TUNGOD kay nagtitikakuri an pagkinabuhi durante hinin “kataposan nga mga adlaw,” mas ginkikinahanglan gud yana han katawohan ni Jehova an hilawig nga pagpailob. (2 Tim. 3:1-5) Napapalibotan kita hin mga tawo nga mahigugmaon ha ira kalugaringon, diri naruruyag ha bisan ano nga pakigsabot, ngan waray pagpugong ha kalugaringon. Adton may-ada hito nga mga kalidad kasagaran nga diri mapailubon. Salit sadang pakianhan han tagsa nga Kristiano an iya kalugaringon: ‘Nagigin pariho na ba ako ha mga tawo ha kalibotan nga diri mapailubon? Ano an karuyag sidngon han pagin tinuod nga mapailubon? Ngan ano an sadang ko himoon basi magin bahin han akon personalidad inin maopay gud nga kalidad?’

Uyon ha pagkagamit han Biblia hini nga pulong, an hilawig nga pagpailob diri kay basta pag-ilob la hin usa nga makuri nga sitwasyon. An tawo nga may hilawig nga pagpailob nagpapailob nga may katuyoan. Ginhuhunahuna niya diri la an iya kalugaringon nga mga panginahanglan kondi pati an makakaopay ha iba, bisan ha usa nga hinungdan han diri maopay nga sitwasyon. Kon may nakasayop o nakapasina ha usa nga mapailubon nga tawo, padayon hiya nga naglalaom nga magigin maopay utro an nadaot nga relasyon. Salit diri urusahon nga siyahan nga gin-unabi han Biblia an ‘hilawig nga pagpailob’ ha damu nga mag-opay nga kalidad nga nagtitikang ha gugma. * (1 Cor. 13:4, ftn.) Igin-upod liwat han Biblia an “hilawig nga pagpailob” sugad nga bahin han “bunga han espiritu.” (Gal. 5:22, 23) Ano an kinahanglan naton buhaton basi makultibar inin diosnon nga kalidad?

Basi makultibar an hilawig nga pagpailob, kinahanglan mag-ampo kita han bulig han espiritu ni Jehova, nga iya iginhahatag ha mga nasarig ha iya. (Luc. 11:13) Kondi labot la han gamhanan nga espiritu han Dios, kinahanglan liwat naton buhaton an aton bahin ngan gumios uyon ha aton mga pag-ampo. (Sal. 86:10, 11) Nagpapasabot ini nga kinahanglan naton buhaton an aton bug-os nga mahihimo nga maipakita kada adlaw an hilawig nga pagpailob basi makagamot ha aton kasingkasing ini nga kalidad. Kondi usahay bangin mapakyas kita ha pagbuhat hito, salit kinahanglan naton mas mangalimbasog pa basi magin permanente nga bahin han aton personalidad an hilawig nga pagpailob. Ano pa an makakabulig ha aton?

Mahimo naton makultibar an hilawig nga pagpailob pinaagi ha paghibaro ngan pagsubad han perpekto nga susbaranan ni Jesus. Uyon hito nga susbaranan, gin-giyahan hi apostol Pablo ha paghisgot mahitungod han “bag-o nga personalidad,” nga nag-uupod han “hilawig nga pagpailob,” ngan gin-aghat kita niya nga tugotan ‘an kamurayawan han Kristo [nga] magmando ha aton kasingkasing.’ (Col. 3:10, 12, 15; ftn.) Gintutugotan naton nga “magmando” ha aton kasingkasing ito nga kamurayawan kon ginsusubad naton an marig-on nga pagtoo ni Jesus nga tatadungon ni Jehova ha Iya husto nga panahon an mga butang nga nakakapabaraka ha aton. Kon ginsusubad naton an ehemplo ni Jesus, diri kita maaaghat  nga magin diri mapailubon, anoman an bangin nahitatabo ha aton palibot.​—Juan 14:27; 16:33.

Bisan kon karuyag na gud naton makita an bag-o nga kalibotan nga iginsaad han Dios, nahibabaro kita nga magin mas mapailubon kon ginpapamalandong naton an pagin mapailubon ni Jehova ha aton. An Kasuratan nagpapasarig ha aton: “Hi Jehova diri naglalangan ha pagtuman han iya saad, sugad han ginhuhunahuna han iba nga mga tawo, pero nagpapailob hiya ha iyo kay diri niya karuyag nga mabungkag an bisan hin-o, lugod karuyag niya nga magbasol an ngatanan.” (2 Ped. 3:9) Samtang ginpapamalandong naton an pagin mapailubon ni Jehova ha aton, diri ba kita napapagios nga magin mapailubon liwat ha iba? (Roma 2:4) Ano an pipira nga sitwasyon diin kinahanglan naton an hilawig nga pagpailob?

Kada adlaw, damu an mga sitwasyon nga mahimo magsari han aton hilawig nga pagpailob. Pananglitan, kon may importante nga butang nga karuyag mo isiring, bangin kinahanglan mo magin mapailubon basi diri sumagbang ha usa nga nagyayakan. (San. 1:19) Bangin kinahanglan mo liwat magin mapailubon kon nakikig-upod ka ha mga igkasi-tumuroo nga an batasan nakakaaringit ha imo. Imbes nga maubosan ka hin pasensya, maaramon an paghunahuna kon ano an reaksyon ni Jehova ngan ni Jesus ha aton mga kaluyahan. Diri hira nagpupokus ha aton gudtiay nga sayop. Lugod, ginkikita nira an aton mag-opay nga kalidad ngan mapailubon nga nag-oobserbar ha aton mga pangalimbasog nga mag-uswag.​—1 Tim. 1:16; 1 Ped. 3:12.

Bangin masarihan liwat an aton pagin mapailubon kon may nagsiring ha aton nga may ginyakan o ginbuhat kita nga sayop. Ha sugad nga sitwasyon, bangin masina dayon kita ngan depensahan an aton kalugaringon. Pero an Pulong han Dios nagtututdo ha aton nga diri magreak ha sugad nga paagi. Ito nasiring: “An kamapailubon ha espiritu maoroopay kay han kamapalabilabihon ha espiritu. Ayaw pagmahinanalion ha imo espiritu ha pagkasina; kay an kasina napahuway ha dughan han mga lurong.” (Ekles. 7:8, 9) Salit bisan kon diri tinuod an akusasyon ha aton, kinahanglan pugngan naton an aton kalugaringon ngan maghunahuna anay antes magreak. Ginsunod ni Jesus ito nga prinsipyo han gin-akusaran ngan ginpakaraot hiya han iba.​—Mat. 11:19.

An mga kag-anak labi nga kinahanglan magpakita hin hilawig nga pagpailob kon nakikita nira nga kinahanglan tadungon an ira anak tungod han diri maopay nga panggawi, kinaiya, o sayop nga hingyap. Tagda an eksperyensya ni Mattias, nga nag-aalagad ha Bethel ha Scandinavia. Han tin-edyer hiya, gintitinamay hiya ha eskwelahan tungod han iya mga gintotoohan. Ha tinikangan, diri maaram hito an iya mga kag-anak. Pero kinahanglan nira atubangon an epekto hito nga pagtamay ha ira anak, nga nagtikang pagkwestyon kon tinuod gud ba an iya gintotoohan. “Kinahanglan gud an hilawig nga pagpailob hini nga sitwasyon,” siring han tatay ni Mattias nga hi Gillis. Hi Mattias nagpapakiana sugad han: “Hin-o an Dios? Anoman kon an Biblia diri Pulong han Dios? Paonan-o kita makakasiring nga an Dios gud an nagsusugo ha aton nga buhaton ini o ito?” Usahay, ginsisidngan liwat niya an iya tatay: “Kay ano nga huhukman ako kon diri ko karuyag an iyo karuyag ngan diri ako natoo ha iyo gintotoohan?”

Hi Gillis nagsaysay, “Usahay, iginpapakiana niya an sugad nga mga butang tungod ha kasina, diri ha iya nanay o ha akon, kondi ha kamatuoran, kay ginhuhunahuna niya nga ito an nagpapakuri ha iya.” Paonan-o ginbuligan ni Gillis an iya anak? “Nalingkod ngan nag-iistorya kami han akon anak ha sulod hin pipira ka oras. Kasagaran na nga namamati la  ako ha iya ngan usahay nagpapakiana basi masabtan kon ano gud an iya inaabat ngan ginhuhunahuna. Usahay, may iginsasaysay ako ha iya nga mahimo niya hunahunaon ha sulod hin usa ka adlaw o sobra pa antes namon ito pag-istoryahan utro. May mga panahon nga ginsisidngan ko hiya nga kinahanglan ko hin pipira ka adlaw basi hunahunaon an iya ginsiring. Pinaagi hinin regular nga pag-istorya, hinay-hinay nga nasabtan ngan ginkarawat ni Mattias an mga katutdoan sugad han lukat, pagkasoberano han Dios, ngan gugma ni Jehova. Nagkinahanglan ito hin panahon, ngan agsob nga makuri ito, pero ha hinay-hinay, tinubo ha iya kasingkasing an gugma kan Jehova. Malipayon gud kami han akon asawa nga an amon pagin mapailubon ha pagbulig ha amon anak han tin-edyer hiya nagkaada maopay nga resulta ngan nakaabot ha iya kasingkasing.”

Hi Gillis ngan an iya asawa sinarig ha bulig ni Jehova samtang mapailubon nga ginbubuligan nira an ira anak. Ha paghinumdom han naglabay, hi Gillis nagsiring: “Agsob nga ginsusumatan ko hi Mattias nga tungod han amon daku nga gugma ha iya naaghat kami ni iya nanay nga mas manginyupo pa gud kan Jehova nga buligan hiya nga makasabot.” Mapasalamaton gud ini nga mga kag-anak nga ira iginpakita an importante nga kalidad nga hilawig nga pagpailob!

Labot ha pagtagana hin espirituwal nga bulig, kinahanglan kultibaron han tinuod nga mga Kristiano an hilawig nga pagpailob kon may gin-aataman hira nga kapamilya o sangkay nga may sakit nga maiha matambal. Tagda an eksperyensya ni Ellen, * nga naukoy liwat ha Scandinavia.

Mga walo ka tuig na an naglabay, an bana ni Ellen duha ka beses nga naistrok ngan nadaot hito an iya utok. Sugad nga resulta, diri na hiya naabat hin pagpaid, kalipay, o kasubo. Nakukurian gud hi Ellen ha iya kahimtang. Hiya nagsiring: “Kinahanglan gud an hilawig nga pagpailob ngan damu nga pag-ampo.” Hiya nagdugang: “An akon paborito nga teksto nga nakakaliaw ha akon amo an Filipos 4:13, nga nasiring: ‘Ha ngatanan nga butang may kusog ako pinaagi ha iya nga naghahatag ha akon hin gahum.’” Tungod hito nga gahum, padayon nga nakakapailob hi Ellen ngan bug-os nga nasarig nga bubuligan hiya ni Jehova.​—Sal. 62:5, 6.

Syempre, hi Jehova an pinakamaopay nga ehemplo han pagin mapailubon nga sadang naton subaron. (2 Ped. 3:15) Ha Pulong han Dios, mababasa naton an damu nga asoy diin nagpakita hi Jehova hin hilawig nga pagpailob. (Neh. 9:30; Isa. 30:18) Pananglitan, ano an reaksyon ni Jehova han ginkwestyon ni Abraham an Iya desisyon nga bungkagon an Sodoma? Siyahan, waray sumagbang hi Jehova samtang nagyayakan hi Abraham. Lugod, mapailubon nga namati hiya ha tagsa nga pakiana ngan ginkakabarak-an ni Abraham. Katapos, iginpakita niya nga ginpamatian niya hi Abraham han gin-utro niya an mga ginkakabarak-an ni Abraham ngan ginpasarig hiya nga diri Niya bubungkagon an Sodoma bisan kon may napulo la nga matadong hito nga syudad. (Gen. 18:22-33) Maopay gud ito nga ehemplo han mapailubon nga pagpamati ngan diri sobra nga pagreak!

An hilawig nga pagpailob importante gud nga bahin han bag-o nga personalidad nga kinahanglan isul-ot han ngatanan nga Kristiano. Kon ginbubuhat naton an ngatanan basi makultibar inin birilhon nga kalidad, napapasidunggan naton an aton mahigugmaon ngan mapailubon nga Amay ha langit, ngan magigin kaupod kita hadton ‘makakakarawat han mga saad tungod han pagtoo ngan pagpailob.’​—Heb. 6:10-12.