salit an organisasyon ni Jehova nag-aaghat ha aton nga mangalimbasog gud nga subaron an matinumanon nga kalalakin-an ngan kababayin-an, sugad han aton mga ginhisgotan hini nga libro. Kondi ano an sadang naton buhaton yana? Hinumdoman naton inin duha nga butang: (1) Kinahanglan padayon naton nga parig-unon an aton pagtoo; (2) kinahanglan tipigan naton nga buhi an aton paglaom.

4. Kay ano nga hi Satanas gamhanan nga kaaway han pagtoo, pero kay ano nga diri kita sadang manluya?

⁴ Padayon nga parig-ona an imo pagtoo. An pagtoo may gamhanan nga kaaway, hi Satanas. Ginhihimo han magmarando han kalibotan ini nga sistema nga magin sugad hin disyerto diin makuri an pagtipig hin pagtoo. Mas makusog hiya kay ha aton. Sadang ba kita manluya ngan maghunahuna nga imposible an pagkaada pagtoo ngan an pagparig-on hito? Diri gud! Hi Jehova gamhanan nga Sangkay han ngatanan nga nangangalimbasog nga magkaada sinsero nga pagtoo. Ginpapasarig kita ni Jehova nga bubuligan kita niya nga maatohan an Yawa, ngan mapaiwas pa ngani ito! (San. 4:7) Gin-aatohan naton an Yawa pinaagi ha paggahin hin panahon  kada adlaw ha pagparig-on han aton pagtoo. Paonan-o?

5. Paonan-o nagkaada pagtoo an matinoohon nga kalalakin-an ngan kababayin-an nga ginhisgotan ha Biblia? Isaysay.

⁵ Sugad han aton gin-adman, adton kalalakin-an ngan kababayin-an nga may daku nga pagtoo waray matawo nga may pagtoo na. An ira pagkinabuhi nagpapamatuod nga an pagtoo nakukultibar pinaagi han baraan nga espiritu ni Jehova. (Gal. 5:22, 23) Nag-ampo hira para hin bulig, ngan sugad nga resulta, padayon nga ginparig-on ni Jehova an ira pagtoo. Ito liwat an sadang naton buhaton; diri naton hingalimtan nga iginhahatag ni Jehova an iya espiritu hadton nangangaro hito ngan nagbubuhat uyon ha ira mga pag-ampo. (Luc. 11:13) Ano pa an puydi naton buhaton?

6. Paonan-o kita bug-os nga magpapahimulos ha aton pag-aram ha mga asoy han Biblia?

⁶ Hini nga libro, pipira la han may-ada daku nga pagtoo an aton ginhisgotan. Ngan damu pa an may-ada hito! (Basaha an Hebreo 11:32.) Kon mainampoon ngan sinsero nga pag-aadman naton an ira susbaranan, damu gud an aton hibabaroan ha tagsa ha ira. Kon pahapyaw la an aton pagbasa ha mga asoy han Biblia mahitungod ha ira, diri gud naton mapaparig-on an aton pagtoo. Basi magpahimulos hin bug-os, kinahanglan kita maggahin hin panahon basi pag-adman hin maopay an mga konteksto ngan an iba pa nga detalye han mga asoy. Kon pirme naton huhunahunaon nga adton diri hingpit nga kalalakin-an ngan kababayin-an may “mga pagbati nga pariho ha aton,” an ira ehemplo magigin mas totoo ha aton. (San. 5:17) Masasabtan naton an ira inabat han inatubang hira hin mga pagsari ngan mga problema nga pariho ha aton.

7-9. (a) Ano an posible nga aabaton han pipira nga kalalakin-an ngan kababayin-an nga may pagtoo mahitungod ha pagsingba kan Jehova pariho ha aton ginbubuhat yana? (b) Kay ano nga sadang parig-unon an aton pagtoo pinaagi ha mga buhat?

⁷ Ginpaparig-on liwat naton an aton pagtoo pinaagi han aton mga buhat, kay ‘an pagtoo nga waray mga buhat patay.’ (San. 2:26) Handurawa la an kalipay han kalalakin-an ngan kababayin-an nga aton ginhisgotan kon igintoka ha ira an buruhaton nga igintoka ni Jehova ha aton yana!

⁸ Pananglitan, ano daw la kon ginsidngan hi Abraham nga mahimo niya singbahon hi Jehova, diri ha halaran nga hinimo ha bato didto ha kamingawan, kondi kaupod an organisado nga grupo han iya igkasi-magsiringba ha mga Kingdom Hall ngan dagku nga kombensyon, diin iginsasaysay ngan ginhihisgotan hin detalyado an mga saad nga nakita la niya “ha hirayo”? (Basaha an Hebreo 11:13.) Ngan ano daw la kon ginsidngan hi Elias nga an iya buruhaton nag-uupod, diri ha pagpatay ha magraot nga propeta ni Baal samtang nag-aalagad hiya kan Jehova ilarom ha pagmando han maraot ngan apostata nga hadi, kondi ha pagbisita ha mga tawo ha mamurayawon nga paagi basi isumat an mensahe han pagliaw ngan paglaom? Posible nga kakarawaton dayon hito nga kalalakin-an ngan kababayin-an an higayon nga mag-alagad kan Jehova pariho ha aton ginbubuhat yana.

⁹ Salit padayon naton nga parig-unon an aton  pagtoo pinaagi han aton mga buhat. Ha pagbuhat hito, ginsusubad naton an susbaranan han kalalakin-an ngan kababayin-an nga may pagtoo nga nakarekord ha giniyahan nga Pulong han Dios. Sugad han gin-unabi ha Introduksyon, aabaton naton nga mas duok kita ha ira sugad nga sangkay. Kondi, ito nga pagkamagsangkay mahimo magin mas totoo pa gud ha tidaraon.

10. Ano nga kalipay an aton maieksperyensyahan ha Paraiso?

¹⁰ Tipigi nga buhi an imo paglaom. An kalalakin-an ngan kababayin-an nga may daku nga pagtoo pirme napaparig-on han ira hatag-han-Dios nga paglaom. Napaparig-on ka ba liwat hito? Pananglitan, handurawa an kalipay nga makilala an matinumanon nga mga surugoon han Dios kon banhawon na hira ha “pagkabanhaw han mga matadong.” (Basaha an Buhat 24:15.) Ano an karuyag mo ipakiana ha ira?

11, 12. Ha bag-o nga kalibotan, ano an mahimo mo ipakiana kan (a) Abel? (b) Noe? (c) Abraham? (d) Ruth? (e) Abigail? (f) Ester?

¹¹ Kon makita mo hi Abel, papakianhan mo ba hiya kon ano an hitsura han iya mga kag-anak? O mahimo mo ipakiana: “Nakig-istorya ka ba ha mga kerubin nga nagbabantay ha Eden? Binaton ba hira?” Kon mahitungod kan Noe, bangin magpakiana ka ha iya: “Nahadlok ka ba ha mga Nepilim? Paonan-o mo gin-ataman an ngatanan nga hayop ha sulod han arka?” Kon makita mo hi Abraham, bangin magpakiana ka: “Nakaupod mo ba hi Sem hadto? Hin-o an nagtutdo ha imo mahitungod kan Jehova? Makuri ba an pagbaya ha Ur?”

¹² Sugad man, tagda an pipira nga pakiana nga bangin karuyag mo ipakiana ha matinumanon nga kababayin-an nga ginbanhaw. “Ruth, ano an nakakombinse ha imo nga magin magsiringba ni Jehova?” “Abigail, nahadlok ka ba pagsumat kan Nabal mahitungod han imo pagbulig kan David?” “Ester, ano an nahitabo ha iyo ni Mordekay han natapos na an istorya han Biblia mahitungod ha iyo?”

13. (a) Ano an bangin ipakiana ha imo han mga babanhawon? (b) Ano an imo inaabat mahitungod ha paglaom nga makilala an matinumanon nga kalalakin-an ngan kababayin-an ha kadaan nga panahon?

¹³ Syempre, adton matinumanon nga kalalakin-an ngan kababayin-an bangin damu liwat an pakiana ha imo. Makalilipay gud isumat ha ira an mahitungod ha kataposan nga mga adlaw ngan kon paonan-o ginbendisyonan ni Jehova an iya katawohan durante ha magkuri nga panahon! Sigurado nga malilipay hira ha paghibaro kon paonan-o gintuman ni Jehova an ngatanan niya nga saad. Hito nga panahon, diri na naton kinahanglan handurawon an maunungon nga mga surugoon han Dios nga gin-unabi ha Biblia. Makakaupod mismo naton hira—ha Paraiso! Salit padayon nga buhata an ngatanan nga imo mahihimo basi magin totoo hira ha imo. Padayon nga subara an ira pagtoo. Hinaot malipay ka ha pag-alagad kan Jehova kaupod nira sugad nga imo hinigugma nga mga sangkay ha kadayonan!