SAMTANG nagbibiyahe an barko ha kadagatan han Atlantiko tipakadto ha Europa, an usa nga pasahero, hi George Young, malipayon nga namamalandong han iya mga nahimo para ha Ginhadian han nakadto pa hiya ha Brazil. * Pero samtang nagpapadayon an biyahe, ginhuhunahuna liwat ni Bugto Young an iya bag-o nga toka​—an kadak-an nga bahin han Espanya ngan Portugal nga waray pa masangyawi. Pag-abot didto, tumong niya nga makag-organisar hin mga pahayag nga basado ha Biblia nga pagdudumarahon ni Bugto J. F. Rutherford ngan makapanaltag hin 300,000 nga tract!

Pag-abot ni Bugto Young ha Lisbon han 1925, nakita niya an masamok nga kahimtang didto. Tungod han rebolusyon han 1910, natapos an monarkiya nga gobyerno ngan nagluya an gahum han Katoliko nga Singbahan. Mas nagkaada kagawasan an mga tawo, pero nagpadayon la gihapon an kasamok ha nasud.

Samtang gin-oorganisar ni Bugto Young an pagdudumarahon nga pahayag ni Bugto Rutherford, nagdeklara an gobyerno hin martial law tungod kay nagkaada kudeta. Ginpahamangnoan han sekretaryo han British and Foreign Bible Society hi Bugto Young nga sigurado nga kukontrahon gud hiya. Bisan pa hito, nag-aro hi Bugto Young hin permiso ha paggamit han gymnasium han Camões Secondary School, ngan gintugotan hiya!

Ngan inabot an Mayo 13, an eskedyol han pahayag ni Bugto Rutherford. Damu gud an nagpinamulat hito! An tema han pahayag nga “How to Live on the Earth Forever” igin-anunsyo pinaagi hin mga peryodiko ngan mga plakard nga makikita ha mga bilding. An relihiyoso nga mga parakontra nagpublikar dayon hin artikulo ha ira peryodiko basi pahamangnoan an ira magbarasa kontra ha bag-o la nga inabot nga “buwa nga mga propeta.” Ha entrada han gymnasium, nanhatag liwat an mga parakontra hin yinukot nga brosyur nga nagsusulod hin impormasyon nga nakontra ha mga katutdoan nga iginpresenta ni Bugto Rutherford.

Bisan pa hito, napuno an gymnasium hin mga 2,000 ka tawo, ngan mga 2,000 an waray na pasudla kay puno na ito. An pipira nga karuyag gud mamati sinaka ha mga pisi nga hagdan ha mga ligid han gymnasium; an iba nanlingkod ha bawbaw han mga gamit han gymnasium.

May mga problema nga nahitabo. An mga parakontra nan-gugliat ngan ginpuspos an mga lingkoran. Pero nagpabilin nga kalmado hi Bugto Rutherford ngan tinungtong hiya ha usa nga lamesa basi hiya mabatian. Katapos han iya pahayag​—nga hirani na ha katutnga han gab-i—​sobra 1,200 nga interesado an naghatag han ira ngaran ngan adres basi makakarawat hin mga literatura nga basado ha Biblia. Kinabuwasan, an peryodiko nga O Século nagpublikar hin artikulo mahitungod han pahayag ni Bugto Rutherford.

Han Septyembre 1925, nagtikang ipublikar ha Portugal an The Watch Tower ha Portuguese nga yinaknan. (Antes pa hito, may iginpublikar na nga Portuguese nga edisyon ha Brazil.) Hito nga mga panahon,  nagpaplano na hi Virgílio Ferguson, usa nga Estudyante han Biblia ha Brazil, nga bumalhin ha Portugal basi bumulig ha buruhaton han Ginhadian didto. Nakatrabaho na niya hadto hi Bugto Young ha gutiay nga sanga nga opisina han mga Estudyante han Biblia ha Brazil. Waray pag-iha, nagbiyahe hi Virgílio kaupod an iya asawa nga hi Lizzie, basi makaupod utro hi Bugto Young. Napapanahon gud an pag-abot ni Bugto Ferguson kay ha diri maiha mabalhin na hi Bugto Young ha iya bag-o nga toka, nga nag-uupod han Unyon Sobyet.

Tungod han kudeta han mga sundalo nga nagin hinungdan han kaporma han diktador nga gobyerno ha Portugal, nagduro an pagkontra ha aton buruhaton. Bisan pa hito, maisugon nga nagpabilin didto hi Bugto Ferguson ngan nangalimbasog hiya nga panalipdan an gutiay nga grupo han mga Estudyante han Biblia. Gin-aghat liwat niya hira nga magpadayon ha ira buruhaton. Nangaro hiya hin permiso nga gamiton an iya balay sugad nga katirokan. Han Oktubre 1927, gin-aprobaran ito han gobyerno.

Durante han siyahan nga tuig han pagmando han diktador nga gobyerno ha Portugal, mga 450 ka tawo an nag-aro hin subskripsyon han The Watch Tower. Labot pa hito, an mga tract ngan bokleta nakabulig liwat nga maipasamwak an kamatuoran ha hirayo nga mga bahin han Imperyo han Portugal​—an Angola, Azores, Cape Verde, East Timor, Goa, Madeira, ngan Mozambique.

Ha ikatarapos han dekada han 1920, inabot ha Lisbon an usa nga Portuguese nga hardinero nga hi Manuel da Silva Jordão. Han naukoy pa hiya ha Brazil, nakapamati hiya hin usa nga pahayag ni Bugto Young. Nakombinse dayon hiya nga kamatuoran an iya nabatian ngan determinado hiya nga buligan hi Bugto Ferguson ha pagpahaluag han pagsangyaw nga buruhaton. Basi mahimo ito, nag-alagad hi Manuel sugad nga colporteur, an tawag hadto ha mga payunir. Tungod kay nagin organisado na an pag-imprinta ngan pagpanaltag han basado ha Biblia nga mga literatura, nag-uswag an bag-o nga kongregasyon ha Lisbon!

Han 1934, kinahanglan bumalik ha Brazil hi Bugto Ferguson ngan an iya asawa. Kondi naisabwag na an mga binhi han kamatuoran. Bisan pa han duro nga kasamok ha Europa durante han girra sibil ha Espanya ngan Girra ha Kalibotan II, an matinumanon nga grupo han kabugtoan ha Portugal nagpabilin nga maunungon kan Jehova. Ha sulod hin pipira ka panahon, pariho hira hin mga baga, pero han 1947, nagtikakusog an ira kalayo, siring pa, han inabot an siyahan nga misyonero nga hi John Cooke, nga nabansay ha Gilead. Ngan katapos hito, padayon nga nagtikadamu an mga magwarali han Ginhadian. Bisan han igindiri han gobyerno an buruhaton han mga Saksi ni Jehova han 1962, padayon la gihapon an pag-uswag. Han Disyembre 1974, han nagin legal na an buruhaton han mga Saksi ni Jehova, sobra 13,000 na an magwarali hito nga nasud.

Yana, sobra 50,000 nga magwarali an nagsasangyaw han maopay nga sumat han Ginhadian han Dios ha Portugal ngan ha pipira nga isla nga nagyayakan hin Portuguese, upod na an Azores ngan Madeira. An iba hini nga mga magwarali ikatulo na nga henerasyon han pipira nga nakatambong han makasaysayan nga pahayag ni Bugto Rutherford han 1925.

Mapasalamaton gud kita kan Jehova ngan ha matinumanon nga kabugtoan hadto nga maisugon nga nanguna ha buruhaton sugad nga mga ‘surugoon ni Kristo Jesus ngadto ha mga nasud.’​—Roma 15:15, 16.—Tikang ha aton daan nga mga koleksyon ha Portugal.