Kitaa an bata ha retrato. Sugad hin nasusubo hiya ngan nahahadlok, di’ ba? Inabat mo na ba ito?— Inaabat ito danay han ngatanan. An Biblia nag-iistorya mahitungod ha mga sangkay ni Jehova nga nahadlok liwat ngan nasubo kay inabat nira nga nag-uusahan la hira. Usa ha ira hi Elias. Pag-istoryahan naton hiya.

Hi Elias nabuhi ha Israel maiha na nga panahon antes pa matawo hi Jesus. An hadi ha Israel nga hi Ahab diri nagsisingba ha totoo nga Dios nga hi Jehova. Hi Ahab ngan an iya asawa nga hi Jesebel nagsisingba ha buwa nga dios nga hi Baal. Salit an kadam-an han mga tawo ha Israel nagtikang liwat pagsingba kan Baal. Salbahis gud an rayna nga hi Jesebel ngan karuyag niya patayon an ngatanan nga nagsisingba kan Jehova, pati na hi Elias! Maaram ka ba kon ano an ginhimo ni Elias?—

Nagpahirayo hi Elias! Kinadto hiya ha hirayo nga disyerto ngan nagtago ha lungib. Para ha imo, kay ano daw la nga ginhimo niya ito?— Oo, nahadlok hiya. Pero diri unta hiya angay mahadlok. Kay ano? Kay maaram hiya nga mabubuligan hiya ni Jehova. Iginpakita na hadto ni Jehova an iya gahum kan Elias. Usa ka beses, ginbaton ni Jehova an pag-ampo ni Elias pinaagi ha pagpadara hin kalayo tikang ha langit. Salit sigurado nga mabubuligan utro ni Jehova hi Elias!

Han nakadto hi Elias ha lungib, nakiistorya hi Jehova ha iya ngan nagpakiana: ‘Nag-aano ka dinhi?’ Binaton hi Elias: ‘Ako na la an nagsisingba ha imo. Nag-uusahan na la ako, ngan nahahadlok ako nga patayon nira.’ Kahuna ni Elias nga ginpatay na an ngatanan nga iba pa nga nagsisingba kan Jehova. Pero nagsiring hi Jehova ha iya: ‘Diri ito totoo, may-ada pa 7,000 nga nagsisingba ha akon. Ayaw kahadlok. Damu pa an akon karuyag ipabuhat ha imo!’  Para ha imo, nalipay ba hi Elias ha pakabati hito?—

Ano an imo mahibabaroan ha nahitabo kan Elias?— Diri ka gud angay mahadlok ngan umabat nga nag-uusahan ka la. May mga sangkay ka nga nahigugma kan Jehova ngan ha imo. Gamhanan liwat hi Jehova, ngan bubuligan ka niya pirme! Nalilipay ka ba nga diri ka gud ngay-an nag-uusahan?—