“PUYDI na bumiyahe an bus, pero bilin la ini nga Intsik!” Ito an hinbatian ni Alexandra nga nakadto ha sulod han bus nga titabok ha giutan han duha nga nasud ha Sur Amerika. Hinaw-as hiya basi makita an nahitatabo, ngan nakita niya an usa nga Intsik nga nakukurian pagsaysay ha gwardya han iya kahimtang ha Espanyol nga yinaknan. Tungod kay ha Chinese nga kongregasyon han mga Saksi ni Jehova natambong hi Alexandra, nagboluntaryo hiya nga magin interpreter.

An Intsik nagsiring nga legal hiya nga residente pero gintulis hiya ngan ginkuha an iya mga dokumento ngan kwarta. Ha tinikangan waray tumuod an opisyal, ngan gintahapan pa ngani hi Alexandra nga kaapi ha human trafficking. Ha urhi, tumuod an gwardya pero kinahanglan magbayad an Intsik hin multa kay waray hiya dokumento. Tungod kay waray kwarta, ginpahuram hiya ni Alexandra hin 20 ka dolyar. Daku gud an pagpasalamat han Intsik ngan nagsiring nga sobra pa hito an iya ibabayad. Nagsiring hi Alexandra nga diri hiya naglalaom hin balos; nalilipay hiya pagbulig kay para ha iya, ito an angay buhaton. Gintagan niya an Intsik hin mga literatura nga basado ha Biblia ngan gin-aghat nga mag-aram han Biblia kaupod han mga Saksi ni Jehova.

Makalilipay gud nga may mga tawo nga mahinatagon ha estranghero, ngan sigurado nga an sugad nga buhat ginhihimo liwat han mga tawo ha ngatanan nga relihiyon ngan han waray relihiyon. Andam ka ba nga magin mahinatagon ha sugad nga paagi? Makapainteres gud ito nga pakiana kay hi Jesus nagsiring: “Mas makalilipay an paghatag kay ha pagkarawat.” (Buhat 20:35) Napamatud-an liwat ito han syensya tungod kay naobserbaran han mga parasaliksik nga may kapulsanan ha imo an paghatag. Aton kitaon kon ha ano nga paagi.

An mga panhitabo nagpapakita nga agsob nga may kalipay ha paghatag. Hi apostol Pablo nagsurat nga “an Dios nahigugma ha malipayon nga nahatag.” An iya ginhihisgotan amo an mga Kristiano nga naghatag basi makabulig ha ira igkasi-tumuroo. (2 Corinto 8:4; 9:7) Diri iginpapasabot ni Pablo nga naghatag hira tungod kay malipayon hira. Kondi malipayon hira tungod kay nakahatag hira.

Ha pagkamatuod, usa nga pag-aram an nagsiring nga kon nahatag kita, “nagios an bahin han utok nga may kalabotan ha kalipay, pakig-upod, ngan pagsarig, ngan may positibo nga epekto ito.” Usa pa nga pag-aram an nasiring nga an “paghatag hin kwarta ha iba nakakapalipay ha naghatag labaw pa ha kalipay nga ira nakakarawat kon nagasto hira.”

Inabat mo na ba nga tungod han imo sitwasyon diri ka makakahatag hin daku? Ha pagkamatuod, mahimo maeksperyensyahan han ngatanan an kalipay han pagin ‘malipayon nga humaratag.’ Kon husto an motibo, diri importante an kantidad han iginhahatag. Usa han mga Saksi ni Jehova an nagpadara hini nga mensahe nga may kaupod nga kontribusyon ngadto ha nagpublikar hini nga magasin: “Tikang pa hadto, pirme la gutiay an akon  naidudonar ha Kingdom Hall.” Kondi nagpadayon hiya: “Sobra kadaku an iginhatag ha akon ni Jehova nga Dios kay han akon naihatag. . . . Salamat nga nagin posible ha akon nga makahatag—naghahatag ito ha akon hin kalipay.”

Syempre, diri la kwarta an puydi ihatag. Damu an iba pa nga paagi ha paghatag.

An Biblia nasiring: “An tawo nga maloloy-on nagbubuhat hin maopay ha iya kalugaringon . . . kondi hiya nga mapungkahon nagsasamok han iya kalugaringon nga unod.” (Proberbios 11:17) An tawo nga maloloy-on mahinatagon, andam paghatag han iya panahon, kusog, pagtagad, ngan iba pa. Ini nga paagi han pagkinabuhi nagriresulta hin kapulsanan ha iba-iba nga paagi, usa na hito an maopay nga nahihimo ha kahimsog han pagin mahinatagon.

Iginpapakita han mga pag-aram nga an nagbuboluntaryo pagbulig ha iba diri agsob umabat hin kaul-ol ngan kasakit ngan gutiay la an posibilidad nga madepres. Ha kabug-osan, mas maopay an ira kahimsog. Nagpapauswag pa ngani ito han kahimsog han pipira nga may maiha na nga sakit, sugad han multiple sclerosis o HIV. Naobserbaran liwat nga an mga parahubog nga nakakabaya na ha ira bisyo ngan nabulig ha iba, gutiay na la an tsansa nga madepres ngan bumalik ha ira bisyo.

Kay ano? Nakita nga an “pag-abat hin pagpaid, pagkabuotan, ngan kalooy nabulig nga mawara an negatibo nga mga emosyon.” An paghatag mahimo liwat makaiban han istres ngan magpahamubo han presyon han dugo. Ngan an mga namatayan hin padis mas madagmit makarekober kon nahatag hira hin bulig ha iba.

Tinuod gud ito. Daku an kapulsanan ha imo han paghatag.

Hi Jesus nag-aghat ha iya mga sumurunod: “Batasana an paghatag, ngan an mga tawo mahatag ha iyo. Ira igbubuhos ha iyo surudlan an bug-os nga sukol, sinusô, inuy-og, ngan nagsasap-ay. Kay an suruklan nga iyo ginagamit ha iba, ito liwat an gagamiton ha iyo.” (Lucas 6:38) Kon nahatag ka, posible nga apresyaron ngan subaron ito han iba. Salit an paghatag nag-aaghat hin kooperasyon ngan hin pakigsangkay.

An mga parasaliksik nga nag-aaram may kalabotan han relasyon han mga tawo nagsiring nga “an mga tawo nga pirme nag-uuna han kaopayan han iba nag-aaghat ha iba nga buhaton an pariho.” Ngani, “bisan an pagbasa la hin talagsahon nga istorya han pagkabuotan nag-aaghat ha mga tawo nga magin mas mahinatagon.” Salit, sumala ha usa nga pag-aram, “an tagsa ha usa nga grupo mahimo makaimpluwensya ha pipira o bisan ha ginatos, nga an pipira hito diri niya kilala ngan waray pa niya igkita.” Karuyag sidngon, bisan an usa la nga buhat han pagin mahinatagon mahimo makaapekto ha tagsa ha komunidad. Karuyag mo ba umukoy ha sugad hito nga lugar? Oo, daku an kapulsanan kon mas damu an magigin mahinatagon.

Usa nga eksperyensya ha Florida, E.U.A. an nagpapakita hito nga kapulsanan. Usa nga grupo  han mga Saksi ni Jehova an nagboluntaryo ha pagbulig katapos hin makusog nga bagyo. Samtang naghuhulat han materyales para ha balay nga ira aaydon, nakita nira nga guba an alad han usa nga kahirani nga balay, ngan nagboluntaryo hira ha pag-ayad hito. Nagpasalamat gud an tag-iya ngan nagsurat ha headquarters han mga Saksi: “Ini nga mga tawo usa gud han pinakabuotan nga mga tawo nga akon nakilala.” Tungod han iya pagpasalamat, nagpadara hiya hin daku nga kontribusyon basi magamit ha iya gintatawag nga diri ordinaryo nga buruhaton han mga Saksi.

Usa nga makatirigamnan nga obserbasyon han syensya nga “an tawo baga hin may natural nga kinaiya ha pagbulig ha iba.” Ito nga pag-aram nasiring nga an kabataan “nagpapakita hin pagtagad bisan antes pa hira mahibaro pagyakan.” Kay ano? Tungod kay an tawo ginlarang ha “ladawan han Dios,” siring han Biblia, karuyag sidngon, may-ada hira mga kalidad nga pariho han Dios.—Genesis 1:27.

Usa han makatirigamnan nga kalidad han aton Maglalarang nga hi Jehova nga Dios, amo an pagin mahinatagon. Iya kita gintagan hin kinabuhi ngan han tanan nga aton ginkikinahanglan basi magin malipayon. (Buhat 14:17; 17:26-28) Mahimo kita mahibaro mahitungod ha aton langitnon nga Amay ngan ha iya mahigugmaon nga katuyoan pinaagi ha pag-aram han iya Pulong, an Biblia. Mababasa liwat dida an mga tagana han Dios ha tidaraon basi kita magin malipayon. * (1 Juan 4:9, 10) Tungod kay an kalidad nga pagin mahinatagon tikang kan Jehova ngan ginhimo kita ha iya ladawan, diri urusahon nga an pagin mahinatagon, sugad nga pagsubad ha Dios, maopay para ha aton ngan nagpapalipay ha iya.—Hebreo 13:16.

Nahinunumdoman mo ba hi Alexandra nga gin-unabi ha tinikangan hini nga artikulo? Ano an sunod nga nahitabo? Bisan kon may pasahero nga nagsiring nga ginkaragan la niya an iya kwarta, nakigkomunikar an Intsik ha iya kasangkayan ha syudad diin sunod nga maparada an bus, ngan ginbaydan dayon an 20 ka dolyar nga iginpahuram ha iya. Dugang pa, ginsunod liwat han Intsik an siring ni Alexandra nga mag-aram han Biblia. Nalipay gud hi Alexandra han makita utro an tawo paglabay hin tulo ka bulan ha usa nga Chinese nga kombensyon han mga Saksi ni Jehova ha Peru. Basi ipahayag an pagpasalamat, iya gin-imbitar hi Alexandra ngan an mga kaupod hito ha iya restawran.

An paghatag ngan pagbulig ha iba nakakapalipay gud. Ngan labi nga nakakapalipay ito kon nakakabulig ka ha iba nga mas makilala an gintitikangan han ngatanan nga mag-opay nga regalo—hi Jehova nga Dios! (Santiago 1:17) Nagpapahimulos ka ba han kapulsanan han pagin mahinatagon?