Hira Nicolas ngan Céline inatubang hin iba nga problema. Ginkarawat nira an asaynment tikang ha branch han France nga bumalhin hin kongregasyon. Hira nagsiring: “Ha siyahan, eksayted gud kami, pero katapos inabat kami hin kamingaw ha amon kasangkayan. Diri pa gud kami duok ha kabugtoan ha amon bag-o nga kongregasyon.” a Tungod kay puydi ito magin makuri, paonan-o kita mahimo magin malampuson ha pagbalhin hin kongregasyon? Ano an maibubulig han iba? Ngan ano nga espirituwal nga mga bendisyon an mahimo nimo makarawat ngan maihatag ha imo bag-o nga kongregasyon?

UPAT NGA PRINSIPYO NGA MABULIG HA IMO NGA MAKA-ADJUST

1. Sarig kan Jehova. (Sal. 37:5) Hi Kazumi, nga taga-Japan, binaya ha kongregasyon diin hiya naka-associate hin 20 ka tuig han an trabaho han iya bana iginbalhin ha iba nga lugar. Paonan-o niya ‘iginsarig kan Jehova an iya pagkinabuhi’? Hiya nagsiring: “Pauroutro ko nga iginsumat kan Jehova an ngatanan nga kahadlok, kamingaw, ngan kabaraka nga akon inabat. Ha kada panahon nga ginhihimo ko ito, gintatagan niya ako hin kusog nga akon kinahanglan.”

Paonan-o mo madudugangan an imo pagsarig kan Jehova? Sugad la nga an tanom nagkikinahanglan hin tubig ngan mga sustansya tikang ha tuna basi tumubo, an aton liwat pagtoo nagkikinahanglan hin sustansya siring pa, basi tumubo. Nasantop ni Nicolas, nga gin-unabi na, nga an pagpamalandong ha mga ehemplo nira Abraham, Jesus, ngan Pablo—kalalakin-an nga naghimo hin damu nga sakripisyo ha pagbuhat han kaburut-on han Dios—nakaparig-on han iya pagsarig nga bubuligan hiya ni Jehova. An regular nga personal nga  pag-aram mabulig ha imo diri la nga maatubang an bisan ano nga pagbag-o ha imo kinabuhi kondi mahibabaro ka liwat han mga butang nga mahimo mo magamit ha pagdasig ha iba ha imo bag-o nga kongregasyon.

2. Likayi an pagkompara. (Ecles. 7:10) Hi Jules kinahanglan mag-adjust ha iba gud nga kultura han binalhin hiya tikang ha Benin ngadto ha United States. “Inabat ko nga kinahanglan ko isumat ha kada ko nakikilala an mahitungod ha akon kinabuhi,” siring niya. Tungod kay iba ini ha iya nahiaraan, nagtikang hiya nga ibulag an iya kalugaringon ha kongregasyon. Pero katapos niya mas makilala an kabugtoan, nagbag-o an iya panhunahuna. Hiya nagsiring: “Natoo ako nga hain man kita ha kalibotan, parapriho la an mga tawo. Iba-iba la an paagi han ira pagpahayag han ira kalugaringon. Importante an pagkarawat ha mga tawo kon ano hira.” Salit likayi nga ikompara an imo kongregasyon hadto. Pariho han ginsiring han usa nga payunir nga sister nga hi Anne-Lise: “Binalhin ako diri basi bilngon kon ano an may-ada ako hadto. Binalhin ako basi madiskobrehan an bag-o nga mga butang.”

Dapat liwat likayan han mga tigurang nga ikompara an ira kongregasyon hadto. Diri man sayop an pagkaada iba-iba nga pamaagi. Maaramon nga hibaroan anay an lokal nga mga kahimtang antes maghatag hin mga suhestyon. (Ecles. 3:​1, 7b) Mas maopay nga manguna pinaagi han ehemplo kay ha pag-implementar ha kongregasyon han kalugaringon nga mga ideya.​—2 Cor. 1:24.

3. Pakigbahin ha mga buruhaton. (Fil. 1:27) An pagbalhin nagkikinahanglan hin daku nga panahon ngan kusog, pero importante nga umatender ha mga katirok han kongregasyon—kon posible ha in person—ha tinikangan pa la. Ngani, kon diri ka gud nakikita o talagsa ka la makita ha imo bag-o nga kongregasyon, paonan-o ka nira mabubuligan? Hi Lucinda, nga binalhin kaupod an iya duha nga anak nga babaye ha daku nga syudad ha South Africa, nagsiring: “Ginsagdonan ako nga magpokus ha pakigbahin gud ha mga buruhaton ha kongregasyon, pakig-upod ha iba ha ministeryo, ngan pagkomento ha mga katirok. Ginsidngan liwat namon an kabugtoan nga puydi nira gamiton an amon balay para ha katirok han pagsangyaw.”

An “pagburubligay” han kabugtoan ha mga buruhaton ha kongregasyon mabulig ha imo nga maparig-on ka ngan an iba. Hi Anne-Lise, nga gin-unabi na, gindasig han ira mga tigurang nga maningkamot nga makig-upod ha ngatanan ha ministeryo. Ano an resulta? “Nasantop ko dayon nga maopay gud ini nga paagi basi maabat ko nga bahin ako han kongregasyon,” siring niya. An pagboluntaryo liwat ha mga buruhaton sugad han panlimpyo ngan pagmintinar han Kingdom Hall nagpapakita nga ginhuhunahuna mo nga ini na an imo kongregasyon. Kon mas makikigbahin ka ha mga buruhaton, mas madagmit nga magigin komportable ha imo an kabugtoan ngan aabaton mo nga ini an imo bag-o nga pamilya.

4. Pagkaada bag-o nga kasangkayan. (2 Cor. 6:​11-13) An pagpakita hin personal nga interes amo an pinakamaopay nga paagi basi magkaada kasangkayan, salit paggahin hin panahon antes ngan  katapos han mga katirok basi makaistorya an iba ngan mas makilala hira. Paningkamuti nga mahibaroan an ira ngaran. Kon hihinumdumon mo an ira ngaran ngan makisangkayon ka ngan masayon madaop maruruyagan ka nira ngan sigurado magkakaada ka bag-o nga kasangkayan.

Imbes nga magkinabaraka nga karawaton ka, tagi hin panahon an imo bag-o nga kabugtoan nga mas makilala ka nira kon hin-o ka gud. Buhata an ginsiring ni Lucinda, “Nagkaada kami duok nga kasangkayan yana kay kami an nag-uuna nga imbitaron an iba ha amon balay.”

“ABIABIHON NIYO AN USA KAG USA”

Para ha iba bangin makulba gud an pagkadto ha Kingdom Hall nga puno hin diri mo kilala nga mga tawo. Salit ano an imo puydi buhaton basi magin mas masayon ito ha mga bag-o pa la nga binalhin? Nagdasig hi apostol Pablo, “Abiabihon niyo an usa kag usa, sugad la nga an Kristo nag-abiabi liwat ha iyo.” (Roma 15:7) Pinaagi ha pagsubad ha Kristo, an mga tigurang makakabulig ha mga binalhin pa la nga umabat nga welcome hira. (Kitaa an kahon nga “ Kon Ano an Nabulig ha Malampuson nga Pagbalhin.”) Pero an ngatanan ha kongregasyon upod na an kabataan, may papel ha pagkaada bag-o nga kasangkayan.

An pag-welcome ha iba nag-uupod ha pagpakita hin pagin maabiabihon pero mahimo liwat ito mag-upod ha paghatag hin praktikal nga bulig. Pananglitan, usa nga sister an naghatag han iya panahon basi ipasyada ha ira lugar an binalhin pa la nga bugto ngan isumat an sistema han panpubliko nga transportasyon. An ginbuhat han sister nakabantad gud ha bugto ngan nakabulig ha iya nga maka-adjust.

USA NGA OPORTUNIDAD BASI MAG-USWAG

Samtang nagtitikaadulto an usa nga duron, nagluluno ito hin damu ka beses tubtob nga an mga pako hito makakalupad na. Ha pariho nga paagi, kon nabalhin kita hin kongregasyon, dapat kita magluno o tanggalon an bisan ano nga kabaraka nga nakakapugong ha imo simboliko nga paglupad ha pag-alagad kan Jehova. “An pagbalhin maopay gud nga training,” siring nira Nicolas ngan  Céline. “Basi maka-adjust ha bag-o nga mga tawo ngan ha iba nga lugar kinahanglan namon kultibaron an bag-o nga mga kalidad.” Hi Jean-Charles, nga gin-unabi ha tinikangan hini nga artikulo, nagkomento kon paonan-o nagpahimulos an iya pamilya: “An pagbag-o nakabulig ha amon mga anak nga mag-uswag ha bag-o nga kongregasyon. Katapos la hin pipira ka bulan, an amon anak nga babaye nagkaada mga bahin ha midweek nga katirok ngan an amon anak nga lalaki nagin diri-bawtismado nga magwarali.”

Pananglitan, ano man kon an imo kahimtang nagpupugong ha imo ha pagbalhin ha lugar nga mas daku an panginahanglan? Puydi mo trataron nga bag-o an imo presente nga kongregasyon ngan iaplikar an gin-unabi na nga mga suhestyon. Samtang nasarig ka kan Jehova, pagpabilin nga busy ha imo kongregasyon pinaagi ha pagplano nga makaupod an iba ha ministeryo ngan pagkaada bag-o nga kasangkayan o magin mas duok hadton mga sangkay mo na. Puydi ka magkaada inisyatibo nga buligan ha praktikal nga paagi an mga binalhin pa la o nanginginahanglan. Tungod kay an gugma pangirilal-an han tinuod nga mga Kristiano, an pagbuhat hito sigurado nga mabulig ha imo nga mag-uswag ha espirituwal. (Juan 13:35) Makakasiguro ka nga “nalilipay gud an Dios ha sugad nga mga halad.”​—Heb. 13:16.

Bisan pa han mga problema, damu nga Kristiano an nagin malampuson ha pagbalhin hin kongregasyon—ngan makakaya mo liwat ito! “An pagbalhin ha iba nga kongregasyon nakabulig ha akon nga magpahaluag,” siring ni Anne-Lise. Kombinsido na yana hi Kazumi nga pinaagi ha pagbalhin “maieksperyensyahan mo an bulig ni Jehova ha mga paagi nga waray mo maeksperyensyahi hadto.” Ngan kumusta naman hi Jules? Hiya nagsiring: “An akon mga pakigsangkay nakabulig ha akon nga magin komportable ha kongregasyon. Yana, inaabat ko nga duok na gud ako ha akon bag-o nga kongregasyon nga tungod hito magigin makuri para ha akon nga bumaya.”