BISAN kon damu an nagruruhaduha mahitungod ha bisan ano nga may kalabotan ha espiritismo ngan madyik, ngan gintatagad ito sugad nga buwa o produkto la han imahinasyon han mga nagsurat hito, iba an panhunahuna han Biblia. Nagtatagana ito hin klaro nga mga pahamangno mahitungod ha espiritismo. Pananglitan, an Deuteronomio 18:10-13 nasiring: “Waray hiagian dida ha imo, . . . in usa nga nagamit hin panag-an, in usa nga manirigo pinaagi hin mga barita, o parapanganito, o parapanhimalad. O lumayan, o tamyawan, o mahiko, o namamakiana han mga minatay.” Kay ano? Ito nagdugang: “Kay bisan hin-o nga magbuhat hini nga mga butang magmamangil-ad kan Jehova. . . . Magmahingpit ka upud kan Jehova nga imo Dios.”

Kay ano nga marig-on nga igindidiri han Biblia an ngatanan nga klase hin espiritismo?

An Biblia nasiring nga maiha na antes pa himoon han Dios an tuna, ginlarang niya an minilyon nga espiritu o anghel. (Job 38:4, 7; Pahayag 5:11) An tagsa hini nga anghel gintagan hin kagawasan ha pagbuot​—an abilidad ha pagpili han husto o sayop. Ginpili han pipira ha ira nga magrebelde ha Dios, ngan ira ginbayaan an ira katungdanan ha langit basi magdara hin kasamok dinhi ha tuna. Tungod hito, an tuna “napuno hin panraugdaug.”​—Genesis 6:2-5, 11; Judas 6.

An Biblia nasiring nga ito nga magraot nga mga anghel nan-iimpluwensya gud ngan nanlilimbong ha minilyon nga tawo. (Pahayag 12:9) Ira pa ngani ginsasalingabot an natural nga interes  han tawo mahitungod ha tidaraon.​—1 Samuel 28:5, 7; 1 Timoteo 4:1.

Tinuod, may labaw ha natural nga mga gahum nga baga hin nakakabulig ha mga tawo. (2 Corinto 11:14) Pero ha pagkamatuod, an magraot nga mga anghel nangangalimbasog ha pagbuta han hunahuna han mga tawo ha kamatuoran mahitungod ha Dios.​—2 Corinto 4:4.

Salit sumala ha Biblia, an pakigkomunikar ha magraot nga espiritu nakakadaot nga kaliawan. Tungod hito, han gintutdoan han kamatuoran may kalabotan han sugad nga buruhaton an mga naruruyag magin disipulo ni Jesus, ‘gindara han damu nga nagbuhat hin madyik an ira mga libro ngan ginsunog ito,’ bisan kon daku nga kantidad an nawara ha ira.​—Buhat 19:19.

Ha pariho nga paagi, damu yana an disidido nga diri manginlabot ha buruhaton ngan kaliawan nga nakagamot ha espiritismo. Pananglitan han 12 anyos hi Maria, * baga hin nakakatigo hiya han pipira nga panhitabo ngan peligro ha tidaraon. Nakakabasa hiya hin mga tarot card para ha iya mga kaklase, ngan tungod kay natutuman an iya mga igintatagna, nagkainteres hiya ha okultismo.

Kahuna ni Maria nga may regalo hiya tikang ha Dios salit nakakabulig hiya ha iba. “Pero may nakagupong ha akon,” siring niya. “Nakakabasa ako hin baraha para ha iba. Kondi diri ko ito nababasa para ha akon kalugaringon, bisan kon karuyag ko hibaroan an akon kabubuwason.”

Nagupong hi Maria tungod han iya damu nga pakiana nga waray kababaton, salit nag-ampo hiya ha Dios ngan ha urhi nakaistorya han mga Saksi ni Jehova, nga nagdumara ha iya hin pag-aram ha Biblia. Hinbaroan ni Maria tikang ha Biblia nga an iya abilidad ha pagtagna diri tikang ha Dios. Hinbaroan liwat niya nga kinahanglan ilabog  han mga naruruyag magin duok ha Dios an bisan ano nga may kalabotan ha espiritismo. (1 Corinto 10:21) Ano an resulta? Ginlabog ni Maria an iya mga libro ngan mga gamit ha espiritismo. Yana, iginsusumat na niya ha iba an kamatuoran nga iya hinbaroan ha Biblia.

Han tin-edyer hi Michael, adik hiya pagbinasa hin nobela mahitungod hin mga tawohan nga may madyik. “Naruruyag ako ha mga superhero nga sugad ha akon an pangidaron nga nakadto ha mga kalibotan han imahinasyon,” siring niya. Hinay-hinay nga naadik hi Michael pagbinasa hin libro ha mahika ngan Sataniko nga mga rituwal. Hiya nagsiring, “An akon duro nga interes nakaaghat ha akon nga magbasa hin mga libro ngan magkita hin mga pelikula mahitungod hito.”

Kondi tungod han pag-aram han Biblia, nasabtan ni Michael nga kinahanglan niya usisahon hin maopay an iya ginbabasa. “Iginlista ko an tanan nga may kalabotan ha espiritismo ngan ginlabog ko ito,” siring niya. “May hinbaroan ako nga importante nga leksyon. Ha 1 Corinto 10:31, an Biblia nasiring: ‘Buhata an ngatanan para ha kadayawan han Dios.’ Yana ginpapakianhan ko an akon kalugaringon, ‘An akon ba pagbasa hini nga barasahon nakakahatag hin kadayawan ha Dios?’ Kon diri, ginlilikyan ko ito.”

An Biblia angayan nga ginhuhulagway sugad nga lampara. Surok ito hin kahayag nga nagbubuhayhag han kamatuoran mahitungod ha kon ano gud an espiritismo. (Salmos 119:105) Kondi diri la ito an nahihimo han Biblia. Mababasa dida hito an saad mahitungod hin kalibotan nga waray magraot nga espiritu. Daku gud an magigin epekto hito ha katawohan. Pananglitan an Salmos 37:10, 11 nasiring: “Sanglit diri magiiha, ngan an mga magraut pagwawad-on: Ngan imo pagsususihon hin maopay an iya kahimurutangan, ngan an maraut waray dida. Kondi an maaghup makakapanonod han tuna, ngan maglilipay hira tungud han kahuraan han kamurayaw.”