Kita ngatanan mga anak han siyahan nga lalaki, hi Adan, salit bahin kita han uusa nga pamilya. Bisan kon an mga membro han pamilya ginlalaoman nga magpakita hin gugma ngan respeto ha usa kag usa, pipira na la yana an nagpapakita hito. Diri ito an karuyag han aton mahigugmaon nga Dios.

“Higugmaa an imo igkasi-tawo sugad ha imo kalugaringon.”​—LEVITICO 19:18.

“Padayon nga higugmaa an iyo mga kaaway.”​—MATEO 5:44.

Kitaon naton kon paonan-o iginhulagway han Dios an gugma ha 1 Corinto 13:4-7:

“An gugma pasensyoso ngan buotan.”

Hunahunaa ini: Ano an imo aabaton kon an iba pasensyoso ngan buotan ha imo ngan diri dayon nasisina kon nagsasayop ka?

“An gugma diri maabugho.”

Hunahunaa ini: Ano an imo aabaton kon an iba naaawa o diri natapod ha imo?

An gugma “diri nagbibiling han kalugaringon la nga kaopayan.”

Hunahunaa ini: Ano an imo aabaton kon ginrirespeto han iba an imo opinyon ngan diri iginpipirit an ira kalugaringon nga opinyon?

An gugma “diri . . . nag-iihap han karat-an.”

Hunahunaa ini: An Dios andam magpasaylo hadton nakasala ha iya nga nagbabasol. “Diri hiya pirme mamimiling hin sayop, diri liwat hiya magpapabilin nga nasisina.” (Salmo 103:9) Nalilipay kita kon ginpapasaylo kita han aton nabuhatan hin sayop. Salit kinahanglan magin andam kita pagpasaylo ha mga nakakasayop ha aton.​—Salmo 86:5.

An gugma “diri . . . nalilipay ha pagkadiri-matadong.”

Hunahunaa ini: Kon may nahitatabo nga maraot ha aton, diri naton karuyag nga malipay an iba ha aton pag-antos. Tungod hito, diri liwat kita nalilipay kon nag-aantos an iba, bisan kon maraot an ira pagtratar ha aton.

Basi makarawat an bendisyon han Dios, kinahanglan naton higugmaon an iba hini nga mga paagi anoman an ira edad, gintikangan, o relihiyon. An usa nga paagi nga mahihimo naton ini amo an pagbulig ha mga nanginginahanglan.