An Dios nagsaad kan propeta Abraham nga bibendisyonan an “ngatanan nga nasud ha tuna” pinaagi han iya tulin. (Genesis 22:18) Hin-o ito nga tulin?

Haros 2000 ka tuig na an naglabay, gintagan han Dios hi Jesus, nga tulin ni Abraham, hin gahum ha paghimo hin mga milagro. Iginpakita hito nga mga milagro nga an iginsaad kan Abraham makakarawat han mga nasud pinaagi kan Jesus.​—Galacia 3:14.

An mga milagro ni Jesus nakabulig basi makilala nga hiya an ginpili han Dios ha pagbendisyon ha katawohan, ngan iginpapakita liwat hito kon paonan-o hiya gagamiton han Dios ha pagbendisyon ha ira ha kadayonan. Tagda kon paonan-o ginpabug-atan han mga milagro ni Jesus an pipira han iya makaruruyag nga mga kalidad.

Mahigugmaon​—Gintambal ni Jesus an mga may sakit.

Makausa, nakimalooy kan Jesus an usa nga may liprosi nga tambalon hiya. Ginkaptan hiya ni Jesus ngan ginsidngan: “Karuyag ko!” Nawara dayon an iya liprosi.​—Marcos 1:40-42.

Mahinatagon​—Ginpakaon ni Jesus an mga nagugutom.

Diri karuyag ni Jesus nga magutom an mga tawo. Diri la usa ka beses nga milagroso nga ginpakaon niya an yinukot nga tawo pinaagi ha pagpadamu han pipira nga tinapay ngan han pipira nga gudtiay nga isda. (Mateo 14:17-21; 15:32-38) Katapos mangaon, nagkabubusog an ngatanan ngan damu pa an nahisalin.

Mapinairon​—Nagbanhaw hi Jesus hin patay.

Tungod kay “nalooy” hi Jesus, ginbanhaw niya an nag-uusahan nga anak han balo nga babaye nga waray na iba nga mag-aataman.​—Lucas 7:12-15.