KON nakatalwas ka ha usa nga kalamidad, posible nga nasasabtan mo an inaabat han iba nga nakaeksperyensya hito: diri makatoo, diri makarawat an nahitabo, nawuwurok, nababaraka, ngan nagkakaada magraot nga inop. Damu han mga nakatalwas an nadepres ngan nakapoy gud, salit nawad-an hira hin gana nga magpadayon ha kinabuhi.

Kon nawara ha imo an tanan tungod hin kalamidad, bangin abaton mo liwat nga diri mo na maiilob an duro nga istres ngan kabaraka. Bangin abaton mo pa ngani nga waray na pulos an imo kinabuhi. Kondi an Biblia nagsusumat nga may pulos an imo kinabuhi ngan mahimo ka magkaada marig-on nga basihan para maglaom hin maopay nga kabubuwason.

An Eclesiastes 7:8 nasiring: “Mas maopay an kataposan han usa nga butang kay han tinikangan hito.” Kon nagtitikang ka pa la magrekober ha usa nga kalamidad, baga hin waray paglaom an imo kinabuhi. Pero samtang mapailubon nga nangangalimbasog ka nga ibalik ha normal an imo kinabuhi, hinay-hinay nga nagigin maopay an tanan.

An Biblia nagtagna hin panahon diin “diri na mababatian . . . an aringasa han pagtangis o an pagsinggit tungod han kasakitan.” (Isaias 65:19) Matutuman ini kon an tuna himoon na nga paraiso durante han pagmando han Ginhadian han Dios. (Salmo 37:11, 29) Diri na magkakaada hin mga kalamidad. Wawad-on na ha kadayonan an bisan ano nga masakit nga hinumdoman ngan diri nawawara nga truma, kay an Dios nga Makagarahum-ha-ngatanan nagsasaad: “An naglabay nga mga butang diri na mahinunumdoman, diri liwat ito masulod ha kasingkasing.”—Isaias 65:17.

Hunahunaa ini: An Maglalarang naghimo hin kahikayan basi “tagan [ka] hin kabubuwason ngan hin paglaom”—usa nga mamurayawon nga kinabuhi ilarom han perpekto nga pagmando han Dios. (Jeremias 29:11) An paghibaro ba hini nga kamatuoran mabulig nga magkaada pulos an imo kinabuhi? Hi Sally, nga gin-unabi ha siyahan nga artikulo, nagsiring: “An pagpahinumdom ha imo kalugaringon han tanan nga mag-opay nga butang nga hihimoon han Ginhadian han Dios ha tidaraon mabulig ha imo nga kalimtan an naglabay ngan atubangon an presente nga kahimtang.”

Alayon hibaroi an dugang nga bubuhaton han Ginhadian han Dios para ha katawohan ha diri na maiha. Kon bubuhaton mo ini, makakasarig ka nga bisan kon nakaeksperyensya ka hin kalamidad, may pulos la gihap an imo kinabuhi yana samtang ginpapamulat mo an tidaraon nga waray na kalamidad. Ha pagkayana, an Biblia nagtatagana hin praktikal nga mga giya nga mabulig ha imo nga mailob an mga epekto han kalamidad. Tagda an pipira nga ehemplo.