1. Ano an igintagna ni Isaias mahitungod kan Jesus, ngan kay ano nga makaparig-on ito?

AN TAGNA ni Isaias mahitungod ha aton Ginoo nga hi Jesu-Kristo nagpaparig-on ngan nagpapasarig ha aton. Iya igintagna nga hi Jesus “diri maghuhukom sumala han hikikit-an han iya mga mata, diri man mahatag hin kahusayan sumala han hinbabatian han iya mga talinga.” Ngan “pinaagi ha katadungan hiya maghuhukom han mga kablas.” (Isa. 11:3, 4) Kay ano nga makaparig-on ini? Kay nagkikinabuhi kita ha kalibotan diin komon gud an diskriminasyon ngan an mga tawo naghuhukom sumala ha ira nakikita. Ginkikinahanglan gud naton an perpekto nga Hukom, nga diri maghuhukom ha aton sumala han aton panggawas nga hitsura!

2. Ano an iginsugo ha aton ni Jesus, ngan ano an aton hihisgotan hini nga artikulo?

² Kada adlaw, naghihimo kita hin mga opinyon mahitungod ha iba. Pero diri pariho kan Jesus, diri kita perpekto, salit diri liwat perpekto an aton ginhihimo nga mga opinyon. Masayon la ito maimpluwensyahan han aton nakikita. Pero han nakanhi hi Jesus ha tuna, hiya nagsugo: “Ayaw na kamo paghukom sumala ha iyo nakikita, kondi paghukom kamo ha matadong nga paagi.” (Juan 7:24) Matin-aw, karuyag ni Jesus nga subaron naton hiya ngan diri maghukom ha iba sumala han ira panggawas nga hitsura. Hini nga artikulo, hihisgotan naton an tulo nga  butang nga kasagaran na nga nakakaimpluwensya ha aton mga opinyon: lahi o nasyonalidad, karikohan, ngan edad. Ha tagsa hini, hihisgotan naton an praktikal nga mga paagi nga masusunod naton an sugo ni Jesus.

3, 4. (a) Ano nga mga panhitabo an nakagbag-o han panhunahuna ni apostol Pedro may kalabotan ha mga Hentil? (Kitaa an retrato ha tinikangan hini nga artikulo.) (b) Ano nga bag-o nga kamatuoran an igintutdo ni Jehova kan Pedro?

³ Handurawa an posible nga ginhinunahuna ni apostol Pedro han ginpakadto hiya ha Cesarea ha balay han Hentil nga hi Cornelio. (Buh. 10:17-29) Pariho han iba pa nga Judio ha iya panahon, nagdaku hi Pedro nga natoo nga mahugaw an mga Hentil. Kondi may naeksperyensyahan hiya nga mga panhitabo nga nag-aghat ha iya nga bag-uhon an iya panhunahuna. Pananglitan, diri pa la maiha, nagkaada hiya bisyon. (Buh. 10:9-16) Ano an iya nakita? Usa nga surudlan nga pariho hin tela nga puno hin maghugaw nga hayop an nagtitipaubos ngada ha iya samtang may tingog tikang ha langit nga nasiring: “Buhát Pedro, pag-ihaw ngan kaon!” Marig-on nga nagdumiri hi Pedro. Katapos, an tingog tikang ha langit nagsiring ha iya nga ‘diri na pagtawagon nga mahugaw an mga butang nga ginlimpyohan na han Dios.’ Kahuman niya makita ito nga bisyon, nagupong hiya kon ano an karuyag isumat ha iya han tingog nga iya nabatian. Hito nga takna, inabot an mga mensahero ni Cornelio. Katapos makarawat ni Pedro an giya han baraan nga espiritu, inupod hiya ha mga mensahero ngadto ha balay ni Cornelio.

⁴ Kon naghukom hi Pedro sumala ha panggawas nga hitsura, diri gud unta hiya masulod ha balay ni Cornelio. An mga Judio diri gud nasulod ha balay han mga Hentil. Kay ano nga kumadto hi Pedro ha balay ni Cornelio bisan kon may diskriminasyon hiya ha mga Hentil? Daku gud an epekto kan Pedro han bisyon nga iya nakita ngan han pasarig nga iya nakarawat tikang ha baraan nga espiritu. Katapos niya pamatian an ginsiring ni Cornelio, napagios hiya nga magsiring: “Nasasabtan ko na gud yana nga an Dios waray pinaurog, kondi ha tagsa nga nasud an tawo nga nahahadlok ha iya ngan nagbubuhat han matadong ginkakarawat niya.” (Buh. 10:34, 35) Sigurado nga nalipay gud hi Pedro hinin bag-o nga pagsabot​—usa nga kamatuoran nga may daku gud nga epekto! Paonan-o ini nga kamatuoran makakaapekto ha ngatanan nga Kristiano?

5. (a) Ano an karuyag ni Jehova nga masabtan han ngatanan nga Kristiano? (b) Bisan kon maaram kita han kamatuoran, ano an bangin magpabilin pa gihapon ha aton kasingkasing?

⁵ Pinaagi kan Pedro, ginbubuligan ni Jehova an ngatanan nga Kristiano nga masabtan nga waray Hiya pinaurog. Para ha iya, diri importante an lahi, nasyonalidad, tribo, o linggwahe han usa. An bisan hin-o nga nahahadlok ha iya ngan nagbubuhat hin matadong ginkakarawat niya. (Gal. 3:26-28; Pah. 7:9, 10) Sigurado nga nauyon ka hito. Pero ano man kon nagdaku ka ha lugar o pamilya diin komon an diskriminasyon? Bisan kon ginhuhunahuna mo nga waray ka pinaurog, bangin may nagpapabilin pa gihapon nga negatibo nga pagbati ha imo kasingkasing. Bisan hi Pedro nga nagkaada pribilehiyo ha pagbulig ha iba nga masabtan nga an Dios waray pinaurog, nagpakita hin diskriminasyon ha urhi. (Gal. 2:11-14) Paonan-o naton masusunod an sugo ni Jesus nga diri na maghukom sumala ha aton nakikita?

6. (a) Ano an makakabulig ha aton nga mawara an aton negatibo nga panhunahuna o pagbati ha iba? (b) Ano an iginpapakita han report han usa nga tigurang?

⁶ Kinahanglan naton usisahon hin maopay an aton kalugaringon gamit an Pulong han Dios basi makita kon may-ada pa kita negatibo nga panhunahuna o pagbati ha iba. (Sal. 119:105) Bangin kinahanglan liwat naton an mahigugmaon nga bulig han iba nga bangin nakakaobserbar nga may-ada kita han sugad nga panhunahuna o pagbati, nga posible nga diri naton nakikita ha aton  kalugaringon. (Gal. 2:11, 14) Bangin normal na la ha aton ito nga panhunahuna o pagbati salit diri naton nasasantop nga may-ada kita hito. Pananglitan, hunahunaa an ginsiring han usa nga tigurang ha iya report mahitungod ha madasigon nga mag-asawa nga nag-aalagad hin bug-os-panahon. An bana tikang ha usa nga lahi nga ginmiminos han damu nga tawo. Posible nga waray masantop han tigurang nga hiya mismo may negatibo nga panhunahuna hito nga lahi. Ha iya report, damu an iya mag-opay nga komento mahitungod ha bana; pero ha iya konklusyon, hiya nagsiring: “Bisan kon [ini an iya nasyonalidad], an iya batasan ngan paagi han pagkinabuhi nakabulig ha iba nga hibaroan nga an pagin [tikang hini nga lahi] diri nagpapasabot nga mahugaw ngan minos an iya paagi han pagkinabuhi nga komon ha damu nga nagtikang [hini] nga lahi.” Nasasabtan mo ba an punto? Anoman an aton pribilehiyo, kinahanglan naton usisahon hin maopay an aton kalugaringon ngan magin andam ha pagkarawat hin bulig basi makita naton kon may nabibilin pa ha aton kasingkasing nga bisan ano nga negatibo nga pagbati ha iba. Ano pa an aton mahimo buhaton?

7. Paonan-o naton maipapakita nga aton ‘gin-aabrihan hin haluag an aton kasingkasing’?

⁷ Kon aton ‘aabrihan hin haluag an aton kasingkasing,’ masasaliwnan hin gugma an aton negatibo nga pagbati ha iba. (2 Cor. 6:11-13) Nakikig-upod ka la ba ha mga tawo nga kapariho mo an lahi, nasyonalidad, tribo, o linggwahe? Kon oo, pangalimbasog nga makig-upod liwat ha iba. Mahimo mo hangyoon adton iba an lahi o kultura nga umupod ha imo ha ministeryo o imbitaron hira ha iyo balay para hin pangaon o katitirok. (Buh. 16:14, 15) Kon bubuhaton mo ito, mapupuno an imo kasingkasing hin gugma salit waray na lugar an negatibo nga mga pagbati. Kondi may iba pa nga bahin diin mahimo naton hukman an iba sumala ha aton nakikita. Hisgotan naton an mahitungod ha materyal nga karikohan.

8. Sumala ha Lebitiko 19:15, paonan-o an pagin riko o pagin pobre han usa mahimo makaapekto ha aton pagtratar ha iya?

⁸ An pagin riko o pagin pobre han usa mahimo liwat makaapekto ha aton pagtratar ha iya. An Lebitiko 19:15 nasiring: “Diri mo pagpalabilabihan an pagkatawo han kablasanon, bisan pagpasidungug han pagkatawo han makagarahum [o, riko], kondi ha katadungan paghukman mo an imo igkasitawo.” Pero paonan-o an pagin riko o pobre han usa mahimo makaapekto ha aton pagtratar ha iya?

9. Ano nga makasurubo nga kamatuoran an iginsurat ni Solomon, ngan ano an igintututdo hito ha aton?

⁹ Ha paggiya han baraan nga espiritu, iginsurat ni Solomon an usa nga makasurubo nga kamatuoran mahitungod ha diri perpekto nga mga tawo. Ha Proberbios 14:20, hiya nagsiring: “An kablas ikinangangalas bisan han iya kalugaringon nga anyaw: Kondi an bahandianon mayada damu nga kasangkayan.” Ano an igintututdo hini ha aton? Kon diri kita magbabantay, mahimo naton hingyapon nga makigsangkay ha riko nga kabugtoan ngan likyan an pobre nga kabugtoan. Kay ano nga peligroso gud kon huhunahunaon naton nga an bili han usa nga tawo nakadepende ha iya pagin riko o pagin pobre?

10. Nagpahamangno hi Santiago ha mga Kristiano may kalabotan ha ano nga problema?

¹⁰ Kon magkaiba an aton pagtratar ha kabugtoan tungod ha ira pagin riko o pagin pobre, mahimo kita magpahinabo hin pagkabahin-bahin ha kongregasyon. Nahitabo ini ha pipira nga kongregasyon han siyahan nga siglo, ngan ginpahamangnoan ni Santiago an mga Kristiano mahitungod hini. (Basaha an Santiago 2:1-4.) Diri naton sadang tugotan an sugad nga disposisyon nga magin hinungdan nga magkaada pagkabahin-bahin ha aton kongregasyon yana. Paonan-o naton malilikyan nga maghukom sumala ha aton nakikita?

11. An pagin riko o pagin pobre ba han usa nakakaapekto ha iya relasyon kan Jehova? Isaysay.

¹¹ Kinahanglan naton kitaon an aton kabugtoan  pariho han pagkita ha ira ni Jehova. Diri nagigin presyoso kan Jehova an usa nga tawo tungod la kay riko hiya o pobre. An aton relasyon kan Jehova diri nakadepende ha kadamu han materyal nga butang nga may-ada kita o ha kon ano an waray kita. Oo, bisan kon nagsiring hi Jesus nga “makuri makasulod ha Ginhadian han langit an riko nga tawo,” waray hiya magsiring nga imposible ito. (Mat. 19:23) Ha luyo nga bahin, hi Jesus nagsiring liwat: “Malipayon kamo nga mga pobre, kay para ha iyo an Ginhadian han Dios.” (Luc. 6:20) Pero diri ini nagpapasabot nga an ngatanan nga pobre nakakarawat hin espesyal nga bendisyon ngan namati kan Jesus. Damu nga pobre an waray mamati. Ano an punto? Diri naton masisiring nga may maopay nga relasyon kan Jehova an usa tungod han iya pagin riko o pagin pobre.

12. Ano an iginsusugo han Kasuratan ha mga riko ngan ha mga pobre?

¹² Mapasalamaton kita nga may-ada kita damu nga kabugtoan, riko ngan pobre, nga nahigugma ngan nag-aalagad kan Jehova hin bug-os-kasingkasing. Ginsusugo han Kasuratan an mga riko nga “diri sumarig ha waray-kasigurohan nga karikohan, kondi ha Dios.” (Basaha an 1 Timoteo 6:17-19.) Sugad man, ginpapahamangnoan han Pulong han Dios an ngatanan nga katawohan han Dios, riko ngan pobre, nga magbantay nga diri higugmaon an kwarta. (1 Tim. 6:9, 10) Oo, kon kikitaon naton an kabugtoan pariho han pagkita ha ira ni Jehova, diri kita masusulay nga hukman hira basado ha materyal nga mga butang nga may-ada hira o waray hira. Pero kumusta man an edad han usa? Makatadunganon ba ito nga basihan ha paghukom ha iba? Kitaon naton.

13. Ano an igintututdo ha aton han Kasuratan may kalabotan ha pagrespeto ha mga edaran?

¹³ An Kasuratan agsob nga nag-uunabi nga kinahanglan naton respetuhon an mga edaran. An Lebitiko 19:32 nasiring: “Tumindog ka ha atubangan han mga ubanon, ngan tahura an bayhon han tigurang nga tawo, ngan mahadluk ka han imo Dios.” An Proberbios 16:31 nasiring liwat nga “an ubanon nga olo amo an podongpodong han himaya; ini hiaagian dida ha dalan ha pagkamatadong.” Sugad man, ginsagdonan ni Pablo hi Timoteo nga diri mag-isog kon nagsasaway ha edaran nga tawo kondi trataron hiya sugad nga tatay. (1 Tim. 5:1, 2) Bisan kon may awtoridad hi Timoteo ha paghatag hin sagdon ha edaran nga kabugtoan, kinahanglan niya magpakita hin pagpaid ngan respeto ha ira.

14. Ha ano nga kahimtang mahimo magin angayan an paghatag hin ginkikinahanglan nga sagdon o disiplina ha usa nga mas edaran ha aton?

¹⁴ Kondi tubtob ha ano nga kahimtang sadang naton iaplikar ito nga prinsipyo? Pananglitan, kukonsinteron la ba naton an usa nga edaran bisan kon tinuyo nga nagbubuhat hiya hin sala o nag-aaghat hin butang nga nakakapasubo kan Jehova? Hi Jehova diri maghuhukom basado ha panggawas nga hitsura ngan diri niya kukonsinteron an usa nga tinuyo nga nakasala tungod la kay edaran na ito nga tawo. Tigamni an prinsipyo ha Isaias 65:20: “An makasasala nga usa ka gatus ka tuig an panuigon panhihimarauton.” Sugad liwat hito an prinsipyo nga igintututdo han bisyon ni Esekiel. (Esek. 9:5-7) Salit an sadang magin pinakaimportante ha aton amo an pagpakita pirme hin respeto kan Jehova nga Dios, an “usa nga tigurang na ha mga adlaw.” (Dan. 7:9, 10, 13, 14) Kon bubuhaton naton ito, diri kita mahahadlok ha pagtadong ha usa nga tawo nga nagkikinahanglan hin sagdon, anoman an iya edad.​—Gal. 6:1.

15. Ano an aton mahibabaroan tikang kan apostol Pablo mahitungod ha pagpakita hin respeto ha burobata nga mga brother?

¹⁵ Kumusta man ha batan-on nga mga brother ha kongregasyon? Ano an imo pagtratar ha ira? Hi apostol Pablo nagsurat ha batan-on nga hi Timoteo: “Ayaw gud pasagdi nga minuson ka han bisan hin-o tungod han imo pagin batan-on. Lugod, ha mga matinumanon magin susbaranan ka ha imo pagyakan, paggawi, gugma, pagtoo, ngan kaputli.” (1 Tim. 4:12) Han iginsurat ini ni Pablo, posible nga mga 30 anyos hi Timoteo. Pero gintokahan hiya ni Pablo hin magbug-at nga responsabilidad.  Anoman an rason ha paghatag hini nga sagdon, matin-aw an punto. Diri naton sadang hukman an burobata nga mga brother basado han ira edad. Tigamni nga bisan an aton Ginoo nga hi Jesus mga sobra 30 anyos pa la han natapos niya an iya bug-os nga ministeryo dinhi ha tuna.

16, 17. (a) Ano an sadang magin basihan han mga tigurang ha pagdesisyon kon an usa nga brother kwalipikado na nga irekomendar sugad nga ministeryal nga surugoon o tigurang? (b) Paonan-o an personal nga opinyon o kultura mahimo magin diri uyon ha ginsisiring han Kasuratan?

¹⁶ Bangin naukoy kita ha usa nga lugar diin kasagaran nga ginmiminos an burobata nga kalalakin-an. Tungod hito, an mga tigurang ha kongregasyon bangin mag-alang pagrekomendar hin kwalipikado nga batan-on nga mga brother nga magin ministeryal nga mga surugoon o tigurang. Sadang hinumdoman han ngatanan nga tigurang nga waray maghatag an Kasuratan hin espisipiko nga edad para irekomendar an usa sugad nga ministeryal nga surugoon o tigurang. (1 Tim. 3:1-10, 12, 13; Tito 1:5-9) Kon an usa nga tigurang naghihimo hin surundon basado ha kultura, diri niya ginsusunod an Kasuratan. Sadang usisahon an kwalipikasyon han burobata nga mga brother uyon ha suruklan ha Pulong han Dios, diri ha personal nga opinyon o kultura.​—2 Tim. 3:16, 17.

¹⁷ Tagda kon paonan-o inin diri Kasuratanhon nga panhunahuna mahimo magin hinungdan nga diri irekomendar an kwalipikado nga mga brother. Ha usa nga nasud, usa nga kwalipikado gud nga ministeryal nga surugoon an gintaporan hin magbug-at nga responsabilidad. Bisan kon nagkauruyon an mga tigurang ha iya kongregasyon nga naabot na niya an Kasuratanhon nga mga kwalipikasyon para ha pagin tigurang, waray hiya irekomendar. An pipira nga mas edaran nga tigurang nag-insister nga bata pa hiya hinduro para magin tigurang. Makasurubo, waray irekomendar an brother tungod la han iya panggawas nga hitsura. Bisan kon usa la ini nga eksperyensya, iginpapakita han mga report nga komon ini nga panhunahuna ha damu nga lugar ha kalibotan. Importante gud nga sundon naton an Kasuratan imbes nga an aton personal nga opinyon o kultura! Ito la an paagi nga masusunod naton an sugo ni Jesus nga diri na maghukom sumala ha panggawas nga hitsura.

18, 19. Ano an kinahanglan naton buhaton basi mahibaro kita ha pagkita ha iba pariho han pagkita ha ira ni Jehova?

¹⁸ Bisan kon diri kita perpekto, mahimo kita mahibaro ha pagkita ha iba pariho han pagkita ha ira ni Jehova, nga waray pinaurog. (Buh. 10:34, 35) Pero nagkikinahanglan ito hin padayon nga pangalimbasog ngan paghatag hin atensyon ha mga pahinumdom tikang ha Pulong han Dios. Pinaagi ha pag-aplikar hini nga mga pahinumdom, masusunod naton an sugo ni Jesus nga diri na maghukom sumala ha aton nakikita.​—Juan 7:24.

¹⁹ Diri na mag-iiha, an aton Hadi, hi Jesu-Kristo, maghuhukom ha ngatanan nga tawo, diri sumala ha iya nakikita o nababatian, kondi ha matadong nga paagi. (Isa. 11:3, 4) Ginpapamulat gud naton iton makalilipay nga panahon!