Biskwit Para ha mga Ayam
“TEMPRANO han 2014, gintikangan ko pagpasyada an akon duha nga gudti nga ayam ha sentro han syudad nga akon gin-uukyan,” nagsurat hi Nick, nga naukoy ha Oregon, U.S.A. “An mga Saksi kaurogan na nga aadto ha sentro han syudad ngan natindog sapit han ira mga cart nga may literatura. Maopay an ira pamado ngan nahiyom hira ha ngatanan nga nalabay.
“An mga Saksi buotan diri la ha mga tawo kondi pati ha akon mga ayam. Usa ka adlaw, hi Elaine, nga natindog sapit han cart, naghatag hin biskwit ha akon duha nga ayam. Katapos hito, ha kada panahon nga nahingangadto kami hirani ha cart, ginbubutong ako han mga ayam tipakadto ha mga Saksi para makakarawat na liwat hira hin biskwit.
“Linabay an pipira ka bulan. Nag-enjoy an mga ayam ha ira biskwit, ngan ako nag-enjoy ha haglipot nga pakiistorya ha mga Saksi. Pero nag-aalang ako pakiistorya ha ira hin maiha. Sobra 70 anyos na ako, ngan diri ako sigurado kon ano an gintotoohan han mga Saksi. Tungod kay dismayado ako ha damu nga Protestante nga relihiyon, nahunahuna ko nga mas maopay na la nga maglugaring ako pag-aram ha Biblia.
“Hito nga panahon, nakakita liwat ako hin mga Saksi ha iba-iba nga bahin han syudad nga natindog sapit han ira mga cart. Hira liwat makisangkayon. Pirme nira ginbabaton an akon mga pakiana gamit an Biblia, salit nadugangan an akon pagtapod ha ira.
“Usa ka adlaw, nagpakiana hi Elaine, ‘Natoo ka ba nga an mga hayop regalo tikang ha Dios?’ Binaton ako, ‘Oo, syempre!’ Katapos, ginbasa ni Elaine ha akon an Isaias 11:6-9. Tungod hito, naruyag na ako nga mahibaro parte ha Biblia, pero nag-aalang la gihapon ako pagkarawat hin mga literatura.
“Han sunod nga mga adlaw, nag-enjoy ako ha haglipot pero makapainteres nga pakiistorya kan Elaine ngan ha iya bana nga hi Brent. Nagsuhestyon hira nga basahon ko an Mateo tubtob Buhat basi masabtan ko an karuyag sidngon han pagsubad ha Kristo. Salit ginhimo ko ito. Waray pag-iha, sumugot ako nga magpa-Bible study kanda Brent ngan Elaine. Summer adto han 2016.
“Eksayted ako ha akon sinemana nga pag-Bible study ngan ha mga katirok ha Kingdom Hall. Inabat ko nga ginbendisyonan ako, ngan nalipay ako paghibaro kon ano gud an ginsisiring han Biblia. Paglabay la hin sobra usa ka tuig, nagin bawtismado ako nga Saksi. Yana ha edad nga 79, maaram ako nga aada ako ha tama nga dalan. Ginbendisyonan ako ni Jehova pinaagi ha pagbulig ha akon nga magin bahin han iya bug-os-kalibotan nga pamilya.”
Bangin Maruyagan Mo Liwat
KOMON NGA MGA PAKIANA
Ano an Pag-aram ha Biblia nga Igintatanyag han mga Saksi ni Jehova?
Ha libre nga interactive nga programa nga igintatanyag han mga Saksi ni Jehova, puydi mo gamiton an bisan ano nga bersyon han Biblia. Ayaw pag-alang nga paupdon an imo bug-os nga pamilya o an imo kasangkayan.
