1. Paonan-o an paglarang nagpapamatuod han pagin mahinatagon ni Jehova?

BISAN kon nag-uusahan la hi Jehova han nagtikang hiya paglarang, waray niya hunahunaa an iya la kalugaringon. Lugod, iginhatag niya an regalo nga kinabuhi ha intelihente nga mga linarang ha langit ngan ha tuna. Karuyag gud ni Jehova, an “malipayon nga Dios,” nga maghatag hin mag-opay nga butang. (1 Tim. 1:11; San. 1:17) Ngan tungod kay karuyag liwat niya nga magin malipayon kita, gintututdoan kita niya nga magin mahinatagon.​—Roma 1:20.

2, 3. (a) Kay ano nga nalilipay kita kon mahinatagon kita? (b) Ano an aton hihisgotan hini nga artikulo?

² Ginhimo han Dios an tawo ha iya ladawan. (Gen. 1:27) Karuyag sidngon, ginlarang kita nga may kapas nga maipakita an iya mga kalidad. Basi magin malipayon ngan umabat hin katagbaw, kinahanglan naton subaron an ehemplo ni Jehova. Pariho ha iya, kinahanglan naton magin interesado ha kaopayan han iba ngan magin mahinatagon. (Fil. 2:3, 4; San. 1:5) Kay ano? Tungod kay ito an mahigugmaon nga pagkadisenyo ha aton ni Jehova. Bisan kon diri kita perpekto, mahimo naton masubad an pagin mahinatagon ni Jehova.

³ An Biblia nagsusumat ha aton kon paonan-o kita magigin mahinatagon. Aton hisgotan an pipira nga leksyon nga igintututdo han Kasuratan  may kalabotan hini nga topiko. Hibabaroan naton kon paonan-o an pagin mahinatagon nagriresulta ha pag-uyon han Dios ngan kon paonan-o ini nga kalidad nabulig ha aton ha pagtuman han toka nga iginhatag ha aton han Dios. Hihisgotan liwat naton kon kay ano nga an pagin mahinatagon naghahatag ha aton hin kalipay ngan kon kay ano nga kinahanglan naton padayon nga kultibaron ini nga kalidad.

4, 5. Paonan-o hi Jehova ngan hi Jesus nagpakita ha aton hin susbaranan han pagin mahinatagon?

⁴ Karuyag ni Jehova nga subaron hiya han mga tawo, salit nalilipay hiya kon mahinatagon kita. (Efe. 5:1) Makikita ha paagi han pagkahimo ha aton ngan ha makaruruyag ngan magkadurodilain nga mga linarang ha aton palibot nga karuyag gud han Dios nga magin malipayon an mga tawo. (Sal. 104:24; 139:13-16) Salit napapasidunggan naton hiya kon nangangalimbasog kita nga mapalipay an iba.

⁵ Ginsusubad han tinuod nga mga Kristiano an Kristo, nga nagpakita ha aton hin perpekto nga susbaranan kon paonan-o an usa nga tawo magigin mahinatagon. Hi Jesus mismo nagsiring: “An Anak han tawo kinanhi, diri basi pagserbihan kondi basi magserbi ngan maghalad han iya kalag sugad nga lukat para ha damu nga tawo.” (Mat. 20:28) Salit, gin-aghat ni apostol Pablo an mga Kristiano: “Ipadayon niyo ini nga iyo disposisyon nga pariho han kan Kristo Jesus . . . Ginbayaan niya an ngatanan nga iya gintatag-iya ngan nagin pariho hin uripon.” (Fil. 2:5, 7) Maopay nga pakianhan naton an aton kalugaringon, ‘Ano pa an akon mahihimo basi mas masubad hin maopay an ehemplo ni Jesus?’​—Basaha an 1 Pedro 2:21.

6. Ano nga leksyon an igintututdo ha aton ni Jesus ha parabola mahitungod han maloloy-on nga Samaritano? (Kitaa an retrato ha tinikangan hini nga artikulo.)

⁶ Makakarawat naton an pag-uyon ni Jehova pinaagi ha pagsubad ha perpekto nga ehemplo nga iginpakita niya ngan han Kristo. Masusubad naton ito pinaagi ha pagin interesado ha kaopayan han iba ngan ha pamiling hin mga paagi nga maihatag an ira mga panginahanglan. Ngani, iginpatin-aw ni Jesus pinaagi han parabola mahitungod han maloloy-on nga Samaritano nga naglalaom hiya nga an iya mga sumurunod mangangalimbasog ha pagbulig ha iba, bisan hadton iba an lahi o gintikangan. (Basaha an Lucas 10:29-37.) Nahinunumdoman mo ba kon kay ano nga iginsumat ni Jesus an parabola mahitungod han maloloy-on nga Samaritano? Tungod ito han pakiana ha iya han usa nga Judio: “Hin-o gud ba an akon igkasi-tawo?” An baton ni Jesus nagtututdo ha aton nga kinahanglan naton magin mahinatagon pariho han Samaritano kon karuyag naton makarawat an pag-uyon han Dios.

7. Paonan-o naton iginpapakita nga natoo kita nga an paagi ni Jehova ha pagbuhat han mga butang amo an pinakamaopay? Isaysay.

⁷ Damu an mag-opay nga rason han mga Kristiano nga magin mahinatagon. Pananglitan, ini nga kalidad konektado ha isyu nga iginbangon ni Satanas ha hardin han Eden. Paonan-o? Nagsiring hi Satanas nga maghihingaopay hira Adan ngan Eva​—upod na an ngatanan nga tawo—​kon magpupokus hira ha ira la kalugaringon ngan uunahon an ira mga karuyag kay ha pagsugot ha Dios. Iginpakita ni Eva pinaagi ha iya ginbuhat nga makikalugaringon hiya ngan karuyag niya magin pariho ha Dios. Iginpakita ni Adan an iya pagin makikalugaringon pinaagi ha pagpalipay kan Eva imbes ha Dios. (Gen. 3:4-6) Makasurubo gud an mga resulta han ira desisyon. An pagin makikalugaringon diri naghahatag hin kalipay. Pinaagi ha pagin mahinatagon, iginpapakita naton nga natoo gud kita nga an paagi han Dios ha pagbuhat han mga butang amo an pinakamaopay.

8. Kay ano nga sadang unta magin interesado hira Adan ngan Eva ha pagin mahinatagon?

⁸ Gintagan han Dios an siyahan nga mag-asawa hin instruksyon nga sadang unta magpagios ha ira  nga hunahunaon an kaopayan han iba, bisan kon hira pa la an naukoy ha hardin han Eden. Ginbendisyonan hira ni Jehova ngan gin-aghat nga magpadamu, pun-on an tuna, ngan atamanon ito. (Gen. 1:28) Sugad la nga interesado gud an Maglalarang ha kon ano an makakaopay ha iya mga linarang, sadang liwat unta magin interesado an siyahan nga mag-asawa ha kon ano an makakaopay ha ira magigin mga anak. Hihimoon nga paraiso an bug-os nga tuna para ha kapulsanan han magigin mga anak ni Adan. Kinahanglan an kooperasyon han iya nagtitikadaku nga pamilya basi mahimo inin daku nga proyekto.

9. Kay ano nga an pagpahaluag han Paraiso maghahatag unta hin kalipay ha mga tawo?

⁹ Kinahanglan bug-os nga makigkooperar kan Jehova an perpekto nga mga tawo basi mapahaluag an Paraiso ngan matuman an iya katuyoan. Hini nga paagi, makakasulod hira ha iya pagpahuway. (Heb. 4:11) Hunahunaa la kon mationan-o unta kamakalilipay ngan makapatagbaw ini nga proyekto! An pagin andam ha pagsakripisyo para ha kaopayan han iba mahimo unta maghatag ha ira hin damu nga bendisyon ngan duro nga kalipay.

10, 11. Paonan-o naton matutuman an sugo nga magsangyaw ngan maghimo hin mga disipulo?

¹⁰ Yana, may iginhatag hi Jehova ha iya katawohan nga buruhaton​—an pagsangyaw ngan paghimo hin mga disipulo. Basi matuman ito nga sugo, kinahanglan naton magkaada tinuod nga interes ha kaopayan han iba. Makakapadayon la kita hini nga buruhaton kon may-ada kita han husto nga motibo​—an gugma ha Dios ngan ha aton igkasi-tawo.

¹¹ Han siyahan nga siglo, gin-unabi ni Pablo an iya kalugaringon ngan an iba pa nga Kristiano sugad nga “mga igkasi-magburuhat han Dios” tungod han ira toka ha pagtanom han liso han kamatuoran mahitungod han Ginhadian ngan pagsaribo hito. (1 Cor. 3:6, 9) Yana, mahimo liwat kita magin “mga igkasi-magburuhat han Dios” pinaagi ha paggamit han aton panahon, panag-iya, ngan kusog ha pagsuporta han pagsangyaw nga buruhaton nga iginsugo han Dios ha aton. Daku gud ini nga kadungganan!

12, 13. Para ha imo, ano an mga balos ha paghimo hin mga disipulo?

¹² An paggahin hin daku nga panahon ngan paggamit han aton kusog ha pagsangyaw ngan paghimo hin disipulo naghahatag ha aton hin duro nga kalipay. Ito an iginsusumat han damu nga kabugtoan nga nagkaada nag-uuswag nga mga Bible study. Makalilipay gud makita an maapresyaron nga mga indibiduwal nga nalilipay kon nasasabtan nira an mga kamatuoran ha Biblia, nagririg-on an pagtoo, naghihimo hin mga pagbag-o, ngan nagtitikang ha pagsumat ha iba han kamatuoran. Inabat liwat ni Jesus an duro nga kalipay han an 70 nga magwarali nga iya ginsugo nga magsangyaw “binalik nga malipayon” tungod han ira mag-opay nga eksperyensya.​—Luc. 10:17-21.

¹³ An mga magwarali ha bug-os nga kalibotan nalilipay kon nakikita nira an maopay nga epekto han maopay nga sumat ha kinabuhi han mga tawo. Tagda an eksperyensya ni Anna, usa nga batan-on  nga sister, nga nagpahaluag han iya ministeryo pinaagi ha pag-alagad ha usa nga lugar ha Este nga Europa diin daku an panginahanglan hin magwarali. * Hiya nagsurat: “Damu gud an higayon nga makagdumara hin mga Bible study dinhi, ngan naruruyagan ko gud ito. Nalilipay gud ako ha akon pag-alagad. Kon nauli ako ha balay, waray na ako panahon nga magpokus ha akon kalugaringon. Ginhuhunahuna ko an akon mga Bible study​—an ira mga problema ngan ginkakabarak-an. Naghuhunahuna ako kon paonan-o ko hira mapaparig-on ngan kon ano nga praktikal nga bulig an akon maihahatag. Ngan nagin kombinsido ako nga ‘mas makalilipay an paghatag kay ha pagkarawat.’”​—Buh. 20:35.

14. Bisan kon gutiay la an nakarawat han maopay nga sumat, paonan-o kita magkakaada kalipay ha aton ministeryo?

¹⁴ Aabaton naton an kalipay kon tatagan naton hin higayon an mga tawo nga mahibaro han maopay nga sumat bisan kon pilion nira nga diri mamati. Hinumdumi nga an sugo ha aton pariho han iginsugo kan propeta Esekiel, nga ginsidngan ni Jehova: “Imo igyakan an akon mga polong ngada ha ira, mamati ba hira, o diri hira magtagad.” (Esek. 2:7; Isa. 43:10) Bisan kon diri gin-aapresyar han iba an aton mensahe, gin-aapresyar ni Jehova an aton mga pangalimbasog. (Basaha an Hebreo 6:10.) Usa nga magwarali an nagpakita hin maopay gud nga disposisyon may kalabotan hini. Hiya nagsurat mahitungod han iya ministeryo, “Nagtanom kami, nagsaribo, ngan nag-ampo upod an pagsarig nga papatuboon ni Jehova an interes.”​—1 Cor. 3:6.

15. Sadang la ba kita magin mahinatagon kon gin-aapresyar han mga tawo an aton pagin mahinatagon? Isaysay.

¹⁵ Karuyag ni Jesus nga magin malipayon kita pinaagi ha pagin mahinatagon. Kon mahinatagon kita, damu nga tawo an naaaghat nga magin mahinatagon liwat. Hi Jesus nagsiring: “Batasana an paghatag, ngan an mga tawo mahatag ha iyo. Ira igbubuhos ha iyo surudlan an bug-os nga sukol, sinusô, inuy-og, ngan nagsasap-ay. Kay an suruklan nga iyo ginagamit ha iba, ito liwat an gagamiton ha iyo.” (Luc. 6:38) Syempre, diri ngatanan nagpapakita hin apresasyon ha aton pagin mahinatagon, pero adton may apresasyon, mahimo mapagios nga magin mahinatagon liwat. Salit batasana an pagin mahinatagon, apresyaron man  ito han mga tawo o diri. Diri ka maaram kon ano an maopay nga epekto bisan han imo usa la nga buhat ha pagin mahinatagon.

16. Ano an sadang naton magin motibo ha paghatag?

¹⁶ An mga tawo nga tinuod nga mahinatagon diri naglalaom hin balos. Ito an karuyag igtutdo ni Jesus han nagsiring hiya: “Kon mag-andam ka hin panagtawo, imbitara an mga pobre, baldado, piay, ngan buta, ngan malilipay ka, kay waray hira maibabalos ha imo.” (Luc. 14:13, 14) Usa nga giniyahan nga parasurat an nagsiring: ‘Hiya nga mahinatagon mabubulahan.’ An usa liwat nagsiring: “Bulahan adton nagdudumdum han kablasanon.” (Prob. 22:9; Sal. 41:1) Oo, sadang gud kita magin mahinatagon kay nagigin malipayon kita kon nabulig kita ha iba.

17. Ano an pipira nga mahimo naton maihatag nga makakapalipay ha aton?

¹⁷ Han ginkotar ni Pablo an ginsiring ni Jesus nga “mas makalilipay an paghatag kay ha pagkarawat,” gintutudlok ni Pablo diri la an paghatag hin materyal nga mga butang kondi pati liwat an paghatag hin pagparig-on, giya, ngan bulig para hadton nanginginahanglan hito. (Buh. 20:31-35) Pinaagi ha pulong ngan buhat, gintutdoan kita ni apostol Pablo kon mationan-o kaimportante an paghatag han aton panahon, kusog, atensyon, ngan gugma.

18. Ano an naobserbaran han damu nga parasaliksik mahitungod ha pagin mahinatagon?

¹⁸ Naobserbaran liwat han mga parasaliksik nga nag-aaram mahitungod ha panggawi han tawo nga an paghatag nakakapalipay ha mga tawo. Sumala ha usa nga artikulo, “an mga tawo nagsiring nga nagin mas malipayon hira katapos nira maghimo hin maopay ha iba.” An mga parasaliksik nagsiring nga an pagbulig ha iba nakakabulig nga “mas magkaada kahulogan ngan katuyoan” an kinabuhi han usa “kay gintatagbaw hito an nangunguna nga panginahanglan han tawo.” Salit agsob nga iginsusuhestyon han mga eksperto nga an mga tawo magboluntaryo ha mga buruhaton ha komunidad basi magin mas mahimsog ngan malipayon hira. Diri kita nahipapausa ha ira naobserbaran, tungod kay ginkakarawat naton an Biblia sugad nga Pulong han aton mahigugmaon nga Maglalarang nga hi Jehova.​—2 Tim. 3:16, 17.

19, 20. Kay ano nga karuyag mo magin mahinatagon?

¹⁹ Diri masayon an pagpabilin nga mahinatagon kon napapalibotan kita hin mga tawo nga kalugaringon la nga kaopayan an ginhuhunahuna. Pero ginpahinumdoman kita ni Jesus nga an duha nga pinakaimportante nga sugo amo an paghigugma kan Jehova ha bug-os naton nga kasingkasing, kalag, hunahuna, ngan kusog ngan an paghigugma ha aton igkasi-tawo sugad ha aton kalugaringon. (Mar. 12:28-31) Sugad han aton hinbaroan hini nga artikulo, an mga nahigugma kan Jehova nagsusubad ha iya. Mahinatagon hi Jehova ngan hi Jesus, ngan gin-aaghat kita nira nga magsubad ha ira, kay maghahatag ito ha aton hin tinuod nga kalipay. Kon mangangalimbasog kita nga magin mahinatagon ha aton mga ginbubuhat para ha Dios ngan para ha aton igkasi-tawo, mapapasidunggan naton hi Jehova ngan magpapahimulos kita hito pati an iba.

²⁰ Sigurado nga ginbubuhat mo na an ngatanan basi magin mahinatagon ngan basi buligan an iba, labi na an imo igkasi-tumuroo. (Gal. 6:10) Kon padayon mo ito nga bubuhaton, sigurado nga papasalamatan ngan hihigugmaon ka han mga tawo, ngan sugad nga resulta, magigin malipayon ka. An Proberbios 11:25 nasiring: “An mahinatagon nga kalag pagpapatambokon; ngan hiya nga nagbabaribi hiya man pagbabaribihan.” Syempre, an kinasingkasing nga paghatag, pagkabuotan, ngan pagin mahinatagon mahimo maipakita ha damu nga paagi ngan ha damu nga bahin han imo pagkinabuhi ngan ministeryo sugad nga Kristiano, ngan may-ada ito makalilipay nga mga resulta. Hihisgotan han masunod nga artikulo an pipira hini nga mga paagi ngan mga bahin.